Read Mewari रोमियों 16 Bible Online

रोमियों 16 - Mewari bible

रोमियों 16

¹मूँ किंकरिया की मण्डली की सेवा करबावाळी आपणी बेन फीवे का वाते थाँकाऊँ सिफारीस करूँ हूँ

²के, थाँ वींकी ईं तरियाऊँ आवभगत करज्यो, जणी तरियाऊँ परमेसर का मनकाँ की किदी जावे हे। वींने थाँकाऊँ ज्या भी मदत छावे, वाँ मदत वींने दिज्यो, काँके वणी घणा मनकाँ की मदत किदी अन मारी भी मदत किदी।

³ईसू मसी में मारा हाते काम करबावाळी प्रिस्किला अन अक्‍विला ने मारो नमस्कार केज्यो।

⁴मारो पराण जीव बंचाबा का वाते वणा आपणो जीव भी दाव पे लगा दिदो हो, मूँईस ने पण जी यहूदी ने हे, वाँ मनकाँ की हारी मण्डळ्याँ भी वाँकी एसानबन्द हे।

⁵वाँके घरे भेळी वेबावाळी मण्डली ने भी मारो नमस्कार। मारो लाड़लो भई इपनितुस ने ज्यो एसिया में मसी ने अपणाबावाळो मेंऊँ पेलो मनक हे वींने मारो नमस्कार केज्यो।

⁶मरियम, ज्या थाँका वाते घणी मेनत किदी ही, वींने मारो नमस्कार।

⁷मारा हण्डाळ्याँ यहूदी अन्द्रनीकुस अन युनिया ने जीं मारी हाते जेल में हा वाँने मारो नमस्कार। वीं खन्दाया तका चेला मेंऊँ जीं नामी हे अन ज्यो माराऊँ पेल्याँईं मसी में आग्या हा।

⁸परबू में मारा लाड़ला भई अम्पलियातुस ने मारो नमस्कार।

⁹मसी में मारी हाते काम करबावाळा उरबानुस अन मारा लाड़ला भई इस्तुखुस ने मारो नमस्कार।

¹⁰मसी में खरा अपिल्‍लेस ने मारो नमस्कार। अरिस्तुबुलुस का परवार ने नमस्कार।

¹¹यहूदी हण्डाळ्याँ हिरोदियान ने मारो नमस्कार। नरकिस्सुस का परवार का वणा मनकाँ ने नमस्कार जीं परबू में हे।

¹²त्रुफेना अन त्रुफोसा ने ज्यो परबू को काम का वाते घणी मेनती करबावाळी हे, वाँने मारो नमस्कार। मारी लाडली परसिस ने, जणी परबू में घणी मेनत किदी हे, वींने मारो नमस्कार।

¹³परबू का चुण्यो तको रूपूस अन वींकी बई ज्या मारी भी बई का जस्यान हे, वींने मारो नमस्कार।

¹⁴असुक्रितुस, फिलगोन, हिमास, पत्रुबास अन हिमास अन वाँका हण्डाळ्याँ भायाँ ने नमस्कार।

¹⁵फिलुगुस, युलिया, नेर्युस अन वींकी बेन अन उलुम्पास अन वाँका हाराई हण्डाळ्याँ पुवितर मनकाँ ने मारो नमस्कार।

¹⁶थाँ हात-जोड़न एक दूजाँ ने नमस्कार करिया करो। थाँने हारी मसी मण्डळ्याँ का आड़ीऊँ नमस्कार।

¹⁷हो मारा भायाँ, मूँ थाँकाऊँ अरज करूँ हूँ के, थाँने ज्या हिक मली, वींके खिलाप में थाँकामें फुट नाकबावाळा अन दूजाँ का विस्वास ने बगाड़बावाळाऊँ छेटी रेज्यो।

¹⁸काँके अस्या मनक आपणाँ परबू मसी की ने पण आपणाँ पेट की सेवा करे हे। अन ईं आपणी मिटी-मिटी अन चापलूसी बाताँऊँ भोळा-भाळा मनकाँ ने भरम में नाक देवे हे।

¹⁹थाँकी आग्या मानबा को बखाण च्यारूँमेर वेरियो हे। ईं वाते मूँ थाँकाऊँ राजी हूँ। पण मूँ छावूँ हूँ के, थाँ भलई का वाते अकलवाळा बण्या तका रेवो अन बुरईऊँ अणजाण रेवो।

²⁰सान्ती देबावाळा परमेसर वेगोई सेतान ने थाँका पगा का रेटे नाक देई। आपणाँ परबू ईसू की दया थाँका पे वेवे।

²¹मारो हण्डाळ्याँ तिमुतियुस अन लुकियुस, यासोन, सोसिपत्रुस अन हण्डाळ्याँ यहूदी भायाँ का आड़ीऊँ थाँने नमस्कार।

²²मूँ तिरतियुस, जणीऊँ यो कागद लिकवायो ग्यो हे, मूँ भी परबू में थाँने नमस्कार केवूँ हूँ।

²³मारी अन हारी मण्डली की खातरदारी करबावाळा गयुस को थाँने नमस्कार। इरास्तुस ज्यो नगर को भण्डारी हे अन आपणाँ भई क्कारतुस को थाँने नमस्कार।

²⁵परमेसर की बड़ई वेवे। ईसू मसी का हव हमच्यार जिंको मूँ परच्यार करूँ हूँ, ईंके अन परमेसर को अबाणू परगट किदो ग्यो ईं भेंद जस्यान जिंको हाँच जुग-जुगऊँ हप्यो तको हे, वींके जस्यान परमेसर थाँने गाटा बणाबा में तागतवर हे।

²⁶पण जिंने हमेस्यान बण्या रेबावाळा परमेसर की आग्याऊँ परमेसर की आड़ीऊँ बोलबावाळा का लेकाँ का जरिये ज्यो यहूदी ने हे, वाँ हाराई मनकाँ में परगट करन बता दिदो ग्यो हे जणीऊँ वीं विस्वास करन आग्या माने।

²⁷ईसू मसी का जरिये बेस एकलोता ग्यान का समन्द परमेसर की मेमा जुग-जुग तईं वे। आमीन!