Read Mewari 1 तिमुतियूस 3 Bible Online

1 तिमुतियूस 3 - Mewari bible

1 तिमुतियूस 3

¹या विस्वास जोगी बात हे के, यद्याँ कुई मण्डली का परदान बणणा छावे हे, तो वीं घणी भली मरजी राके हे।

²एक मण्डली को परदान बना दोसवाळो वेणो छावे, वींके एकीस लुगई वे, खुद ने बंस में राकबावाळो, धीरज करबावाळो अन मरयादा में रेबावाळो, वो आपणाँ घर में अणजाण की भी आवभगत करे, वो हिकावाबाळा वेवे।

³वो दारू पियावाळो ने वेवे, लड़ई-जगड़ो करबावाळो ने वेवे, पण दयाऊँ भरियो तको अन सान्तीऊँ रेबावाळो वेणो छावे, वींको मन रिप्या-कोड़ी में ने वेवे।

⁴वो आपणाँ परवार की हार-हमाळ करबावाळो वेवे, अन वींका बाळक वींकी पूरो मान करे अन वींका क्या में रेवे।

⁵यद्याँ कुई मनक योई ने जाणे के, खुद का परवार की हार-हमाळ कस्यान वेवे, तो वो परमेसर की मण्डली की हार-हमाळ कस्यान कर सकी?

⁶वो विस्वास में पाको वेणो छावे, काँके कटे अस्यान ने वेवे के, वो सेतान के जस्यान मेपणो करन दण्ड पावे।

⁷वो अस्यान को मनक वेणो छावे जिंको मण्डली का अलावा दूजाँ मनक भी मान करे, ताँके वो बदनाम ने वेवे अन सेतान का जाळ में ने फसे।

⁸अणीस तरियाँ मण्डली का दास भी हाँचा अन हव वेवार का वेवे, वीं रिप्या-कोड़ी का भूका अन दारू पियावाळा ने वेवे।

⁹वीं विस्वास का हाँच ने सई मनऊँ बताबावाळा वेणा छावे।

¹⁰अणाने भी पेली मण्डली का परदान का जस्यान परक्या जाणा छावे जावे, यद्याँ अणामें कई दोस ने वे, तद्याँई अणाने मण्डली में दास का जस्यान काम करबा देणो छावे।

¹¹अणीस लुगायाँ भी हव वेवार की वेवे अन थाँरी मारी करबावाळी ने वेवे, ईं हूँस्यार अन हारी बाताँ में विस्वास जोगी वेणी छावे।

¹²मण्डली का दास के, एकीस लुगई वेवे अन वो आपणाँ बाळकाँ अन आपणाँ परवार ने सई तरियाऊँ चलाबावाळो वेवे।

¹³वीं दास ज्यो आपणो काम सई करे हे वीं खुद का वाते हव पद पाई अन वीं आपणाँ विस्वास का बारा में ज्यो ईसू मसी पे हे, वींने खुलन हिम्मत का हाते बोल सकी।

¹⁴मूँ जट थाँरा नके आन मलबा की आस राकूँ हूँ, पण अबाणू तो मूँ ओ कागद लिकरियो हूँ,

¹⁵पण यद्याँ मारा आबा में टेम लागी तो, ईं कागदऊँ जाण जाज्यो के, आपणाँ परमेसर को घराणो, जीं जीवता परमेसर की मण्डली हे या हाँच की नीम अन थम्बो हे, वींके हाते आपाँने कस्यान को वेवार करणो छावे।

¹⁶कुई ने नट सके के, आपणाँ धरम को भेद कस्यो मोटा हे, वो ज्यो मनक का रूप में परगट व्यो, पुवितर आत्मा जिंने धरमी बतायो, अन हरग-दुत जिंने देक्यो, देसा देसा में वींको परच्यार करियो ग्यो, दनियाँ में वींपे विस्वास करियो ग्यो, अन मेमावान हरग में उठा लिदो ग्यो।