Read Mewari थरप्या तका का काम 22 Bible Online

थरप्या तका का काम 22 - Mewari bible

थरप्या तका का काम 22

¹पोलुस क्यो, “मारा हण्डाळ्याँ यहुदियो, भायाँ अन मारा बड़ाबा, मारा बंचबा के वाते मने जो कई केणो हे, वींने हुणो।”

²वीं मनक जद्याँ ओ हुण्यो के वो इबरानी भासा में बोलरियो हे, तो वीं ओरू छाना-माना वेग्या, तद्याँ पोलुस केतो ग्यो,

³मूँ एक यहूदी मनक हूँ, अन किलिकिया देस का तरसूस नगर में मारो जनम व्यो, पण अणी नगर में गमलियल मारसाब का अटे भण्यो जस्यान के, बापदादा की वेवस्ता ने बड़या तरियऊँ हिक्यो, अन परमेसर का वाते अस्यी धुन लगई ही, जस्यान थाँ आज लगई मेली हे।

⁴मूँ ईसू ने मानबावाळा लोगाँ ने अटा तईं हतातो रेतो के वीं नसंगी मर जाता हा। मूँ मनकाँ अन लुगायाँ ने बन्दी बणान जेळ में नाकतो हो।

⁵खुद मोटा याजक अन बड़ाबा की सबा भी ईं बात ने साबत कर सके हे। में दमिसक में रेबावाळा यहूदी लोगाँ का वाते अणा लोगाऊँ कागद पायो ताँके मूँ वटे जऊँ अन ईसू ने मानबावाळा लोगाँ ने बन्दी बणान यरूसलेम लऊँ ताँके वाँने दण्ड दे सके।

⁶“जद्याँ मूँ चालतो-चालतो दमिसक का नके पूग्यो, तो अस्यान व्यो के दपरी की टेम में अणाचेत को आकासऊँ उजितो मारे च्यारूँमेर वेग्यो।

⁷अन मूँ रेटे पड़ग्यो अन आकासऊँ एक अवाज हूणी ज्या मने केरी ही के, ‘हे साउल, हे साउल, थूँ मने काँ हतईरो हे?’

⁸में जवाब दिदो, ‘हो परबू, थाँ कूण हो’ वणा मने क्यो, ‘मूँ ईसू नासरी हूँ, जिंने थूँ हतारियो हे।’

⁹मारा हण्डाळी उजितो तो देक्यो, पण वणा जो माराऊँ बात कररियो हो वा अवाज ने हुण सक्या।

¹⁰तद्याँ में क्यो, ‘हो परबू, मूँ कई करूँ?’ परबू माराऊँ क्यो, ‘ऊबो वे अटूँ दमिसक में जा, अन वटे थने वो हारोई बता दिदो जाई जिंका वाते परमेसर थने चुण्यो हे।’

¹¹वीं अणाचेत का उजिताऊँ मने दिकतो बन्द वेग्यो, ईं वाते मारा हण्डाळ्याँ मारो हात पकड़न दमिसक में लेग्या।”

¹²तद्याँ वटे हनन्या नाम को वेवस्ता ने मानबावाळो एक मनक हो, जिंकी वटे रेबावाळा हंगळा यहूदियाँ में हव पेट ही,

¹³अन वो मारे नके आयो अन मने क्यो, “हे भई साउल पाछो देकबा लाग।” वणीस दाण मूँ वींने देकबा लागग्यो।

¹⁴तद्याँ वणी क्यो, “आपणाँ बापदादा का परमेसर थने ईं वाते चुण्यो के थूँ वींकी मरजी ने जाणे, अन धरमी मनक ने देक सके वींकी मुण्डा की बात ने हुण सके।

¹⁵काँके थूँ वींको हंगळा लोगाँ के हामे वणी बाताँ को गवा हे जिंने थें देकी अन हूणी हे।

¹⁶अबे काँ मोड़ो कररियो हे? ऊँट अन बतिस्मो ले, अन वींका नामऊँ अरज करन आपणाँ हंगळा पापाँ ने धो नाक।”

¹⁷जद्याँ मूँ पाछो यरूसलेम में आन मन्दर में परातना कररियो हो तो एक दरसावो देक्यो,

¹⁸अन वींमें में परबू ने देक्या अन परबू मने कई केरिया हे, “फटाकऊँ यरूसलेमऊँ परोजा, काँके अटाका लोग मारा बारा में थारी गवई ने मानी।”

¹⁹में क्यो, “हो परबू, वीं तो जाणे हे के मूँ यहूदियाँ का परातना घर में जान विस्वास करबावाळा मनकाँ ने जेळ में नाकतो हो अन कूटतो हो।

²⁰अन जद्याँ थाँरा गवा इस्तीपनुस ने माररिया हा, वीं दाण मूँ भी वटीस ऊबो हो अन में भी वींमें हात दिदो। जीं लोग वींने माररिया हा वाँका गाबा की रुकाळी कररियो हो।”

²¹अन परबू माराऊँ क्यो, “जा, काँके मूँ थने जो यहूदी ने हे वाँका बचमें नरई छेटी-छेटी खन्दाऊँ।”

²²आ बात तईं वे वींकी बात हूणता रिया। तद्याँ जोरऊँ हाको करन केबा लागा, “अणी मनक ने मार नाको, यो अणी धरती पे जीवतो रेवा के जोगो ने हे।”

²³जद्याँ वीं हाका-भार अन गाबा फेंकरिया हा अन धूळो उड़ा रिया हा।

²⁴तो सेनापती क्यो, “ईंने छावणी में ले जावो अन चामट्याँ मेलन पूछो के, ईं लोग-बाग किंका वाते हाका-भार कररिया हे।”

²⁵जद्याँ वणा वींने बाद्यो तो पोलुस वटे ऊबा तका सपायाँ का अदिकारीऊँ क्यो, “कई ओ कानून में हे के, थाँ एक रोमी मनक के बना दोसऊँ चामट्याँ मेलो?”

²⁶सपायाँ को अदिकारी ओ हुणन सेनापती का नके जान क्यो, “थाँ ओ कई कररिया हो? ओ तो रोमी मनक हे।”

²⁷तद्याँ सेनापती पोलुस नके आन क्यो, “मने बता, कई थूँ रोमी मनक हे।” पोलुस क्यो “हाँ।”

²⁸सेनापती क्यो, “रोमी वेबा का वाते मने घणा रिप्या देणा पड़्या।” पण पोलुस क्यो, “मूँ तो जनमऊँ रोमी हूँ।”

²⁹तद्याँ जीं लोग वींने पूँछरिया हा वीं तरत वींका नकूँ पराग्या, अन सेनापती भी ओ जाणन दरपग्यो के, में एक रोमी मनक ने बन्दी बणायो हे।

³⁰दूजे दन सेनापती पूरो पतो लगाणो छायो के, यहूदी मनक वींपे काँ दोस लगावे हे, ईं वाते वींने खोल दिदो, अन हंगळा मोटा याजकाँ अन हाराई मोटी सबा का लोगाँ ने भेळा वेबा वाते हुकम दिदो अन पोलुस ने वटे लेजान हंगळा का हामे ऊबो कर दिदो।