Read Mewari 1 कुरिन्थियों 13 Bible Online

1 कुरिन्थियों 13 - Mewari bible

1 कुरिन्थियों 13

¹यद्याँ मूँ मनकाँ अन हरग-दुताँ की बोली बोलूँ पण लोगाऊँ परेम ने करूँ, तो मूँ टन टन करतो तको पीतळ अन फालतू में बाजतो तको ढोल हूँ।

²अन यद्याँ मूँ परमेसर की बाताँ भी बता सकूँ अन मूँ हारोई भेद भी खोल सकूँ, हारोई ग्यान भी जाण जऊँ अन मने अटे तईं विस्वास भी वे के, मूँ मंगरा ने भी हरका सकूँ हूँ, पण परेम ने करूँ, तो मूँ कई भी ने हूँ।

³अन यद्याँ मूँ मारी हारी धन-दोलत गरीबा ने बाँट दूँ, अन मूँ हव-हमच्यार हुणाबा का वाते मारी देह ने बाळन बली दी दूँ अन पच्छे भी परेम ने करूँ तो मने कई नफो ने हे।

⁴काँके जिंमें परेम वेवे हे वो धिज्यो राके हे अन दया करे हे अन वो रिस्याँ ने बळे हे अन ओ खुद की बड़ई ने करे अन मेपणोऊँ मोटो ने वेवे हे।

⁵अन वो बुरी चाल कोयने चाले, अन वो खुद की भलई भी ने छावे, नेई पगई गुस्सा करे अन नेई किंकी बुरई को लेको राके,

⁶अन ने वो कूकरमऊँ राजी वेवे हे पण वो ओ हाँचऊँ राजी वेवे हे।

⁷वो हारी बाताँ ने सेण करे हे, अन हारी बाताँ पे विस्वास राके हे, अन हारी बाताँ की आस राके हे अन हारी बाताँ का वाते धीरज राके हे।

⁸परेम कदी भी टळे कोयने पण परमेसर का आड़ीऊँ बोलबावाळा को बोलणो खतम वे जाई, अलग अलग बोली में बोलबा को वरदान भी खतम वे जाई अन ग्यान भी खतम वे जाई।

⁹काँके आपणो ग्यान पूरो ने हे अन परमेसर का आड़ीऊँ बोलबावाळा की बाताँ भी पुरी ने हे।

¹⁰पण जद्याँ वो पूरो करबावाळो आई तो या कमी ने रेई।

¹¹काँके जद्याँ मूँ बाळक हो तो मूँ बाळक का जस्यान बोलतो हो, अन बाळक के जस्यान मारो मन हो, अन बाळक के जस्यान हमज ही। पण जद्याँ में मोटो वेग्यो तो में बाळक के जस्यान की बाताँ छोड़ दिदी।

¹²अबे तो आपाँने धूँदळा काँस में धूँदळो-धूँदळो दिके हे, पण वीं टेम आपाँ आमे-हामे देकाँ। ईं टेम मारो ग्यान पूरो ने हे पण वीं टेम पूरो वे जाई, जस्यान मूँ परमेसरऊँ ओळक्यो जाऊँ।

¹³पण अबे विस्वास, आस, अन परेम ईं तीनई टळे कोयने अन अणा हारईऊँ मोटो परेम हे।