Read Mewari रोमियों 13 Bible Online

रोमियों 13 - Mewari bible

रोमियों 13

¹हाराई मनकाँ ने अदिकारियाँ का रेटे रेणो छावे। काँके परमेसर की मरजी का बना कुई राज ने कर सके, अन अदिकारियाँ ने परमेसरइस बणावे हे।

²तो ज्यो भी अदिकारियाँ को विरोद करे हे, वो परमेसर की आग्या को विरोद करे हे। अन ज्यो परमेसर की आग्या को विरोद करे हे, वाँने सजा मली।

³देको राज करबावाळा खरई करबावाळा ने, पण बुरा काम करबावाळा दरपाबा का वाते हे। अन यद्याँ थाँ अदिकारियाऊँ दरपणा ने छावो हो, तो हव काम करो। तो थाँने वाँकाऊँ बड़ई मली।

⁴ज्यो अदिकारी हे, वीं थाँके भलो करबा का वाते परमेसर को दास हे। पण यद्याँ थाँ बुरो करो हो तो वणाऊँ दरपो, काँके वणा यूँई तरवार ने लिदी हे। वीं परमेसर का दास हे, ज्यो बुरई करबावाळा पे वींका न्याव ने लावे हे।

⁵ईं वजेऊँ थाँने अदिकारियाँ की आग्या मानणी जरूरी हे। सजा की दरपऊँईस ने पण थाँका अंतर-आत्मा की वजेऊँ भी ओ जरूरी हे।

⁶ईं वातेईस थाँ कर भी देवो हो, काँके अदिकार राकबावाळा परमेसर का दास वेवे हे ज्यो आपणाँ काम ने पूरो करबा में लाग्या रेवे हे।

⁷किंकी भी उदारी हे तो वींने चुका दो, अन ज्यो कर थाँने देणो हे वो दिदो। किंको जद्याँ हाँसल निकळे, तो वींने दिदो। जणीऊँ दरपणो छावे, वणीऊँ दरप। जिंको आदर करणा छावे, वींको आदर कर।

⁸एक-दूँजा का परेम का अलावा किंको करजो खुद पे मती राको, काँके एक-दूजाऊँ परेम करबावाळो नेमा ने माने हे।

⁹जस्यान के, “थूँ कुकरम मती करज्ये, हत्या मती करज्ये, चोरी मती करज्ये, दूजाँ की चिजाँ को लोब मत करज्ये।” अस्या हाराई नेम अन ज्यो नेम बचग्या हे, वीं हाराई ईं आग्या में आ जावे हे के, “थूँ दूजाऊँ भी थाँरे जस्यानीस परेम राक।”

¹⁰जद्याँ थाँ कणीऊँ परेम करो हो, तो थाँ वाँको बुरो ने छावो हो। परेम करबावाळो हाराई नेमा ने माने हे।

¹¹टेम ने देकता तका थाँ अस्यान करो, काँके थाँ जाणग्या हो के, नींदऊँ जागबा की टेम आगी हे। अन जद्याँ आपाँ विस्वास किदो हो, वीं टेमऊँ का हस्याबूँ आपणो छुटकारो अबाणू हेलो नके हो।

¹²रात वेबावाळी हे अन दन उगबावाळो हे। ईं वाते आवो, अंदारा का काम करणा छोड़ दा अन लड़बा का वाते उजिता का हत्यार लीला।

¹³तो काँ ने आपाँ भी वणी तरियाऊँ रेवा, जस्यान मनक दन का उजिता में रेवे हे। ने तो खा-पीन धुत रेबावाळा का जस्यान, ने कुकरम, लुचापणा करबावाळा की तरियाँ अन ने लड़बावाळा का जस्यान अन ने रिस्याँ बळबावाळा का जस्यान।

¹⁴पण परबू ईसू मसी का हाव-भाव ने धारण करलो, अन आपणाँ पापी वेवार ने अन मन की मरजी ने काबू में राको।