Read Mewari थरप्या तका का काम 20 Bible Online

थरप्या तका का काम 20 - Mewari bible

थरप्या तका का काम 20

¹जद्याँ वटे हुल्‍लड़ ठम ग्यो, तो पोलुस चेला ने नके बलान धिजो बन्दातो तको वाँकाऊँ हिक लिदी, अन पछे मकिदुनिया में परोग्यो।

²वीं हंगळा इलाका में वेन अन चेला ने धिजो बन्दातो तको वो युनान में आयो।

³वो तीन मिना वटे रियो। ईंका केड़े जाँज में सिरिया के आड़ी जाणो हो, तो वणी हुण्यो के यहूदियाँ वींका वाते जाळ बिछारिया हे, ईं वाते वणी मकिदुनिया वेन जाबा वाते धारियो।

⁴बिरिया के पुरूस को छोरा सोपतरुस अन थिस्सुलुनिक्यों मेंऊँ अरिस्तखुस अन सिकन्दुस, अन दिरबे को गयुस अन आसिया का तुखिकुस अन तुरकियुस अन तिमुतियुस वींका हाते ग्या हा।

⁵वीं आगे जान त्रोआस में माकाँ वाते बाट नाळरिया हा।

⁶अन माँ बना हाज्या की रोटी का तेवाराँ का दनाँ केड़े फिल्‍लिपीऊँ जाँज में बेन पाँच दन में त्रोआस ग्या अन हात दन तईं वटे रिया।

⁷हपता का पेले दन जद्याँ परबू ने आद करबा का जीमणा वाते भेळा व्या तो पोलुस वाँऊँ बात-बच्यार करतो रियो अन दूजे दन जाणो हो, ईं वाते आदी रात तईं बाताँ करतो रियो।

⁸जणी घर का उपरला ओवरा पे माँ हंगळा भेळा व्या हा, वटे दिवाण्या लगा मेल्या हा,

⁹अन युतुखुस नाम को एक मोट्यार छोरो खड़की में बेटो हो। जद्याँ पोलुस आदी रात तईं बाताँ कररियो हो तो वो मोट्यार नींद में ऊंगरियो हो अन गेरी नींद में तीसरा माळाऊँ हेठे पड़ग्यो। जद्याँ लोगाँ वींने तोक्यो तो मरियो तको देक्यो।

¹⁰पण पोलुस रेटे आन वींने बाँत में लिदो अन क्यो, “घबरावो मती, काँके ईंको जीव ने निकळ्यो हे”

¹¹अन पोलुस पाछो ऊपरे जान रोटी तोड़ी अन खादी। वो अतरी देर तईं बाताँ करतो रियो के, भाग-फाट्याँ की टेम वेगी, पछे वो परोग्यो।

¹²वीं मोट्यार छोरा ने जीवतो वे घरे लेन आया अन वणा संतोक पायो।

¹³माँ पोलुसऊँ पेल्याई जाँज में बेन अरसुस आया, काँके माँने वटूऊँ वींने हाते लेणो हो, काँके वणी माँकाऊँ क्यो हो के वो गेले-गेले जाणो छारियो हे।

¹⁴जद्याँ वीं असुस में माँने मल्यो तो माँ वींने जाँज में मितुलेन लाया।

¹⁵वटूऊँ माँ जाँजऊँ वेन दूजे दन खियुस नके पोंच्या, अन आगले दन सामुस पार करन तीजे दन मिलेतुस में आया।

¹⁶पोलुस इपिसुस का नके वेन जाणो छायो, काँके कटे अस्यान ने वे के आसिया में मोड़ो वेजा। वो ईं वाते आगत कररियो हो, के वे सके तो पिन्तेकुस के तेंवार के दन यरूसलेम में रेवे।

¹⁷पोलुस मिलेतुसऊँ इपिसुस में संदेसो खन्दायो के, मण्डली में बुड़ा-ठाड़ा ने बलावो।

¹⁸जद्याँ वे वींका नके आया, तो वणी क्यो, “थाँ जाणो हो के मूँ वीं पेलाई दनऊँ पूरो टेम थाँका हण्डे कस्यान बितायो, जीं दनऊँ मूँ आसिया में आयो।

