Read Mewari यहुन्ना 20 Bible Online

यहुन्ना 20 - Mewari bible

यहुन्ना 20

¹हपता का पेले दन दितवार ने मरियम मगदलीनी भाग-फाट्याँईं कबर पे अई अन कबर का मुण्डाऊँ भाटा ने छेटी हरक्यो तको देक्यो।

²तद्याँ वा दोड़न समोन पतरस अन दूजाँ चेला के नके, ज्यो लाड़लो केवातो हो, वटे आन क्यो, “वीं परबू ने कबरऊँ काड़न ले पराग्या हे अन माँ ने जाणा के, वींने कटे राक मेल्यो हे।”

³तद्याँ पतरस अन दूज्यो चेलो कबर का आड़ी चाल पड़्या।

⁴वाँ दुई लारे-लारे दोड़रिया हा पण, दूज्यो चेलो पतरसऊँ आगे निकळन कबर पे पेल्याँ पूग्यो।

⁵अन रेटे जुकन कापळा का गाबा पड़्या तका देक्या। पण वो कबर का मयने ने ग्यो।

⁶तद्याँ समोन पतरस वाँका पाच्छे आग्यो अन कबर का मयने जान कापळा का गाबा पड़्या तका देक्या।

⁷अन ज्यो हसताड़ो वाँका माता पे बन्दयो तको हो। कापळा की लारे पड़्यो तको ने हो, पण दूजी जगाँ हामटन मेल्यो तको हो।

⁸तद्याँ दूज्यो चेलो भी ज्यो कबर पे पेल्या पोंछ्यो हो, मयने ग्यो अन ओ देकन विस्वास किदो।

⁹वीं अबाणू तईं भी सास्तर की आ बात ने हमजता हा के, वींको मरन पाछो जीवतो वणो पको हे।

¹⁰तद्याँ वीं चेला पाच्छा आपणाँ-आपणाँ घरे पराग्या।

¹¹पण, मरियम रोती तकी कबर के नके बारणे ऊबी वेगी अन रोती तकी जुकन कबर का मयने नाळरी ही।

¹²अन जटे ईसू की लास मेली ही, वटे दो हरग-दुताँ ने चमकण्या गाबा पेरया तका एक ने तो हराणे अन दूजाँ ने पगात्याँ बेटा देक्या।

¹³वाँकाणी वींने क्यो, “ए लुगई, थूँ काँ रोवे हे?” वणी क्यो, “वीं मारा परबू ने ले पराग्या हे अन मूँ ने जाणूँ हूँ के, वींने कटे मेल्यो हे?”

¹⁴ओ केन वा पाच्छी फरी अन ईसू ने ऊबा तका देक्या, पण वाँ वाँने ओळक ने सकी के, वीं ईसू हे।

¹⁵ईसू वींने क्यो, “ए लुगई, थूँ काँ रोवे हे? किंने होदरी हे?” वाँ वींने माळी हमजन क्यो, “ओ बासा, थाँ वींने लेग्या वो तो मने बतावो के, वींने कटे मेल राक्यो हे। ताँके मूँ वींने ले जवूँ।”

¹⁶ईसू वींने क्यो, “मरियम।” वाँ पाच्छी फरी अन वाँकाऊँ इबरानी भासा में क्यो, “रब्बुनी।” ईंको मतलब हे, “हे गरू।”

¹⁷ईसू वींने क्यो, “मारे हात मती लगा, काँके मूँ अबाणू बाप का नके ने ग्यो हूँ। पण, मारा भायाँ का नके जान वाँने के दे के, ‘मूँ मारा बाप अन थाँका बाप अन मारा परमेसर अन थाँका परमेसर का नके ऊपरे जारियो हूँ।’ ”

¹⁸मरियम मगदलीनी जान चेला ने आ बात बतई के, “में परबू ने देक्या हे।” ज्यो कई परबू वींने क्यो हो, वणी वो वाँने बतायो।

¹⁹हपता को पेला दन दितवार के हाजकाँ वींका चेला यहूदी अदिकारियाँ की दरपऊँ कमाड़ बन्द करन घर में बेटा हा। वीं टेम ईसू आया अन वाँका बचमें ऊबा वेन वाँकाऊँ क्यो, “थाँने सान्ती मले।”

²⁰अन ओ केन वणा आपणाँ हात अन आपणी पाँळी का घाव बताया। तद्याँ चेला परबू ने देकन राजी व्या।

²¹ईसू पाछो वाँकाऊँ क्यो, “थाँने सान्ती मले। जस्यान बाप मने खन्दायो हे, वस्यानीस मूँ थाँने खन्दावूँ हूँ।”

²²ओ केन वाँ वाँपे फूँक लगई अन क्यो, “पुवितर आत्माने गरण करो।

²³ज्याँका पाप थाँ माप करो, वाँका पाप माप किदा जाई। ज्याँने थाँ माप ने करो, वीं माप ने करया जाई।”

²⁴पण बाराई चेला मेंऊँ एक थोमो, ज्यो जोडलो केवातो हो जदी ईसू वटे आया, तो वाँकी लारे ने हो।

²⁵जदी दूजाँ चेला वाँकाऊँ केबा लागा, “माँ परबू ने देक्याँ हे।” तद्याँ वणी वींकाऊँ क्यो, “जद्याँ तईं मूँ वाँका हाताँ में खीलाँ का निस्याण में आँगळी ने गोड़ूँ अन वाँकी पाँळी में आपणो हात ने गालूँ तद्याँ तईं मूँ विस्वास ने करूँ।”

²⁶आट दनाँ केड़े वाँका चेला घर मेंईस हा अन थोमो वाँका लारे हो अन कमाड़ जड़्यो तको हो। तद्याँ ईसू आया अन वाँका बचमें ऊबा वेन क्यो, “थाँने सान्ती मले।”

²⁷तद्याँ ईसू ने थोमाऊँ क्यो, “आपणी आँगळी लगान मारा हाताँ ने देक अन आपणो हात पाळा में गाल। विस्वास मती छोड़, पण विस्वासवाळो बण।”

²⁸ओ हुणन थोमा जबाव दिदो, “ओ मारा परबू, ओ मारा परमेसर।”

²⁹ईसू वींने क्यो, “थें मने देक्यो हे, ईं वाते विस्वास किदो हे। पण धन्न हे वीं मनक जणा मने बनाई देक्या विस्वास किदो।”

³⁰ईसू ओरी नरई परच्या चेला का हामे बताया। ज्यो ईं किताब में ने लिक्या ग्या हे।

³¹पण, ईं वाते लिक्या ग्या हे के, थाँ विस्वास करो के, ईसूइस परमेसर को पूत मसी हे अन विस्वास करन वाँका नामऊँ जीवन पावो।