Read Mewari फिलिपियों 3 Bible Online

फिलिपियों 3 - Mewari bible

फिलिपियों 3

¹अबे मारा भायाँ, परबू में गट-जोड़ऊँ थाँ खुस रेवो। वणाईस बाताँ ने आकोदाण लिकबा में मने तो कई परेसानी ने हे, काँके ईं थाँकी रुकाळी करी।

²वणा गण्डकड़ाऊँ हेंचेत रेवो, ज्यो हव हमच्यार ने उलट पलट करन हिकावे हे। बुरा काम करबावाळा अन खतना पे जोर देबावाळाऊँ हेंचेत रेवो।

³हाँचा खतनावाळा तो आपींइस हा काँके परमेसर की आत्माऊँ वींकी भगती आपींइस करा हाँ अन आपीं आपणो भरोसो दिकबावाळा रिति-रिवाज पे ने पण ईसू मसी पे मेपणो राका हाँ।

⁴हाँ, मूँ भी अणा चिजाँ पे भरोसो राक सकूँ हूँ। यद्याँ कुई होचे के, माँ भी अणामें अतरो भरोसो राक सका हा तो मारा नके अणीऊँ भी हेलो राकबा का वाते नरी बाताँ हे।

⁵मूँ आट दन को व्यो अन मारो खतनो व्यो। मूँ इजराएल का बंस अन बिन्यामीन की गोत को हूँ। जनमजातऊँ इबरानी हूँ, जद्याँ मूसा का नेमा ने मानबा का बारा में केवो तो पको फरीसी हूँ।

⁶ज्योस का वाते यद्याँ केवो तो परबू का विस्वास्याँ ने हताबावाळो हो, अन जद्याँ मूसा का नेमा के जस्यान चालबा का वाते केवो तो खरो मनक हूँ।

⁷पण मूँ हमजूँ हूँ के, ज्यो ज्यो बाताँ मारा नफा की ही, वाँने अबे मूँ मसी का मस मारा वाते कई काम की ने हे।

⁸बेस अणा बाताँइस ने पण हारी बाताँ ने मारा परबू ईसू मसी ने जाणणो, ज्यो घणो मोटो हे, वींका हामे वल हमजूँ हूँ। वीं मसी का वाते में हारी चिजाँ ने छोड़ दिदी अन वाँने कचरो हमजूँ हूँ, ताँके मूँ मसी ने पाबा को नफो पा सकूँ

⁹अन मूँ वाँका हाते गट-जोड़ऊँ जी सकूँ। मूँ मूसा का नेमा को पालण करबाऊँ परमेसर का हामे सई ने हूँ, पण ईसू मसी पे विस्वास करबाऊँ परमेसर का हामे सई हूँ। अबे परमेसर केवे हे मूँ वाँका हामे सई हूँ, काँके मूँ विस्वास करूँ हूँ।

¹⁰मूँ मसी ने जाणणो अन वाँकी मरन जी उठबा की सगती ने मेसूस करणो छारियो हूँ अन वाँका दुक में भागी वेन वाँकी मोत में वाँके जस्यान वेणो छारियो हूँ।

¹¹ताँके मूँ खुद मरिया केड़े पाछो जी उठ सकूँ।

¹²ओ ने के, मूँ ईंने पा चुक्यो हूँ कन पाको वे चुक्यो हूँ, पण मूँ वीं ईनाम ने जीतबा का वाते कल्ड़ी मेनत कररियो हूँ, जीं मस ईसू मसी मने खुद का वाते जीत ग्या हा।

¹³ओ भायाँ, मारी आ मनसा कोयने के मूँ जीत चुक्यो हूँ, पण बेस ओ एक काम करूँ हूँ के, ज्यो बाताँ पाच्छे रेगी हे वाँने भूलन, आगे का चिजाँ ने पाबा का वाते कल्ड़ी मेनत कररियो हूँ।

¹⁴मूँ मकसद का आड़ी दोड़्यो जाऊँ हूँ, ताँके वो ईनाम पाऊँ ज्याँका वाते परमेसर मने ईसू मसी का गट-जोड़ में ऊपरे जीवन का वाते बलायो हे।

¹⁵ईं वाते आपाँ मूँ हाराई मोतबीराँ ने अस्याईस बच्यार राकणा छावे। यद्याँ कणी बात में किंको दूज्यो बच्यार वे तो परमेसर वाँने भी हमजा देई।

¹⁶पण परमेसर आपाँने ज्यो भी बतायो हे, वींके जस्यानीस आपाँ हाराई ने जीवणो छावे।

¹⁷हो भायाँ, थाँ हारई मारा जस्यान चाल चालो। अन वाँपे ध्यान दो ज्यो अस्यी चाल पे चाले जस्यान की चाल थाँ माकाँ में देकी ही।

¹⁸मूँ ईं बात ने पेल्याईं क्यो हो अन अबाणू भी रो-रोन केरियो हूँ के, नरई मनक आपणी रेणी-सेणीऊँ मसी की हूळी की मोत का दसमण हे।

¹⁹वाँको अन्त नास हे, काँके वाँको पेटईस वाँको परमेसर हे। जणा बाताँ पे वीं मेपणो करे हे वणा बाताँ पे वाँने हरम करणी छावे अन दनियाँ की चिजाँ पे मन लगान राके हे।

²⁰पण आपणो देस तो हरग हे अन आपीं आपणाँ बंचाबावाळा परबू ईसू मसी की वटूऊँ आबा की वाट नाळरिया हा।

²¹वो आपणी वीं ताकतऊँ हारई चिजाँ ने आपणाँ वंस में राके हे, वणीस ताकतऊँ आपणाँ कमजोर डील ने बदलन वाँकी मेमा का डील का जस्यान बणा देई।