Read Mewari 1 थिस्सुलुनिक्यों 1 Bible Online

1 थिस्सुलुनिक्यों 1 - Mewari bible

1 थिस्सुलुनिक्यों 1

¹मूँ पोलुस, सिलवानुस अन तिमुतियुस का हाते ओ कागद थिस्सुलुनिक्यों नगर की मण्डळ्या ने लिकरियो हूँ, जीं बापू परमेसर अन परबू ईसू मसी में हे, थाँका पे दया अन सान्ती बणी तकी रेवे।

²माँ माँकी परातना में थाँने हमेस्यान आद करन बापू परमेसर ने थाँका वाते धन्नेवाद देवा हाँ।

³बापू परमेसर का हामे थाँका विस्वास का काम ने, परेम का वाते घणी मेनत ने अन परबू ईसू मसी का पाच्छा आबा की थाँकी पाकी आस ने हमेस्यान आद करा हाँ।

⁴हो विस्वासी भायाँ, माँ ईं बात ने जाणा हाँ के, परमेसर थाँकाऊँ परेम राके अन थाँने वणा आपणाँ वाते चुण्या हे।

⁵ओ हव हमच्यार बेस बोली कोईस ने हे, पण तागत अन पुवितर आत्मा का हाते अन ईंकी हाँच की खरई का हाते थाँका नके पूग्यो हे। थाँ तो जाणोइस हो के, माँ थाँकी भलई का वाते थाँका हाते कस्यान रिया हा।

⁶थाँ घणा कळेसाँ में भी पुवितर आत्माऊँ मलबावाळा आणन्द का हाते बचन मानन माँके अन परबू का जस्यान चालबावाळा बणग्या हो।

⁷ईं वाते थाँ मकिदुनिया अन अखाया परदेस का हाराई विस्वास्याँ का वाते एक हिक देबावाळो नमुनो बणग्या हो।

⁸काँके परबू का बचन थाँका नकेऊँ मकिदुनिया अन अखाया मेंईस ने हुणायो ग्यो, पण ईं वजेऊँ परमेसर पे थाँका विस्वास की चरचा हारी जगाँ में फेलगी हे। ईं वाते माँने कई केवाँ की जरुतई ने पड़ी।

⁹काँके वटा का मनक खुद ईं माकाँ बारा में बतावे हे के, कस्यान माँ थाँका नके आया अन कस्यान थाँ मूरत्याँ ने छोड़न जीवता अन हाँचा परमेसर की सेवा करबा का वाते फरग्या हाँ।

¹⁰अन परमेसर का बेटा ईसू मसी के हरगऊँ पाच्छा आबा की वाट नाळता रेवो, जिंने वणा मरिया तका मेंऊँ पाच्छा जीवतो किदो हो, अन वींइस आपाँने परमेसर की आबावाळी रीसऊँ बंचावे हे।