Read Mewari 1 तिमुतियूस 2 Bible Online

1 तिमुतियूस 2 - Mewari bible

1 तिमुतियूस 2

¹अबे हाराऊँ पेली मूँ थाँकाऊँ हाता-जोड़ी करूँ हूँ के, अरज, परातना, विनती अन धन्नेवाद परमेसर ने हाराई मनकाँ का वाते दिदो जावे।

²राजा माराजा अन हाराई अदिकारियाँ का वाते परमेसरऊँ परातना किदी जावे, ताँके आपाँ सक-चेन अन सान्ती का हाते भगती अन खरईऊँ परमेसर वाते जीवन जी सका।

³अस्यान परातना करणी हव हे अन आपणाँ ने बंचाबावाळा परमेसर ने भावे हे।

⁴अन परमेसर छावे के, धरती का हाराई मनक बंचाया जावे अन वींका हाँच ने जाणे।

⁵काँके परमेसर एकीस हे अन परमेसर अन मनकाँ का बचमें बात करबावाळो भी एकीस हे, मतलब ईसू मसी हे, ज्यो खुद एक मनक हे।

⁶जणा आपणाँ खुदाखुद ने हाराई मनकाँ ने बंचाबा का वाते गारन्टी का रूप में दे दिदो, ताँके सई टेम पे ईं बात की गवई वे के, परमेसर हाराई ने बंचाणा छारिया हे।

⁷अन ईं गवई ने जी यहूदी ने हे वणामें हुणाबा का वाते मूँ एक हिक देबावाळा अन ईसू को थरप्यो तको चेलो बणायो ग्यो हूँ, ताँके विस्वास का सन्देस अन हाँच को हेलो पाड़ सकूँ। मूँ जूटो कोयने हूँ, मूँ हाँच बोलरियो हूँ।

⁸ईं वाते अबे मूँ छावूँ हूँ के, हरेक जगाँ मनक लड़ई-जगड़ो अन बुरा काम ने करे, पण आपणाँ हात-जोड़न परातना करिया करे।

⁹वस्यानीस मूँ लुगायाऊँ केवूँ हूँ के, हरम लाज अन धीरज का हाते हुदा-हादा गाबाऊँ खुद ने सजावे ने के फेंसी चोटी बणान होना अन मोती अन मेंगा गाबाऊँ सजावो,

¹⁰अस्यान की लुगायाँ ज्यो खुद ने परमेसर की दासी माने हे, वणा वाते योईस हव हे के, वीं खुद ने भला कामाँऊँ सजावे।

¹¹एक लुगई ने छानी-मानी रेन पुरी तरियाँ क्या में चालन हिक लेणी छावे।

¹²मूँ केवूँ हूँ, लुगायाँ आपणाँ धणी ने तो उपदेस देवे अन ने वींपे पे हक जमावे, पण छानी-मानी रेवे।

¹³काँके पेली आदम बणायो ग्यो अन पछे हवा बणईगी ही।

¹⁴आदम धोका में ने आयो, पण लुगई धोका में आन परमेसर का नेम तोड़न पापी बणगी।

¹⁵पण लुगायाँ बाळक जणन बंचगी, अन वाँने छावे के, वीं धीरज का हाते विस्वास, परेम अन खरईपणा में गाटी रेवे।