Read Mewari 1 कुरिन्थियों 12 Bible Online

1 कुरिन्थियों 12 - Mewari bible

1 कुरिन्थियों 12

¹हो भायाँ, मूँ ने छावूँ हूँ के, थाँ आत्मा का वरदानाँ का बारा में अणजाण रो।

²थाँ जाणो हो के, जद्याँ थाँ परमेसर ने ने जाणता हा, तो गूंगी मूरत्याँ के पाच्छे जस्यान चलाया जाता हा, वस्यान चालता हा।

³ईं वाते मूँ थाँने बतारियो हूँ के, ज्यो कुई परमेसर की आत्मा का आड़ीऊँ बोलबावाळा कुई भी ओ ने केवे के, “ईसू ने हराप लागे” अन ने कुई बना पुवितर आत्माऊँ के सके के, “ईसूइस परबू हे।”

⁴आत्मिक वरदान तो नरी तरियाँ का हे, पण एकीस आत्मा का हे।

⁵अन सेवा भी नरी तरियाँ की हे, पण आपाँ एकीस परबू की सेवा कराँ हाँ।

⁶काम-काज तो नरी तरियाँ का बताया ग्या हे, पण हाराई काम करबावाळा वीं परमेसर तो एकीस हे।

⁷हरेक विस्वासी मनकाँ में परमेसर की आत्मा कस्या न कस्यान परगट वेवे हे ज्यो हरेक की भलई का वाते वेवे हे।

⁸अन ईं आत्माऊँ किंने तो अकलऊँ बात करबा को अन वणीइस आत्माऊँ दूजाँ ने ग्यानऊँ बात करबा को वरदान दिदो जावे हे।

⁹अन ईं आत्माऊँ किंने तो विस्वास करबा का वाते वरदान अन किंने तो ईं आत्माऊँ हव करबा को वरदान दिदो जावे हे।

¹⁰अन किंने तो अचम्बा का काम करबा को अन किंने तो परमेसर का आड़ीऊँ बोलबा को वरदान, किंने तो भली-बुरी आत्माने जाणबा को वरदान, किंने तो अलग अलग बोली बोलबा को वरदान, किंने तो वाँ बोल्याँ को मतलब बताबा को वरदान दिदो जावे हे।

¹¹पण ईं हाराई काम एकीस आत्मा करे, ज्या एकीस हे अन वाँ जिंने छावे वाँने ईं वरदान बाँट देवे हे।

¹²जस्यान आपणी देह तो एकीस हे पण ईंमें नरई अंग हे अन ईं देह में नरई अंग अलग अलग व्या केड़े भी हाराई मलन एकीस देह हे वस्यानीस मसी भी हे।

¹³काँके आपाँ हाराई में पलई यहूदी वो, पलई ज्यो यहूदी ने हे वीं वो, पलई दास वो, पलई आजाद वे, आपाँ हाराई ने एकीस आत्माऊँ एकीस देह वेबा का वाते बतिस्मो दिदो ग्यो हे अन आपाँने एकीस आत्मा दिदी गी हे।

¹⁴जस्यान एक देह में एकीस अंग ने वेवे हे, पण नरई अंग वेवे हे।

¹⁵अन यद्याँ पग केवे के, “मूँ हात ने हूँ अन मूँ देह को ने हूँ”, तो कई वींके अस्यान केबाऊँ वो देह को कोयने?

¹⁶अन कान्दड़ो केवे के, “मूँ आँक ने हूँ ईं वाते मूँ देह को ने हूँ”, तो कई वींके अस्यान केबाऊँ वो देह को कोयने?

¹⁷अन यद्याँ हारी देह आक्याँइस वेती तो हूणता कस्यान? अन यद्याँ हारी देह कान्दड़ाइस वेता तो हूंगता कस्यान?

¹⁸पण परमेसर आपणी मरजीऊँ जस्यान छाया वस्यान आपणी देह में एक-एक अंग बणाया हे।

¹⁹अन यद्याँ हाराई अंग एकीस अंग वेता तो देह कस्यान वेती?

²⁰पण अंग तो नरई हे, देह एकीस हे।

²¹आँक हातऊँ ने के सके के, “मने थारी जरूत कोयने” अन ने मातो पगाँऊँ के सके के, “मने थाँकी जरूत कोयने।”

²²पण देह में अस्या भी अंग हे ज्यो दूजाँ अंगऊँ कमजोर हे पण वाँकी जरूत हेली वेवे हे।

²³अन आपणी देह में अस्या अंग हे ज्याँने आपाँने आदर ने देणो छावे, पण आपाँ वणा अंग की घणी परवा कराँ हाँ अन देह का वीं अंग ज्याँने आपाँ बताबा ने छारिया हा, वाँने आपाँ हिपाजतऊँ राका हाँ।

²⁴आपणाँ वणा दिकबावाळा अंग ने ढाँकबा की जरूत ने पड़े हे, पण परबू आपणी देह ने अस्यान बणई हे के, जणा अंग ने आदर की कमी हे वाँनेईस हेलो आदर मले।

²⁵जणीऊँ देह में फुट ने पड़े अन अंग एक दूजाँ में एक दूजाँ की देक-रेक करे।

²⁶ईं वाते यद्याँ देह में एक अंग दुक पावे हे तो वींके हाते हाराई अंग दुक पावे हे अन यद्याँ एक अंग की बड़ई वेवे हे तो हाराई अंग वींके हाते राजी वेवे हे।

²⁷अस्यान थाँ हाराई मलन ईसू मसी की देह हो अन थाँ हरेक वाँका अंग हो।

²⁸अन परमेसर की मण्डली में अलग अलग मनकाँ ने परमेसर अलग अलग रूप में चुण्या हे जस्यान के किंने खन्दाया तका चेला को रूप में, दूजाँ ने परमेसर का आड़ीऊँ बोलबा का रूप में, तीजा ने गरू का रूप में अन किंने तो अचम्बा का काम करबावाळा का रूप में अन किंने तो हव करबावाळा का वरदानाँ में, अन किंने मदत करबावाळा का रूप में अन किंने तो वेवस्ता करबावाळा का रूप में तो किंने तो अलग अलग बोली बोलबावाळा का रूप में चुण्या हे।

²⁹अबे थाँ बतावो के, कई हारई खन्दाया तका चेला हे? कई हारई परमेसर का आड़ीऊँ बोलबावाळा हे? कई हारई गरू हे? कई हारई अचम्बा का काम करबावाळा हे?

³⁰कई हारई ने हव करबा को वरदान मल्यो तको हे? कई हारई ने अलग अलग बोली में बोलबा को वरदान मल्यो हे? कई हारई ने अलग अलग बोली को मतलब बताबा को वरदान मल्यो हे? कदी ने!

³¹ईं वाते थाँ मोटाऊँ मोटा वरदानाँ ने पावाँ की धुन में रो। मूँ थाँने ओरुँ भी हव गेलो बताऊँ हूँ।