¹⁹नमरताऊँ अन आसूऊँ अन जद्याँ यहूदियाँ को जाळ भी मारा पे आ पड़्यो, तो भी मूँ ईं परक में परबू की सेवा करतो रियो।

²⁰अन जी जी बाताँ थाँके भलई की ही वणीने में हंगळा के हामे अन हरेक का घरे जा-जान हिकाबाऊँ कदी ने हपई।

²¹यहूदियाँ अन युनानियाँ के हामे गवई देतो रियो, के पापाऊँ मन फरान परमेसर का आड़ी आवो अन परबू ईसू मसी पे विस्वास करो।

²²अबे देको, मूँ पुवितर आत्मा की आग्याऊँ यरूसलेम जारियो हूँ, मूँ ने जाणूँ के वटे मारा पे कई बीती।

²³बेस ओ के पुवितर आत्मा हरेक नगर में गवई देन मने केवे हे के, हतकड़ी अन दक-तकलिप मारा वाते वेबावाळी हे,

²⁴पण मूँ आपणाँ जीव ने कई ने हमजूँ। मूँ तो बेस वीं दोड़ अन सेवा का काम ने पूरो करणो छारियो हूँ, जिंने में परबू ईसुऊँ पाई हे, जो परमेसर की करपा का हव हमच्यार की गवई देणो हे।”

²⁵अबे देको, मूँ जाणूँ हूँ के, थाँका बचमें में परमेसर का राज को परच्यार किदो हे, पण अबे थाँकामूँ कुई भी अन कदी भी मने ने देक सकी।

²⁶ईं वाते मूँ आज थाँने गवई देन केरियो हूँ, यद्याँ ईंका केड़े भी थाँको नास वे जावे तो मूँ जिमेदार ने हूँ।

²⁷काँके मूँ परमेसर की हारी मरजी ने थाँने बताबा वाते कदी आगो-पाछो ने व्यो।

²⁸ईं वाते थाँ आपणो अन आपणी हाराई गारा को ध्यान राको जिंने पुवितर आत्मा थाँका हात में हुप्याँ हे के, थाँ परमेसर की मण्डली की रुकाळी करो, ज्याँने परमेसर आपणाँ बेटा का लुईऊँ मोल लिदी हे।

²⁹मूँ जाणूँ हे के, मारा जाबा के केड़े उगड्याँ तका बरगड़ा थाँका गाबे अई, जो थाँका गारा ने, ने छोड़ी।

³⁰अस्यो टेम आई जद्याँ थाँका मेंऊँस थोड़ाक मनक विस्वास्याँ ने जूट बोलन आपणाँ हाते लेई,

³¹ईं वाते हूँस्यार रेवो, अन ओ ध्यान राको के, में तीन वर तईं रात-दन आसूँ का हाते थाँ हाराई ने हिकाया।

³²अबे मूँ थाँने परमेसर अन वींकी करपा का संदेसा में थाँने हूँप दूँ हूँ। वोईस थाँने बणाई अन वींका मनकाँ ज्याँने पुवितर किदा हे वाँका हण्डे थाँने भी बापोती देई।

³³में कणी भी मनक की चाँदी अन होना अन गाबा को लाळच ने किदो।

³⁴थाँ जाणो हो के, अणा हाताँईस मारी अन मारा हण्डाळ्याँ की जरुरत ने पुरी किदी ही।

³⁵में थाँने हंगळो करन दिकायो के अस्यान मेनत करता तका गरीबा ने हमाळो अन परबू का बचन ने रोज याद राकज्यो, जो वणी क्यो हो के, “लेबाऊँ देणो हव हे।”

³⁶ओ केन वणी गोडा टेकन हंगळा के लारे परातना किदी।

³⁷तद्याँ वीं हंगळा घणा रोया अन पोलुस के गळे मलबा लाग्या।

³⁸वे खासकर ईं बातऊँ दकी हा के, पोलुस वाँने क्यो हो के, थाँ अबे मने कदी ने देको। तद्याँ वीं हंगळा पोलुस ने जाँज में बेटावाने ग्या।