Read Mewari इब्रानियों 1 Bible Online

इब्रानियों 1 - Mewari bible

इब्रानियों 1

¹परमेसर पुराणा टेम में आपणाँ आड़ीऊँ बोलबावाळा का जरिये नरई मोका पे नरी तरेऊँ आपणाँ बड़ाबाऊँ बाताँ किदी ही।

²पण अबे अणा आकरी दनाँ में परमेसर आपणाँ बेटा का जरिये आपाऊँ बाताँ किदी, अन वणीऊँस वणा ईं बरमाण्ड की रचना किदी। अन पछे वींने हारी चिजाँ पे अदिकारी बणायो।

³वो बेटो परमेसर की मेमा को उजितो हे अन जस्यान परमेसर का लकण हे, वस्यानीस वींका भी लकण हे। वो हारी चिजाँ ने आपणाँ जबरा बचनाऊँ हमाळी राके हे। मनकाँ का पापाँ ने माप करन वो हरग में जान मेमामय परमेसर का जीमणे पाल्डे बेटग्यो हे।

⁴वो ईं तरियाँ हरग-दुताँ मेंऊँ मोटो बणग्यो, जतरो वो वाँका नामऊँ मोटो हे, ज्यो वणी बापोती में पायो हे।

⁵काँके परमेसर हरग-दुताँ मेंऊँ किंने भी कदी अस्यान ने क्यो के, “थूँ मारो बेटो हे, आज मूँ थाँरो बाप बण्यो हूँ।” अन ने कदी वणी कस्या हरग-दुतऊँ यो क्यो के, “मूँ वींको बापू वेऊँ, अन वो मारो बेटो वेई।”

⁶अन पछे जदी परमेसर आपणी एकलोती ओलाद ने दनियाँ में खन्दावे तो वीं केवे हे के, “परमेसर का हाराई हरग-दुत वींकी भगती करे।”

⁷अन हरग-दुताँ का बारा में वीं अस्यान केवे हे के, “वीं आपणाँ हरग-दुताँ ने आत्मा अन आपणाँ दासा ने हगलती तकी वादी बणावे हे।”

⁸पण आपणाँ बेटा का बारा में केवे हे के, “हो परमेसर, थाँकी गादी हमेस्यान रेई, थाँ थाँका राज का मनकाँ पे न्याव का हाते राज करो।

⁹थूँ धरमीऊँ परेम अन आग्याने कोयने मानबावाळाऊँ दसमणी राकी। ईं वाते परमेसर, थाँरा परमेसर थने चुण्यो हे अन थने मान-समान को खुब आणन्द दिदो। थने थाँरा हण्डाळ्याऊँ घणो हेलो दिदो।”

¹⁰परमेसर यो भी केवे हे, “हो परबू, जद्याँ दनियाँ की सरुवात वेरी ही, तो थाँ धरती की नीम नाकी, अन हरग थाँका हाताँ की कारीगरी हे।

¹¹वी तो नास वे जाई, पण थूँ हमेस्यान बण्यो तको रेई। अन वीं हाराई गाबा के जस्यान जूना वे जाई।

¹²अन थूँ वाँने चादरा के जस्यान लपेटी, अन वी गाबा के जस्यान बदल जाई, पण थूँ जस्यो हे, वोईस हमेस्यान रेई, अन थाँरा जीवन को अन्त कदी ने वेई।”

¹³परमेसर कदी भी कणी हरग-दुत ने अस्यान ने क्यो के, “थूँ मारे जीमणे पाल्डे बेट जा, जद्याँ तईं मूँ थाँरा दसमणा ने, थाँरा पगाँ का बाजोट ने कर दूँ।”

¹⁴तो पछे हरग-दुत कई हे? कई वीं हाराई हरग-दुत छुटकारो पाबावाळा मनकाँ की सेवा करबा का वाते खन्दई तकी आत्मा ने हे?