Read Mewari थरप्या तका का काम 10 Bible Online

थरप्या तका का काम 10 - Mewari bible

थरप्या तका का काम 10

¹केसरिया में कुरनेल्युस नाम को एक मनक हो। वो रोम की इटालनी नाम की फोज का हो सपायाँ पे सरदार हो।

²वो एक धरमी अन परमेसरऊँ दरपबावाळो मनक हो अन वींको परवार भी वस्योईस हो। वो लोगाँ ने खुला मनऊँ घणो दान-पन करतो हो अन हमेस्यान परमेसरऊँ परातना करतो हो।

³वे दन का तीजा पेर में एक दरसावो में देक्यो के, परमेसर को एक हरग-दुत वाँका नके आयो हे अन वींने केरियो हे, “ओ कुरनेल्युस।”

⁴तो कुरनेल्युस दरपतो तको ध्यानऊँ हरग-दुत ने देकतो तको बोल्यो, “ओ परबू, कई हे?” हरग-दुत वींने क्यो, “परमेसर थारी परातना हूणी हे अन थाँरा किदा तका दान-पनऊँ परमेसर राजी वेग्या हे।

⁵ईं वाते अबे किंने यापा देस में खन्दा अन समोन नाम का जो पतरस केवावे हे वींने अटे बला ले।

⁶वो समोन नाम का एक चामड़ा का काम करबावाळा की लारे रेरियो हे, जिंको घर समन्द का कनारे हे।”

⁷वो हरग-दुत जो वींऊँ बाताँ करियो हो, परोग्यो, तो कुरनेल्युस आपणाँ दो नोकराँ अन एक सपई जो धरमी मनक हो वींने बलायो जो वींकी हार-हमाळ करता हा।

⁸अन जो भी व्यो हे, वाँने हारी बात बतान यापा देस खन्दा दिदा।

⁹आगले दन जद्याँ वे चालता-चालता नगर के भडे़ पूगबाने हाँ, तद्याँई पतरस दपराँ की परातना करबा के वाते मेड़ी पे चड्यो।

¹⁰वींने भूक लागी, तो वो कई खाणो छारियो हो। जद्याँ खाणो बणरियो हो, वीं टेम वो एकाएक होस भुलग्यो।

¹¹अन वे देक्यो के, आकास खुलग्यो अन एक मोटा चादरा जस्यान कई चीज हे जिंका च्याराई खुणा पकड़न रेटे उतररी हे।

¹²वींमें हारई तरे का जीव-जनावर हा, ज्यामें धरती का किड़ा-मकोड़ा अन आकास का उड़बावाळा जनावर हा।

¹³पछे एक अवाज अई के, “पतरस उठ अन आने मारन खा।”

¹⁴पतरस क्यो, “परबू मूँ अस्यो ने कर सकूँ हूँ, काँके में कदी भी हुगली अन असुद चिजाँ ने खादी।”

¹⁵तो पाच्छी वींने दूजी दाण अवाज हुणई, “जो भी चिजाँ ने परमेसर सुद क्यो हे, वींने असुद ने केणी।”

¹⁶तीन दाण अस्यानीस व्यो अन वाँ चीज पाच्छी आकास में उठा लिदी गी।

¹⁷पतरस जो दरसावो में देक्यो हो, वींका वाते वो होचरियो हो, जद्याँई कुरनेल्युस का खन्दाया तका मनक पतो पूँछता तका बारणा पे आग्या।

¹⁸वाँकाणी बारणे बलान पूँछ्यो, “कई पतरस केवावे, जो समोन अटेई रूक्यो तको हे?”

¹⁹पतरस अबाणू भी वीं दरसावो के वातेई होचरियो हो, तद्याँ आत्मा वींने क्यो, “हुण, तीन मनक थने होदरिया हे।

²⁰ईं वाते ऊबो वे अन रेटे उतर आगो-पाछो मत वे अन वाँकी लारे परोजा, काँके वाँने में खन्दाया हे।”

²¹पछे पतरस रेटे उतरियो अन वाँ लोगाँ ने क्यो, “मूँ तो वोईस मनक हूँ, जिंने थाँ होदरिया हो। थें काँ आया हो?”

²²वे बोल्या, “माँ ने फोज का सरदार कुरनेल्युस खन्दाया हे, जो एक धरमी अन परमेसरऊँ दरपबावाळो मनक हे। हाराई यहूदी मनकाँ में वींको घणो मान-समान हे। वींने परबू के हरग-दुत क्यो के, वो थाँने आपणाँ घरे बलावे अन जो थें केवो, वो हुणे।”

²³ईं वाते पतरस वाँने मयने बलान मनवार किदी, पछे आगले दन वो त्यार वेन वाँकी लारे परोग्यो अन यापा देस का रेवासी थोड़ाक विस्वासी वींकी लारे ग्या।

²⁴पछे आगलेई दन वो केसरिया परोग्यो। वटे आपणाँ हगा-होई अन भई-बन्दा ने बलान कुरनेल्युस वाँकी बाट नाळरियो हो।

²⁵पतरस जद्याँ मयने जाबाई वाळो हो, तद्याँ कुरनेल्युस वींने मल्यो। कुरनेल्युस वींका पगाँ में पड़न धोक दिदो।

²⁶पण, पतरस वींने बेटो करतो तको क्यो, “ऊबो वे, मारे धोक मत दे, मूँ भी तो एक मनक हूँ।”

²⁷पछे वींका लारे बाताँ करतो तको वो मयने परोग्यो अन वटे वीं नरई लोगाँ ने अगेटा व्या तका देक्या।

²⁸पतरस वाँने क्यो, “थाँ जाणो हो के, एक यहूदी के वाते ज्यो यहूदी ने हे वणीऊँ वेवार राकणो कन वाँका नके जाणो नेम को उल्टो हे। पण परमेसर मने बतायो के, मूँ किंने भी हुगलो अन असुद ने केवूँ।

²⁹ईं वाते जद्याँ मने बलायो अन मूँ बनाई आगो-पाछो व्याई अटे आग्यो हूँ। ईं वाते अबे मूँ पूँछू हूँ के, थें मने अटे काँ बलायो हे?”

