Read Mewari 1 कुरिन्थियों 16 Bible Online

1 कुरिन्थियों 16 - Mewari bible

1 कुरिन्थियों 16

¹अबे वणी भेंट का बारा में ज्यो विस्वास्याँ का वाते भेळी कररिया हो। थाँ वस्यानीस करो जस्यान में गलातिया की मण्डली ने करबा का वाते क्यो हो।

²अन जद्याँ भी हपता को पेलो दन दितवार आवे थाँ थाँकी कमई मेंऊँ कईन कई थाँका घर में भेळा करता रेज्यो। जणीऊँ के, मूँ जद्याँ भी अऊँ थाँने दान भेळा करणो ने पड़े।

³अन जद्याँ मूँ थाँका नके पोचूँ तो जिंने भी थाँ छावो वाँने कागद देन थाँका दान ने वींका हाते यरूसलेम पूगा देऊँ।

⁴अन यद्याँ मारो जाणो वेई तो वीं मारा हातेईस जाई।

⁵मूँ मकिदुनिया वेता तको थाँका नके आऊँ, काँके मारो मकिदुनिया जाणो जरूरी हे।

⁶अन वे सके तो मूँ थाँका नकेईस ठम जाऊँ अन हियाळा में थाँका नकेईस रेऊँ, वींका केड़े जटने भी मारो जाणो वेई वटने जाबा का वाते थाँ जरूत का सामान हाते मने खन्दा दिज्यो।

⁷काँके मूँ थाँका नके आताई जाणो ने छारियो हूँ। पण मने आस हे अन यद्याँ परबू छाई तो मूँ थोड़ाक दन थाँका नके रेऊँ।

⁸पण मूँ पिन्तेकुस का तेवार तईं तो इपिसुस में रेऊँ।

⁹वटे परबू को काम करबा वाते ओ हव मोको हे अन वटे मारा दसमण भी नरई हे।

¹⁰जद्याँ थाँका नके तिमुतियुस आवे तो थाँ वींको ध्यान राकज्यो, ताँके वींने फिकर ने वेवे। काँके वो भी मारा जस्यानीस परबू को काम करे हे।

¹¹ईं वाते कुई भी वींने फोरो मती हमज्यो अन जद्याँ वो मारा नके आवे तो वींने गेला में जरूत की चिजाँ का हाते हिक देज्यो, काँके मूँ दूजाँ विस्वासी भायाँ का हाते वींकी आबा की बाट नाळरियो हूँ।

¹²अबे मूँ थाँने अपुलोस का बारा में कूँ हूँ, में वींने दूजाँ विस्वासी भायाँ का हाते थाँका नके आबा वाते क्यो हे, पण अबाणू वो थाँका नके आबा का वाते त्यार ने हे, पण जद्याँ भी वींने मोको मली तद्याँ वो थाँका नके आ जाई।

¹³थाँ ध्यानऊँ रेज्यो अन विस्वास में गाटा बण्या रेज्यो, थाँ हिम्मत राकबावाळा अन तागतवर बणज्यो।

¹⁴थाँ ज्यो कई भी करो वो परेमऊँ करज्यो।

¹⁵थाँ स्तिपनूस का घराणा का बारा में तो जाणो हो के, वीं अखाया में मसी पे विस्वास करबाबाळा पेला मनक हे। वणा परबू का भगताँ की सेवा करबा का वाते काम तोक्यो हे। ईं वाते ओ विस्वासी भायाँ मूँ थाँकाऊँ अरज करूँ हूँ,

¹⁶थाँ खुद ने वाँका हाताँ में हूँप दिज्यो जीं परबू का काम में जुड़या तका हे अन घणी मेनत हे।

¹⁷स्तिपनूस, फरतूनातूस अन अखईकूस का आबाऊँ मूँ घणो राजी हूँ, काँके ज्यो थाँ मारा वाते कर ने सक्या हो वो वणा करन बतायो हे, काँके थाँ मारा लारे ने हा।

¹⁸वणा मारी अन थाँकी आत्माने राजी किदी हे, ईं वाते थाँ अस्या मनकाँ को मान करज्यो।

¹⁹अन एसिया की मण्डली का आड़ीऊँ थाँने नमस्कार। अक्‍विला अन प्रिसकिल्‍ला अन वाँका घर में भेळी वेबावाळी मण्डली का आड़ीऊँ थाँने नमस्कार।

²⁰अन हाराई विस्वासी भायाँ का आड़ीऊँ भी थाँने नमस्कार एक-दूजाऊँ गळे मलन एक दूजाँ को आदर करज्यो।

²¹अन मूँ खुद पोलुस थाँने मारा हाताऊँ कागद को आकरी नमस्कार लिकूँ हूँ।

²²अन ज्यो कुई परबूऊँ परेम ने करी वींने हराप लागी। आपणाँ परबू वेगा आई!

²³परबू ईसू की दया थाँका पे वेती रेवे।

²⁴अन ईसू मसी में मारो परेम थाँका हाते बण्यो रेई।