Read Mewari इपिसियों 6 Bible Online

इपिसियों 6 - Mewari bible

इपिसियों 6

¹ओ छोरा-छोरी, थाँ परबू का गट-जोड़ में हो, ईं वाते आपणाँ बई-बापू को केणो मानो, काँके ओ हव हे।

²“आपणी बई अन बापू को मान कर।” ओ पेलो हुकम हे जिंका हाते वादो भी हे।

³“ताँके थारो भलो वेई अन थूँ धरती पे नरई दन जीवतो रेई।”

⁴ओ बई-बापू, आपणाँ छोरा-छोरी ने रीस मती दो, पण परबू की हिक अन सई-गलत को फरक हमजाता तका वाँको पालण करो।

⁵ओ हाळयाँ, थाँ जस्यान मसी को हुकम मानो वस्यानीस धरती का मालिक को केणो दरपता अन धूँजता तका हाँचा मनऊँ मानो।

⁶मनकाँ ने खुस करबावाळा के जस्यान दिकाबा का वाते वाँकी सेवा-चाकरी ने करो, पण मसी का दास का जस्यान मनऊँ परमेसर की मरजी पे चालो।

⁷अन वाँकी सेवा-चाकरी ने मनकाँ की ने पण परबू की जाणन हाँचा मनऊँ करो।

⁸थाँ तो जाणो हो के, पलई हाळी वे कन पलई आजाद, परबू वाँने वणाके भला काम का जस्यान फळ देई।

⁹हो मालिक, थाँ भी धमकियाँ देणी छोड़न वाँका हाते वस्यानीस वेवार करो, काँके थाँ जाणो हो के, वाँका अन थाँको मालिक हरग में हे, अन वो किंकोई पकस ने लेवे।

¹⁰आकरी बात, परबू का गट-जोड़ अन वाँकी मोटी तागतऊँ ज्योरावर वेता रेवो।

¹¹परमेसर का हाराई हत्यार बांद लो, ताँके थाँ सेतान[1] की चाल को सामनो कर सको।

¹²काँके आपणो युद मनकाँऊँ कोयने पण आकास में रेबावाळा मोटा राजा, अदिकारियाँ, ईं अंदारा की दनियाँ में राज करबावाळी सगत्याँ अन हुगली आत्माऊँ हे।

¹³ईं वाते परमेसर का हारई हत्यार पेरलो के, थाँ बुरा दन में वाँका हामे ऊबा रे सको अन हारई पूरो करन अटल रेवो।

¹⁴ईं वाते हाँच का बेलपट्याऊँ आपणी कमर बाँदन, अन छाती को कवच पेरलो मतलब परमेसर का हामे सई करो,

¹⁵अन पगाँ में मोचड्याँ पेरलो, ज्यो मेल-मिलाप का हव हमच्यार का परच्यार करबा ने त्यार वेबा के जस्यी हे

¹⁶अन ईं हारई का हाते विस्वास की ढाल लेवो जणीऊँ थाँ सेतान की हारी हगलती तकी तीराँ ने बजा सको।

¹⁷अन उदार को टोपो, अन आत्मा की तरवार, ज्यो परमेसर का बचन हे, लिलो।

¹⁸हरेक तरियाँ की अरज अन विनती का हाते आत्माऊँ हर टेम परातना करिया करो। ईं मस जागता रेवो अन हारई पुवितर लोगाँ का वाते हरदाण अरज करता रेवो।

¹⁹अन मारा वाते भी अरज करज्यो, ताँके जद्याँ मूँ बोलूँ वीं दाण परमेसर मने अस्यो बचन देवे के, मूँ हिम्मत राकन हव हमच्यार को भेंद बता सकूँ।

²⁰अणी हव हमच्यार को परच्यार करबा का वाते मूँ हाकळाऊँ बंद्‍यो तको परमेसर को दूत हूँ। मारा वाते परातना करो के, जस्यान मने परच्यार करणो छावे, वस्यानीस मूँ बना दरपणीऊँ कर सकूँ।

²¹ मूँ कस्यान हूँ अन कई कररियो हूँ ईं हारी बाताँ परबू का विस्वास जोगो दास अन लाड़लो भई तुखिकुस थाँने बताई।

²²माकाँ हमच्यार जाणबा का वाते अन थाँकी हिम्मत बड़ाबा का वाते मूँ वींने थाँका नके खन्दारियो हूँ।

²³बापू परमेसर अन परबू ईसू मसी का आड़ीऊँ भायाँ ने सान्ती अन परेम, विस्वास का हाते मले।

²⁴ज्यो आपणाँ परबू ईसू मसीऊँ अमर परेम राके हे, वणा हाराई पे परमेसर की करपा वेती रेवे।