Read Mewari 2 कुरिन्थियों 7 Bible Online

2 कुरिन्थियों 7 - Mewari bible

2 कुरिन्थियों 7

¹हो मारा प्यारा भायाँ, आपणाँ नके परमेसर को दिदो तको करार हे। ईं वाते थाँ आवो, अन परमेसर को मान करता तका खुद ने पुवितर करबा का वाते खुद की आत्माने अन देह ने मयनेऊँ अन बारणेऊँ हुगली चिजाँऊँ पुवितर करो।

²थाँ थाँका हरदा में माँने जगाँ दिज्यो। माँ किंको भी कई ने वगाड़्यो हे, ने माँ किंका हरदा ने दुक दिदो हे अन ने माँ किंकोई कई नफो उटायो हे।

³मूँ ईं बाताँ थाँने नीचा दिकाबा का वाते ने केरियो हूँ, काँके का थाँ तो जणोईस हो के, थाँ माकाँ हरदा में बस्या तका हो अन अटे तईं के, माँ थाँ हाते जीवाँ अन मरबा का वाते त्यार रेवा हाँ।

⁴मूँ थाँका पे भरोसो करूँ हूँ। मने थाँका पे मेपणो हे। थाँ मने घणी हिम्मत दिदी अन माँकी दुक तकलिपाँ में भी मूँ थाँके वजेऊँ राजी-खुसी हूँ।

⁵जद्याँ माँ मकिदुनिया में ग्या हा तो भी माँने आराम ने मल्यो हो, पण माँने नरी तरियाऊँ दुक जेलणो पड़्यो हो, बारणे आड़ी तो हतावऊँ अन हरदा का मयने दरपणी की वजेऊँ दुक जेलणो पड़्यो।

⁶पण दन-दक्या मनकाँ ने सक सान्ती देबावाळा परमेसर तीतूस ने मारा नके खन्दान मारी हिम्मत बड़ई हे।

⁷अन वींके अटे आबाऊँ थाँ वींको हव आदर मानन वींने सक दिदो जणीऊँ माँने ओरी भी हेली हिम्मत मली। वणी माँने बतायो हो के, ज्यो थाँ किदो हो वींका वाते थाँ दकी हो अन थाँ माराऊँ मलबा का वाते कतरा आकताँ हो अन थाँ मारी चन्ता करो हो अस्यान हुणन माँने ओरू भी खुसी वीं।

⁸जद्याँ के में थाँने कागद लिकन दुक दिदो हे पण मने वींने लिकबा को नामेक भी दुक ने हे। जद्याँ के पेल्याँ मने ईं बात को दुक व्यो हो, पण अबे मने पतो हे के, वीं कागदऊँ थाँने थोड़ोकइस दुक व्यो।

⁹पण अबे मूँ राजी हूँ। मूँ अणी वाते राजी ने हूँ पण मूँ ईं बातऊँ राजी हूँ के, वणी दुक की वजेऊँ थाँ थाँका हरदा ने बदल्यो हे, अन थाँने वो दुक परबू का आड़ीऊँ व्यो हो, ताँके माँके वजेऊँ थाँको कई नकसाण ने वे।

¹⁰काँके ज्यो दुक परमेसर का आड़ीऊँ आवे हे वींको फळ मन फेरान लेन आवे हे अन जिंकी वजेऊँ दुक ने वेवे पण बंचाया जावाँ हाँ। पण ज्यो दुक दनियाँ की वजेऊँ मले हे, वो दुक मोत लेन आवे हे।

¹¹थाँ ओ देकज्यो, ज्यो दुक परमेसर की वजेऊँ थाँका पे आयो हो, वींकी वजेऊँ थाँ कतरा राजी व्या हो, अन ईंकी वजे ऊँइस थाँने अस्यी मनसा दिदी के, अबे थाँ खुद का बारा में के सको के, थाँको मन साप हे, गलत काम का विरोद में गुस्सो, परमेसर को मान करणो, माँकाऊँ मलबा की आगत अन पाप को न्याव करबा की भावना थाँकामें पेदा वीं हे। थाँ अस्यान करन ओ बता दिदो हे के, थाँ एकदम निरदोस हो।

¹²ईं वाते मारो थाँने कागद लिकबा को ओ मतलब ने हो के, मूँ थाँने बताऊँ के, कूण दोसी हे अन वींका बारा में के, किंका खिलाप में गुनो किदो ग्यो हे, पण ईं वाते लिक्यो हो के, परमेसर का हामे थाँने खुद पतो पड़ जावे के, थाँ माँकी करती मानो हो।

¹³अन ईं वजेऊँ माँने हिम्मत मली हे। मारी ईं हिम्मत का अलावा तीतूस को राजी वेबाऊँ माँ ओरू भी हेलो राजी व्या हा, काँके थाँकी वजेऊँ वींकी आत्माने चेन मल्यो हे।

¹⁴थाँका वाते जीं बाताँ बड़-चड़न किदी ही, वणी वाते मने हरमा ने मरणो पड़्यो, पण जस्यान माँ थाँने हाँची-हाँची क्यो हो, वस्यानीस थाँका बारा में, में मारो मेपणो तीतूस का हामे हाँच का हाते परगट किदो हे।

¹⁵वो जद्याँ ओ आद करे हे के, थाँ हाराई कस्यान वींकी आग्या मानी ही अन दरपऊँ धूँजता तका कस्यान वींकी आवभगत किदी ही, तो वींको परेम थाँका वाते ओरू भी हेलो बड़ जावे हे।

¹⁶मूँ राजी हूँ के, थाँका पे मूँ पूरो भरोसो राक सकूँ हूँ।