Read Mewari 1 कुरिन्थियों 5 Bible Online

1 कुरिन्थियों 5 - Mewari bible

1 कुरिन्थियों 5

¹हाँची में मने बतायो ग्यो हे के, थाँ लोगाँ में कुकरम फेल्यो तको हे, अस्यो कुकरम ज्यो अधरम्याँ में भी ने मले हे के, एक मनक आपणी सोतेली बई का लारे कुकरम करे हे।

²अणी बात पे थाँ होक भी ने करो हो, थाँने ओ छावे के, थाँ अस्यो काम करबावाळो थाँका बचमेंऊँ निकाळ दो, पण थाँ तो मेपणो करो हो।

³मूँ तो देह का भावऊँ छेटी हो, पण आत्मा का भावऊँ थाँका हाते रेन, में अणा काम करबावाळा का विरोद में आपणो फेसलो अटूईस दे नाक्यो हे।

⁴जद्याँ थाँ आपणाँ परबू ईसू मसी की तागत का हाते आपणाँ ईसू मसी का नाम में भेळा वेवो तो मारी आत्मा भी वटे मोजुद वेई

⁵अन वणी मनक ने देह का नास का वाते सेतान ने हूँप्यो जाई, ताँके वींकी आत्मा परबू के पाच्छा आबा का दन बंचाई जाई।

⁶थाँको मेपणो करणो हव ने हे। कई थाँ ने जाणो के, “थोड़ोक हाज्यो हाराई गुद्‍या तका आटा ने हाज्यो कर देवे हे।”

⁷ईं वाते थाँ जूना हाज्या ने निकाळन ज्यो बुरा काम हे अणाऊँ, आपणाँ खुद ने पुवितर करो अन नुवो गुद्‍या तको आटो बण जावो, ताँके थाँ बना हाज्या का वो, काँके आपणाँ फसे को उन्यो ज्यो मसी हे, आपाँने पुवितर करबा का वाते बली व्यो हे।

⁸ईं वाते आवो आपाँ आपणाँ फसे का तेवार ने बुरई अन हूँगळापणाऊँ छेटी वेन जूना हाज्या की रोटीऊँ ने पण खरई अन हाँच का बना हाज्या की रोटीऊँ मनावा।

⁹में आपणाँ पेला कागद में लिक्यो हो के, थाँ कुकरमी मनकाँऊँ कई वेवार मती राकज्यो।

¹⁰मारा केवा को ओ मतलब ने हो के, थाँ ईं दनियाँ का कुकरमी, लोबी मनकाँ, ठगी मनकाऊँ, मूरत्याँ पूजबावाळाऊँ कई भी वेवार मती राको, अस्यो वेबा पे तो थाँने ईं दनियाऊँ जाणो पड़ जाई।

¹¹पण में ज्यो लिक्यो हो वो ओ हे के, कणी अस्या मनकऊँ वेवार मती राको ज्यो आपणाँ खुद ने मसी को विस्वासी केन भी कुकरमी, लोबी, मूरत्याँ पूजबावाळो, जूटी खबर देबावाळो, पीबावाळो, अन ठग वेवे। अस्या मनकाँ का हाते थाँ खाणो भी मती खावो।

¹²ज्यो अविस्वासी हे, मण्डळ्याँ का ने हे, वाँको न्याव करबा में मारो कई काम? कई थाँने वणाकोईस न्याव करणो छावे जीं मण्डळ्याँ का हे?

¹³पण अविस्वासी मनकाँ को न्याव परमेसर करे हे। सास्तर केवे हे, “थाँ बुरा मनकाँ ने आपणाँ बचमेंऊँ बारणे निकाळ दो।”