Read Mewari 1 कुरिन्थियों 6 Bible Online

1 कुरिन्थियों 6 - Mewari bible

1 कुरिन्थियों 6

¹आपणाँ हण्डाळ्याँ का हाते लड़ई वेबा पे थाँकामूँ कूण फेसला का वाते परमेसर का मनकाँ का नके ने जान कस्यान दनियाँ का मनकाँ का नके जाबा की हिम्मत करे हे?

²कई थाँ ने जाणो के, परमेसर का मनक दनियाँ को न्याव करी? जद्याँ थाँकाऊँ अणी दनियाँ को न्याव करियो जाई तद्याँ कई थाँ आपणी अतरी फोरी-फोरी बाताँ को न्याव करबा जोगा भी ने हो?

³कई थाँ ने जाणो के, आपीं दुताँ को न्याव करा? तो पछे अणी जीवन की बाताँ वींका हामे कई ने हे।

⁴यद्याँ थाँका बचमें कईन कई लड़ई-जगड़ो वेवे हे तो थाँ न्याव करबा का वाते बारला मनकाँ ने काँ चुणो ज्याँने मण्डली में कस्यी भी जगाँ ने दिदी जावे हे?

⁵थाँने सरम आणी छावे। कई हाँची में थाँकामूँ एक भी हूँस्यार ने ज्यो आपणाँ विस्वासी भायाँ को न्याव कर सके?

⁶कई एक भई कदी आपणाँ दूजाँ विस्वासी भई पे मुकदमो करे हे? पण थाँ तो आपणी बाताँ को फेसलो अविस्वासी मनकाँ नकूँ करारिया हो।

⁷पण हाँची में थाँ आपस में एक-दूँजा पे मुकदमो करो हो ज्यो थाँकी हार ने बतावे हे। अणीऊँ बड़िया तो ओ हे के, थाँ अन्याव ने सेण करलो अन थाँको घाटो वे जावे।

⁸थाँ तो खुद बुरो करो अन आपणाँइस मसी भायाँ ने लूटो हो।

⁹कई थाँ ने जाणो हो के, बुरा मनक परमेसर का राज का वारिस ने वेई? धोको मती खावो अन ने गलत वेवार करबावाळो बण, ने मूरताँ पूजो, ने कुकरम, ने मनक मनक का हाते हुगलो काम करे,

¹⁰ने चोरी करज्यो, ने लोब, ने दारुँड़ीया बणज्यो, ने खोट्याँ खाबावाळा, अन ने ठगबावाळा बणज्यो काँके अस्या परमेसर का राज का वारिस वेई।

¹¹अन थाँकामूँ करता तो अस्याईस हा, पण थाँ परबू ईसू मसी का नामऊँ अन आपणाँ परमेसर की आत्माऊँ धोया ग्या हो अन पुवितर वेन परमेसर का हामे सई ठेरिया हो।

¹²थाँकामूँ कुई के सके हे के, “हारी चिजाँ मारा वाते सई हे।” हा, पण हारी चिजाँ नफा की ने हे। “हारी चिजाँ मारा वाते सई हे,” पण मूँ कस्यी भी बात को गुलाम ने वेऊँ।

¹³क्यो जावे हे के, “खाणो पेट का वाते अन पेट खाणा का वाते हे।” पण परमेसर अणा दुयाँ ने खतम कर देई अन देह कुकरम का वाते ने हे, पण परबू की सेवा का वाते हे अन देह का वाते परबू वेवस्ता करे हे।

¹⁴अन परमेसर आपणी तागतऊँ परबू ईसू नेईस पाछो जीवता ने किदा पण वीं आपाँने भी पाच्छा जीवता करी।

¹⁵कई थाँ ने जाणो हो के, थाँकी देह खुद ईसू मसी का गट-जोड़ में हे? तो कई मूँ वाँने ज्यो मसी का अंग हे, वाँने कस्यी वेस्या का अंग बणऊँ मूँ कदी अस्यो ने करूँ।

¹⁶कई थाँ ने जाणो हो के, ज्यो कुई वेस्याऊँ संगती करे हे, वो वींका हाते एक तन वे जावे हे काँके सास्तर में लिक्यो हे के, “वीं दुई एक तन वेई।”

¹⁷अन ज्यो परबू की संगती में रेवे हे, वीं वींका हाते एक आत्मा वे जावे हे।

¹⁸कूकरमऊँ बंचन रेवो, काँके जतरा ओरी पाप मनक करे हे, वीं देहऊँ बारणे हे, पण कुकरम करबावाळा आपणी देह का विरोद मेंईस पाप करे हे।

¹⁹कई थाँ ने जाणो हो के, थाँकी देह पुवितर आत्मा को मन्दर हे, ज्यो थाँकामें बसी तकी हे अन थाँने परमेसर का आड़ीऊँ मली हे अन वाँ थाँकी खुद की ने हे। थाँ खुदऊँ ने पण परमेसर का हो।

²⁰काँके परमेसर थाँने किमत देन मोल लिदा हे। ईं वाते थाँ देहऊँ परमेसर की मेमा करो।