Read Mewari फिलिपियों 2 Bible Online

फिलिपियों 2 - Mewari bible

फिलिपियों 2

¹यद्याँ मसी थाँकी हिम्मत बड़ावे, वाँको परेम थाँने धिज्यो देवे, पुवितर आत्मा थाँके हाते रेवे, अन थाँ एक-दूँजा का वाते दया अन बाळ राको हो

²तो एकीस होच, एकीस परेम, एकीस मन अन एकीस मनसा राकन मारो आणन्द पूरो करो।

³खुद का हवारतऊँ कई मती करो अन जूटो मेपणो मती करो, पण नरमाईऊँ खुदऊँ हेला एक-दूँजा ने हव हमजो।

⁴थाँ हाराई खुद का ने पण दूजाँ का भला का बारा में होचो।

⁵थाँको होच-बच्यार ईसू मसी के जस्यान वेणो छावे।

⁶ईसू मसी हमेस्यान परमेसर का रूप में हा, पण परमेसर के बराबर रेवा की कदीई जिद ने किदी।

⁷ईंके बजाय वणी हारोई छोड़ दिदो अन एक दास को रूप धारण करन मनक बणग्यो। मनक बणन

⁸खुद ने नरम करन मोत वेबा तईं आग्या को पालण करतो रियो। अन अटा तईं के हूळी की मोत भी सेण कर लिदी।

⁹ईं वाते परमेसर वींने घणो ऊसो उटायो अन अस्यो नाम दिदो ज्यो हाराई नामाऊँ मोटो हे।

¹⁰ताँके हरग में अन धरती पे अन धरती का रेटे रेवे हे, वीं हारई ईसू का नाम ने मान देबा का वाते गोडा टेके हे।

¹¹अन बापू परमेसर की मेमा का वाते हारई ओ मान ले के, ईसू मसीइस परबू हे।

¹²ईं वाते ओ मारा लाड़ला भायाँ, जद्याँ मूँ थाँका हाते हो वीं दाण जस्यान थाँ मारी आग्या हरदाण मानता हा वस्यानीस अबे भी जदी मूँ छेटी हूँ वणीऊँ हेली आग्या मानता रेवो। थाँकी मुगती ने पुरी करबा का वाते, दरपता अन धूँजता तका मेनत करता रो।

¹³परमेसरइस हे ज्यो थाँका जीवन में काम कररिया हे ताँके थाँकामें वाँका मकसद ने पूरो करबा को मन अन तागत वेवे।

¹⁴हारई काम बना बड़बड़ान अन बना बेस करिया करता रेवो।

¹⁵ताँके थाँ ईं टेड़ी अन नसंगी हुगली पीड़ी का बचमें परमेसर का खरा, स्यवकार अन बना दोस का छोरा-छोरी वे जावो। थाँ अस्यी दनियाँ में तारा के जस्यान चमको,

¹⁶जद्याँ थाँ जीवन देबावाळा परमेसर का बचन ने लेवो, तो मसी का पाच्छा आबा के दन में मने बड़ई करबा को मस वे के, हव-हमच्यार ने फेलाबा को मारो काम अन मारी मेनत वल ने वी।

¹⁷थाँको विस्वास ज्यो परमेसर के चड़ी तकी बली अन सेवा के जस्यान हे, वींका वाते यद्याँ मने मारो लुई भी वेवाड़णो पड़े तद्याँ भी मूँ राजी हूँ अन थाँ हाराई का हाते खुसी मनाऊँ हूँ।

¹⁸वस्यानीस थाँ भी राजी रेवो अन मारा हाते आणन्द मनाओ।

¹⁹मने परबू ईसू में आस हे के, मूँ तिमुतियुस ने थाँका नके पगई खन्दाऊँ, ताँके थाँकी दसा हामळन मने सान्ती मले।

²⁰काँके माकाँ नके अस्यो कुई ने हे जिंका बच्यार मारे जस्यान का वे अन थाँकी भलई का वाते हाँचा मनऊँ चन्ता करे।

²¹काँके हारई आपणाँ हवारत की भाळ में रेवे हे, ने के ईसू मसी की।

²²थाँ ईं बात ने जाणो हो के, वणी ओ साबत किदो के वो ईंका वाते जोगो हे। जस्यान एक बेटो आपणाँ बाप का हाते काम करे हे, वस्यानीस वणी हव हमच्यार ने फेलाबा में मारा हाते एक दास के जस्यान काम किदो।

²³ईं वाते आस हे के, जस्यानीस मने नंगे पेड़ी के, मारा हाते जेळ में कई वेबावाळो हे, वस्यानीस मूँ वींने थाँका नके पगई खन्दा देऊँ।

²⁴अन मने परबू पे विस्वास हे के, मूँ खुद भी पगई आऊँ।

²⁵मूँ ओ जरूरी हमजूँ हूँ के, आपणाँ भई इपापरदितुस, ज्यो मारे हाते काम करबा अन लड़ई करबा में मारो हण्डाळ्यो हे। अन जरूत में मारी सेवा-चाकरी करबावाळो थाँका आड़ीऊँ खन्दायो तको दूत हे, वींने थाँका नके खन्दाऊँ।

²⁶वो थाँकाऊँ मलबा की वाट नाळरियो हे अन वो ओरी चन्ता में पड़ग्यो के, थाँ वींका बारा में हुण लिदो हे के, वो मांदो हे।

²⁷हाँची में वो मांदो वेग्यो हो अटा तईं के मरबा में हो, पण परमेसर वींपे दया किदी, अन बेस वींपेईस ने पण मारा पे भी किदी ताँके मूँ ओरी दकी ने वूँ।

²⁸ईं मस मूँ वींने खन्दाबा का वाते ओरू भी छावूँ हूँ के, थाँ वणीऊँ पाच्छी भेंट करन खुस वे जावो अन मारो भी दुक खतम वे जावे।

²⁹ईं वाते थाँ परबू पे विस्वास राकबावाळा भई के जस्यान वींकी आवभगत घणा आणन्दऊँ करज्यो अन अस्या मनकाँ को मान करिया करो।

³⁰काँके वो मसी का काम वाते आपणाँ जीव ने अबकी टेम में नाकन मोत का भड़े आग्यो हो, ताँके थाँकी ओरुँ ज्या कमी सेवा में रेगी ही वींने पुरी करे।