Read Mewari 1 थिस्सुलुनिक्यों 3 Bible Online

1 थिस्सुलुनिक्यों 3 - Mewari bible

1 थिस्सुलुनिक्यों 3

¹ईं वाते थाँने देकबा का वाते माँ ओरी वाट ने नाळ सकता हाँ, तो माँ ओ ते किदो के, एतेंस नगर में एकला रे जावाँ,

²अन तिमुती ने ज्यो मसी का हव हमच्यार में मारो विस्वासी भई अन परमेसर को दास हे वींने थाँका नके खन्दावाँ जणीऊँ वो थाँने पाका करे अन विस्वास का बारा में हमजावे अन थाँकी हिम्मत बड़ावे।

³जणीऊँ दुक में थाँ पाच्छा भटक ने जावो। थाँ खुद ईं बात ने जाणो हो के, आपणाँ वाते दुक देकन भी कल्ड़ो रेणो परमेसर की मरजी कोईस एक भाग हे।

⁴काँके जद्याँ माँ थाँका नके हाँ, तो पेल्याँई थाँने बतायो हो के, माँने दुक मली अन वस्यानीस व्यो, ओ थाँ भी जाणो हो।

⁵ईं वाते जद्याँ माराऊँ ओरी ठमाव ने व्यो तो में थाँका विस्वास का हाल-चाल जाणबा का वाते वींने खन्दायो। परमेसर करे अस्यान ने वेणो छावे के, परकबा वाळी बाताँऊँ थाँ लाळच में आन मारो करियो-करायो काम बेकार तो ने कर दिदो।

⁶तिमुती थाँका नकेऊँ पाछो आन ज्यो मने थाँका विस्वास अन परेम को हमच्यार हुणायो अन ओ भी बतायो के, थाँ हमेस्यान माँने परेम का हाते आद करो हो अन जस्यान मारो मन थाँने देकबा ने करे हे वस्यानीस थाँको मन भी करे हे।

⁷ईं वाते हो भायाँ-बेना, थाँका विस्वास का हमच्यारऊँ माकाँ हाराई दुक में अन कळेस में माँने घणी हिम्मत मली हे।

⁸अबे माँकी काया होरी रेवे हे, काँके थाँ परबू में बण्या तका रेवो हो।

⁹अबे माँ थाँका वाते परमेसर ने धन्नेवाद दे सका हाँ। थाँकी वजेऊँ ज्यो आणन्द परमेसर हामे माँने मल्यो हे वणी वाते माँ वींको घणो धन्नेवाद देवाँ हाँ।

¹⁰माँ रात-दन वणीऊँ मनऊँ अरज कररिया हाँ के, थाँने देका अन थाँका विस्वास की कमी पुरी कराँ।

¹¹अबे आपणाँ बापू परमेसर अन परबू ईसू माकाँ वाते अस्यान को गेलो खोले के, माँ थाँकाऊँ आन मला।

¹²परबू करे, जस्यान माँको परेम थाँका वाते हे वस्यानीस थाँको परेम एक-दूँजा में अन हाराई मनकाँ का हाते रात-दन बड़तो जावे।

¹³जणीऊँ वो थाँका हरदा ने अस्यान पाका करी के, जद्याँ आपणाँ परबू ईसू हाराई पुवितर मनकाँ[1] का हाते आई तो थाँ बापू परमेसर का हामे निरदोस अन पुवितर वेवो।