Read Mewari 1 कुरिन्थियों 8 Bible Online

1 कुरिन्थियों 8 - Mewari bible

1 कुरिन्थियों 8

¹अबे मूरताँ का हामे चड़ाया तका परसाद का बारा में आपाँ जाणा हा। आपीं हारई ग्यानवाळा हाँ अन ग्यान मेपणो पेदा करे हे, पण परेमऊँ हारई को भलो वेवे हे।

²यद्याँ कुई हमजे के, वो कई जाणे हे पण ज्यो वींने जाणणो छावे वो तो वो जाणे कोयने हे।

³पण यद्याँ कुई परमेसरऊँ परेम करे हे तो वींने परमेसर जाणे हे।

⁴ईं वाते मूरताँ का हामे चड़ई तकी चिजाँ ने खाबा का बारा में आपाँ जाणा हा के, मूरताँ को दनियाँ में कई वजूद ने हे अन ओ हे के, एक ने छोड़न कुई परमेसर ने हे।

⁵धरती अन आकास में नरई देवताँ केवावे हे, अन नरई परबू अन देवताँ हे।

⁶पण आपणाँ वाते तो एकीस परमेसर हे आपणाँ बापू। वणाईस हारी चिजाँ बणई हे अन वाँका वातेईस आपीं जीवा हाँ। परबू खाली एकीस हे, ईसू मसी। वाँकाऊँईस हारी चिजाँ वीं हे अन आपणो जीवन भी वाँकाऊँईस हे।

⁷पण ओ ग्यान हाराई का नके ने हे। नरई तो अबाणू भी मूरताँ की पुजा करे हे अन अस्यी चिजाँ खावे हे अन होचे हे के, जस्यान वीं चिजाँ मूरत्याँ को परसाद हे। ईं वाते वाँके अस्यान करबाऊँ वाँकी अंतर-आत्मा असुद वे जावे हे काँके वीं कमजोर हे।

⁸पण वो परसाद तो आपाँने परमेसर का नके ने लेजाई। यद्याँ आपीं ने खावा तो आपणो कई नकसाण ने वेई अन खावा तद्याँ भी आपाँने कई नफो ने वेई।

⁹पण ध्यान राकज्यो कटे, अस्यान ने वे के, थाँकी आ आजादी कणी कमजोर विस्वासवाळा मनक का वाते ठोकर को मस वे जावे।

¹⁰काँके यद्याँ कुई “थाँ ग्यानी” ने मन्दर में चड़ई तकी चिजाँ खाता देक ले अन वो कमजोर विस्वासवाळो मनक वे, तो कई वींका मन में मूरताँ का हामे चड़ई तकी चिजाँ खाबा को मन ने वे जाई?

¹¹अणी रितीऊँ थाँरा ग्यानऊँ वणी कमजोर विस्वासी मनक को नास वे जाई जिंका वाते मसी जान दिदी ही।

¹²ईं तरियाँ आपणाँ विस्वासी भायाँ का विरोद में पाप करता तका अन वणी कमजोर विस्वासवाळा मनक का मन ने दुक देता तका थाँ मसी का विरोद में पाप कररिया हो।

¹³ईं वाते यद्याँ वो खाणो मारा विस्वासी भई के ठोकर को मस बणे, तो मूँ कदी भी माँस ने खाऊँ अन नेई आपणाँ विस्वासी भई के पाप को मस बणूँ।