Read Mewari फिलिपियों 4 Bible Online

फिलिपियों 4 - Mewari bible

फिलिपियों 4

¹ईं वाते हो मारा लाड़ला भायाँ, मूँ थाँने देकणा छारियो हूँ। थाँ मारी खुसी हो अन मने थाँका पे मेपणो हे। मारा लाड़ला भायाँ, वस्यानीस परबू में अटल रो।

²मूँ युदिया अन सन्तुके दुयाऊँ अरज कररियो हूँ के, परबू का गट-जोड़ का वाते एक मन रेवो।

³हे हाँचा हण्डाळ्याँ, मूँ थाँराऊँ भी अरज करूँ हूँ के, थूँ वीं लुगायाँ की मदत कर, काँके वणा मारा हाते हव हमच्यार हुणाबा का काम में, क्लेमेंस अन मारा दूजाँ काम करबावाळा का हाते मेनत किदी, ज्याँको नाम जीवन की पोती में लिक्यो तको हे।

⁴परबू का गट-जोड़ में हरदाण राजी रेवो, मूँ पाछो कूँ हूँ, राजी रेवो।

⁵थाँकी नरमाई हाराई मनकाँ का बचमें दिके। आद राको परबू को पाछो आणो नके हे।

⁶कणी भी बात की चन्ता मत करो पण थाँकी हारी अरज अन विनती धन्नेवाद का हाते परमेसरऊँ करता जावो।

⁷तद्याँ परमेसर की सान्ती, ज्यो हारी हमजऊँ बारणे हे, थाँका हरदा अन थाँका बच्याराँ ने ईसू मसी का गट-जोड़ में हमाळ राकी।

⁸आकरी में हो भायाँ, ज्यो ज्यो बाताँ हाँची हे अन ज्यो ज्यो बाताँ आदर करबा जस्यी हे अन ज्यो ज्यो बाताँ सई हे अन ज्यो ज्यो बाताँ ऊजळी हे अन ज्यो ज्यो बाताँ हुवावणी हे अन ज्यो ज्यो बाताँ हव गुण, बड़ई अन बड़िया हे वाँपे ध्यान लगाया करो।

⁹ज्यो बाताँ थाँ माराऊँ लिदी, हिकी, हूणी अन मारा में देकी वाँने मान्याँ करो, तद्याँ सान्ती देबावाळो परमेसर थाँका हाते रेई।

¹⁰मूँ परबू में घणो राजी हूँ के, अबे अतरा दनाँ केड़े थाँ मारा बारा में होच्यो हे। मूँ ओ ने कूँ के, थाँ मारा बारा में होचणो छोड़ दिदो हे। पण मूँ जाणूँ हूँ, थाँने ओ करबा को मोको ने मल्यो।

¹¹कणी कमी का मस मूँ अस्यान ने केरियो हूँ, काँके हरेक दसा में सबर राकणो में हिक लिदो हे।

¹²कमी-पेसी में अन भरपुरी में रेणो मूँ जाणूँ हूँ। यद्याँ मूँ भुको कन धाप्यो तको हूँ अन मारा नके हेलो कन कम हे, कस्यी भी जगाँ में अन कणी भी टेम में सबर राकबा को ओ भेद में हिक लिदो हे।

¹³मसीऊँ मली तकी तागतऊँ मूँ हारी टेम को सामनो कर सकूँ हूँ।

¹⁴कई भी वे थाँ मारा कळेस में मारी मदत करन हव किदो हे।

¹⁵हो फिलिपियों, थाँ खुदई जाणो हो के हव हमच्यार का परच्यार की सरुआत में मूँ जद्याँ मकिदुनिया परदेस छोड़न परोग्यो, तद्याँ थाँने छोड़न अन कणी विस्वास्याँ की मण्डली मारी रिप्या-कोड़ी में मदत ने किदी।

¹⁶काँके जद्याँ मने थिसलुनीके सेर में जरूत ही, तद्याँ थाँ नरी दाण मारी मदत किदी।

¹⁷ओ ने के, मूँ दानकी आस राकूँ हूँ, पण मूँ ओ छावूँ हूँ के, थाँका खाता में आसीस जुड़तो जावे।

¹⁸थाँ ज्यो खन्दायो हो वो मने मल्यो हे, वो मारा वाते नरोई हे। अबे ज्यो कई छारियो हे वो मारा नके हे। थाँ ज्यो खन्दायो हो इपापरदितुस मने दिदो हे। ईं चिजाँ परमेसर ने हव लागबा वाळी बली का जस्यान हे अन अणाने वीं माने हे अन अणीऊँ वीं राजी हे।

¹⁹मारा परमेसर आपणाँ मेमा भरिया धनऊँ ईसू मसीऊँ थाँकी हारी कमी ने पुरी करी।

²⁰आपणाँ बापू परमेसर की मेमा जुग-जुग तईं वेती रेवे। आमीन!

²¹हाराई, ईसू मसी का गट-जोड़ में रेबावाळा परमेसर का पुवितर मनकाँ ने मारो नमस्कार। ज्यो भई मारा हाते हे, वीं भी थाँने आद कररिया हे।

²²हाराई पुवितर लोग, खासकरन रोम का माराजा का मेल में काम करबावाळा थाँने आद करे हे।

²³आपणाँ परबू ईसू मसी की करपा थाँ हाराई की आत्मा का हाते रेवे।