³⁰तो कुरनेल्युस क्यो, “चार दन पेल्याँ अणीस टेम का तीजे पेर में, मूँ घरे परातना करियो हो। तद्याँ अणाचेत को चमकता तका गाबा पेरिया एक मनक मारा हामे आन ऊबो वेग्यो,

³¹अन क्यो, कुरनेल्युस! परमेसर थारी परातना हूणी हे अन थाँरा लोगाँ ने दिदा तका दान-पन हाराईऊँ परमेसर राजी वेग्या हे।

³²ईं वाते अबे किंने यापा देस में खन्दा अन समोन नाम का जो पतरस केवावे हे वींने अटे बला ले। वो समोन नाम का एक चामड़ा का काम करबावाळा की लारे रेरियो हे, जिंको घर समन्द का कनारे हे।”

³³ईं वाते में तरत थने बलाबा खन्दाया अन थें अटे आन हव काम किदो। तो अबे परमेसर की मोजुदगी में माँ वो हारई हुणबा के वाते त्यार हा, जो परबू थने आदेस दिदो हे।

³⁴पछे पतरस बोलबा लागो के, “अबे हाँचई में मूँ हमजग्यो हूँ के, परमेसर कई दूज-भराँत ने करे।

³⁵कस्यी भी जात कन कणी भी देस को जो भी मनक परबूऊँ दरपतो रेवे अन हुदा काम करे तो, परबू वींने आपणो मान लेवे।

³⁶थाँ ईं सन्देस ने जाणो हो, जो इजराएली लोगाँ का वाते खन्दायो ग्यो हे, जो हाराई को परबू ईसू मसीऊँ सान्ती मले हे, वीं हव हमच्यार की घोसणा हे।

³⁷थें वा बात जाणो हो के, यहुन्ना बतिस्मा का संदेसो देबा केड़े, गलीलऊँ सरू वेन आकई यहूदियाँ में कई व्यो हो।

³⁸ईसू नासरी का बारा में थाँ तो जाणो हो, परमेसर पुवितर आत्मा अन सगतिऊँ वींको तलक कस्यान किदो हो। वणी हव काम किदा अन सेतानऊँ दकी हारई जणा ने हव करतो तको च्यारूँमेर कस्यान गुमतो हो, काँके परमेसर वाँकी लारे हो।

³⁹अन आपाँ हारई जणा आ बाताँ का गवा हाँ, जो बाताँ वणी यहूदियाँ देस अन यरूसलेम में किदी ही, जिंने वाँकाणी हूळी पे लटकान मार नाक्यो।

⁴⁰पण, परमेसर वींने पाछो तीजे दन जीवतो कर दिदो अन परगट कर दिदो।

⁴¹वाँ हारई मनकाँ के हामे कोयने, पण बेस वाँ गवा के हामे, जो पेल्याँई परमेसर का हातऊँ थरप्या ग्या हा, ज्याँकाणी मरिया तकाऊँ जीवता व्या केड़े वाँकी लारे खादो-पीदो हो।

⁴²वणीस माँने आदेस दिदो के, आपीं लोगाँ में घोसित कराँ अन गवई देवा के, ओ वोईस हे, जो परमेसर का हातऊँ जीवता अन मरिया तका को न्याव करबावाळो बणायो हे।

⁴³हारई परमेसर का आड़ीऊँ बोलबावाळा वींका बारा में गवई दिदी के, वींपे भरोसो करबावाळो हरेक मनक वींका नामऊँ पापाँ की मापी पाई।”

⁴⁴जद्याँ पतरस ईं बाताँ कररियो हो, तद्याँई हारई जणामें पुवितर आत्मा आगी, ज्याँकाणी हव हमच्यार हुण्या हा।

⁴⁵तो पतरस की लारे यापाऊँ आया यहूदी मनक अचम्बा में पड़ग्या, काँके पुवितर आत्मा को दान ज्यो यहूदी ने हा वाँ लोगाँ पे भी उन्दायो ग्यो हो।

⁴⁶वे वाँने तरे-तरे की भासा बोलता तका अन परमेसर की मेमा करता तका हुणरियो हा। तद्याँ पतरस बोल्यो,

⁴⁷“कई, अणा लोग-बागाँ ने पाणी को बतिस्मो देबा वाते माने कुई रोक सके हे? आने भी वस्यानीस पुवितर आत्मा मली हे, जस्यान आपाँने।”

⁴⁸अस्यान वे ईसू मसी का नामऊँ बतिस्मो लेबा को आदेस दिदो। पछे वाँकाणी पतरसऊँ अरज किदी के, वो थोड़ाक दन वाँकी लारे रूके।