Read Mewari थरप्या तका का काम 1 Bible Online

थरप्या तका का काम 1 - Mewari bible

थरप्या तका का काम 1

¹“हे थियोपलुस, में पेली किताब में वीं बाताँ लिकी, जो बाताँ ईसू का काम की सरुआतऊँ लेन

²परमेसर की पुवितर आत्मा ईसू ने हरग में लेन परीगी वीं दन तईं ईसू हिकई अन किदी। ईसू को हरग में जाबाऊँ पेल्या ईसू थरप्या तका चेला ने पुवितर आत्माऊँ उपदेस दिदा।

³वो हूळी पे दक भोगन मरिया केड़े पाका सबूत का हाते नरी दाण परगट व्यो, वो जीवतो हे। अन चाळी दनाँ तईं चेला वींने देक्यो अन वो वाँने परमेसर का राज का बारा में बतातो रियो।

⁴जद्याँ वीं हारई एक हाते हा, वीं दाण ईसू वाँने आदेस दिदो, ‘यरूसलेम मती छोड़ो, पण परमपिता का वीं वादा के वाते वाट नाळो, जिंका बारा में, में थाँने क्यो हो।

⁵यहुन्ने तो थाँने पाणीऊँ बतिस्मो दिदो हो, पण अबे थोड़ाक दनाँ केड़े थाँने पुवितर आत्माऊँ बतिस्मो दिदो जाई।’”

⁶ईं वाते थरप्या तका चेला अगेटा वेन ईसुऊँ पूँछ्यो, “ओ परबू, कई थाँ ईं दाण ईं राज ने इजराएल का लोगाँ ने पाछो हूँप देवो?”

⁷ईसू वाँने क्यो, “वीं मोका अन बगत की पेचाण करणो परमपिता आपणाँ हक में राक्यो हे अन ईं मोका अन बगत ने थाँने जाणबा की जरुरत कोयने हे।

⁸पण, जद्याँ पुवितर आत्मा थाँका पे आई, तो थाँ सगतिऊँ भर जावो अन आकाई यरूसलेम, यहूदियाँ अन सामरियाऊँ लगान धरती का खुणा-खुणा तईं मारा गवा बेणो।”

⁹आ बात केन वाँकाणी देकतईं देकता ईसू ने वटूँ हरग में उठा लिदा ग्या अन बादळा में वे नजराऊँ ओजल वेग्या।

¹⁰जद्याँ वे लोग-बाग ईसू ने हरग में जाता तका देकरिया हा, वीं दाणइस वटे धोळा गाबा पेरिया तका दो जणा वाँका बचमें परगट वेग्या।

¹¹अन पछे वाँ दुई जणा क्यो, “ओ गलील का रेबावाळा, थाँ अटे ऊबा-ऊबा आकास में काँ देकरिया हो? वीं ईसू, जीं आज अटूँ हरग में पराग्या वस्यानीस, एक दन थाँ वाँने पाच्छा हरगऊँ आता तका देको।”

¹²पछे वीं हंगळाईं जणा जेतुन नाम का मंगरा पूँ यरूसलेम पाच्छा आग्या, जो यरूसलेमऊँ एक आदो कोस छेटी हो।

¹³वे वटे आन ऊपरे एक ओवरा में ग्या, जटे वे रेता हाँ, वाँका में पतरस, यहुन्नो, याकूब, अन्दरियास, फिलिपुस, थोमो, बरतुलमे, मत्ती, हलफई को छोरो याकूब, देसभगत समोन अन याकूब को बेटो यहूदो।

¹⁴ईं हाराई रोज एक मन वेन परातना करबा वाते भेळा वेता हा। आका हाते थोड़ीक लुगायाँ, ईसू की बई मरियम अन ईसू का भई भी हा।

¹⁵थोड़ाक दनाँ केड़े एक विस्वास्याँ की सबा जिंमें होन बीस जणा हा, वटे परतस ऊबो वेन केबा लागो,

¹⁶“ओ मारा भई अन बेना, ईसू ने बंदी बणाबावाळा ने गेलो बताबावाळो यहूदो, जिंका बारा में सास्तर में लिक्यो हे, जो दाऊद का मुण्डाऊँ पुवितर आत्मा नरई दनाँ पेल्याँई के दिदो हो, वाँ बात पुरी वेणी जरूरी ही।

¹⁷यहूदो आपणाँ मेंईस एक हो अन ईं सेवा का काम में वींकी भी पाँती ही।”

¹⁸यहूदो आपणाँ वीं नीच कामऊँ जो भी धन-दोलत कमई ही, वीं दोलतऊँ एक खेत मोल लिदो। वो वीं खेत में माता वराणो पड़्यो अन वींको पेट फूटग्यो अन आतेड़ा-ओजेड़ा बारणे निकळग्या अन मरग्यो।

¹⁹आ बात यरूसलेम में रेबावाळा हाराई जणा जाणग्या हा। ईं वाते वीं खेत ने वाँकी बोली में हकेलदामा केता हा जिंको मतलब हे, “लुई को खेत”।

²⁰भजनाँ की किताब में लिक्यो हे के, वींको घर उजड़ जावे वीं घर में कुई ने रेवे अस्यान भी लिक्यो हे के, वींकी जगाँ कुई दुसरो जणो लेले।

²¹ईं वाते ओ काम जरूरी हो के, ईसू मसी की जीवतो वेबा की गवई देबावाळो एक जणो ओर भी माकाँ हण्डे भेळो वेणो छावे। ओ मनक अस्यो वेणो छावे के जीं टेम ईसू आपणे हाते रेन जातरा किदी जीं हंगळा आबाजाबा की टेम में वो मनक भी आपणे हण्डे हो। ईंको मतलब यहुन्ना का बतिस्माऊँ लगान ईसू हरग में ग्या वटा तईं जो मनक माँकी हण्डे हो।

²³ईं वाते वाँ दो जणा ने ऊबा किदा, ज्यामूँ एक को नाम युसुप हो, जिंने बरसब्बो केता हा अन वींने युसतुस भी केता हा अन दूजो मत्ती हो।

²⁴पछे वाँ हंगळा जणा परातना करन केबा लागा के, ओ परबुजी, थाँ तो हारई को मन जाणो हो अन अबे माने ओ बतावो के, आ दुई जणाऊँ थाँ किंने थरपणो छावो हो,

²⁵के वो ईं थरप्या तका का काम अन सेवा जगाँ की ले, जो यहूदो छोड़न आपणी जगाँ परोग्यो जिंके वो लायक हो।

²⁶पछे वाँकाणी ईं वाते गोट्याँ नाकी अन गोटी मत्ती का नाम की निकळी। अस्यान वो मत्ती ग्यारा चेला में भेळो वेग्यो।