Read Mewari 1 कुरिन्थियों 2 Bible Online

1 कुरिन्थियों 2 - Mewari bible

1 कुरिन्थियों 2

¹हो भायाँ-बेना, जद्याँ मूँ परमेसर का भेद को परच्यार करतो तको थाँका नके आयो, तो ने मोटी बाताँ काम में लिदी अन ग्यान ने बाँट्यो।

²काँके में ओ ते कर मेल्यो हो के, थाँका बचमें रेन मूँ ईसू मसी अन हूळी पे वीं वाँकी मोत की बात ने छोड़न ओरी कस्यी बात ने ने जाणूँ।

³ईं वाते मूँ कमजोरी का हाते दरपणीऊँ धूजतो तको थाँका नके आयो।

⁴अन मारा बचन अन मारा परच्यार में ग्यान की लोब वाळी बाताँ ने ही, पण वणामें परमेसर की आत्मा की तागत को सबूत हो,

⁵ताँके थाँको विस्वास मनकाँ की अकल पे ने पण परमेसर की तागत के भरोस्ये रेवे।

⁶जद्याँ मूँ हमजदार मनक में ग्यान की बाताँ को परच्यार करूँ हूँ, पण यो ग्यान ईं दनियाँ को कन हाकिमा के ग्यान का जस्यान ने हे ज्यो नास वेवे हे।

⁷पण आपाँ परमेसर का वीं भेद का ग्यान ने बतावा हा ज्यो मनकाँऊँ छाने हो, जिंने परमेसर सरुवातऊँ आपणाँ हाराई की मेमा का वाते ठेरायो हे।

⁸जिंने ईं दनियाँ का हाकिमा मूँ कणी ने जाण्यो, काँके जाणता तो मेमावान परबू ने हूळी पे ने चड़ाता।

⁹पण पुवितर सास्तर में लिक्यो हे, “जिंने आक्याँ ने देक्यो अन कान्दड़ा ने हुण्यो। जटा तईं मनकाँ की अकल कदी ने पोंछी अस्यी बाताँ परमेसर वणा मनकाँ का वाते बणई जीं परमेसरऊँ परेम करे हे।”

¹⁰पण परमेसर वणा भेद की बाताँ ने आपणी आत्माऊँ आपाँने परगट किदा, काँके आत्मा हाराई बाताँइस ने पण परमेसर का भेद की बाताँ भी जाणे हे।

¹¹मनकाँ की आत्मा का सिवा वाँका खुद का बच्याराँ ने कुई ने जाणे, वस्यानीस परमेसर की आत्मा के सिवा परमेसर का बच्याराँ ने कुई ने जाणे हे।

¹²पण आपाँ तो दनियाँ की आत्माने पई पण वाँ आत्मा पई हे, ज्याँ परमेसर आपाँने खुला मनऊँ दिदी हे, ताँके आपीं वणा बाताँ ने जाणा ज्यो परमेसर आपाँने दिदी हे।

¹³वणा बाताँ ने आपाँ मनकाँ की अकलऊँ हिकाया तका सबदाऊँ ने बोला पण आत्माऊँ हिकाया तका सबदाऊँ बोला हा, आत्मिक हाँच ने वणा मनकाँ ने बतावा हा जीं आत्मिक हे।

¹⁴पण देह को मनक परमेसर की आत्मा की बाताँ गरण ने करे, काँके वीं बाताँ वींकी देकणी में बेण्डापणा की बाताँ हे अन ने वो वाँने जाण सके हे काँके वाँ बाताँ की परक आत्मिक रितऊँ वेवे हे।

¹⁵आत्मिक मनक हारी बाताँ को न्याव करे हे पण वींको न्याव कुई ने कर सके।

¹⁶सास्तर में लिक्यो तको हे, “परबू को मन कूण जाण सके? वींने कूण सला दे सके?” पण आपाँ ईं बाताँ हमज सका हा, काँके आपाँ में मसी को मन हे।