Read Mewari रोमियों 5 Bible Online

रोमियों 5 - Mewari bible

रोमियों 5

¹ईं वाते आपाँ आपणाँ विस्वास की वजेऊँ धरमी वेग्या हा, अणीऊँ अबे आपणो परबू ईसू मसी का जरियऊँ परमेसरऊँ मेल-मिलाप हे।

²विस्वास का वजेऊँ वणी आपाँने परमेसर की दया में जिंमें आपाँ बण्या तका हा, वीं तईं आपाँने पोंछा दिदा हे अन आपाँ परमेसर की मेमा की आस को गुमान करा हा।

³योईस ने, आपाँ तो अबकी टेम में भी गुमान करा हा। काँके आपाँ जाणा हा के, अबकी टेम धीरज ने जनम देवे हे।

⁴अन ईं धीरजऊँ परक्यो तको मनक खरो निकळे हे अन खराऊँ आस आवे हे।

⁵अन आ आस आपाँने निरास ने वेबा दे, काँके पुवितर आत्मा ज्यो आपाँने ज्यो दिदी गी हे, वींकाऊँ परमेसर को परेम आपणाँ मन में उन्दायो जावे हे।

⁶काँके आपाँ जदी कमजोर हा, तो वीं सई टेम पे मसी भगती करबावाळा ने हा का वाते बली वेग्या।

⁷अस्यो तो वेई ने सके के, कणी धरमी मनक वाते कुई जीव देबाने त्यार वेवे हे। पण वे सके कुई भला मनक का वाते जीव देबा का वाते त्यार वे भी जावे।

⁸पण परमेसर आपाँ पे वणी टेम आपणो परेम दिकायो के, जद्याँ आपाँ पापीईस हा, तो ईसू मसी आपणाँ वाते जीव दिदो।

⁹काँके अबे आपाँ वाँका लुईऊँ धरमी वेग्या हा, तो पछे मसी जरियऊँ परमेसर का गुस्साऊँ काँ ने बंचाया जावा?

¹⁰काँके जद्याँ आपाँ परमेसर का दसमण हा। तो परमेसर आपणाँ बेटा की मोतऊँ आपणो मेल-मिलाप खुदऊँ किदो। अन जद्याँ अबे आपणाँ मेल-मिलाप वेग्यो हे तो वाँका जीवनऊँ आपाँ काँ ने बंचाया जावा?

¹¹अतरोकीस ने पण अबे आपणो परबू ईसू मसी का मस परमेसरऊँ मेल-मिलाप व्यो हे अन भगती करन गुमान करा हा।

¹²जस्यान के एक मनक आदम का मस धरती पे पाप अन पापऊँ मोत अई अन वस्यानीस मोत हाराई मनकाँ पे अई हे काँके हाराई पाप किदो।

¹³नेमा के आबाऊँ पेल्याँई धरती पे पाप हो पण जटे कई नेम ने वेता, वटे पाप गण्यो ने जातो।

¹⁴पण आदमऊँ लेन मूसा का टेम तईं मोत हाराई पे राज करती री। मोत वाँका पे भी ही, जणा आदम के जस्यान पाप ने किदो हे। आदम आबावाळा का जस्यान को हो।

¹⁵पण परमेसर को वरदान आदम का पाप का जस्यान को ने हो। वरदान तो वणीऊँ घणी मान हे। एक मनक आदम का पाप की वजेऊँ घणा मनकाँ की मोत वीं हे, पण एक मनक ईसू मसी की दया की वजेऊँ मल्यो परमेसर की दया को वरदान घणा मनकाँ का वाते भरपूर हे।

¹⁶अन परमेसर को वरदान आदम का पाप का फळ का जस्यान ने हे। काँके दण्ड का वाते न्याव को आणो एक पाप का केड़े व्यो हे। पण ओ वरदान ज्यो पाप की मापी का आड़ी ले जावे हे, वो नरई पाप का केड़े आयो हे।

¹⁷काँके जद्याँ एक आदम का पाप की वजेऊँ मोत को राज आयो। तो परमेसर की भरपूर दया अन वाँका धारमिकता का वरदान ने लेबावाळा वणी एक मनक ईसू मसी का मस जीवन पे ओरी हेलो राज करी।

¹⁸जस्यान एक पाप की वजेऊँ हाराई मनकाँ पे दण्ड आयो, वस्यानीस एक धरम का काम की वजेऊँ हाराई ने अनंत जीवन देबावाळी धारमिकता मले हे।

¹⁹जस्यान एक मनक के आदेस ने मानबा की वजेऊँ घणा मनक पापी व्या, वस्यानीस एक मनक का आदेस मानबा की वजेऊँ घणा मनकाँ ने परमेसर सई ठेराई।

²⁰नेम ईं वाते आया हा के, पाप बड़ सके। पण जटे पाप बड़्यो, वटे परमेसर की करपा वणीऊँ ओरू भी हेली बड़ी।

²¹ताँके जस्यान मोत का जरिये पाप राज किदो, वस्यानीस आपणाँ परबू ईसू मसी का वजेऊँ अनंत जीवन लाबा का वाते परमेसर की दया धारमिकता का जरिये राज करे।