Read Mewari इब्रानियों 10 Bible Online

इब्रानियों 10 - Mewari bible

इब्रानियों 10

¹मूसा का नेम तो आबावाळी बड़िया बाताँ की छाया को रूप हे। पण यो वाँको असली रूप ने हे। ईं वाते बली का रूप में हरेक साल चडावो चड़ायो जातो हो। अन वो चडावो परमेसर का नके आबावाळा मनकाँने कदी सिद ने करे हे।

²यद्याँ अस्यान वेतो तो वाँको चडावो चड़ाणो बन्द वे जातो। अन यद्याँ भगती करबावाळा एकीस दाण में हमेस्या का वाते पुवितर ने वे जाता, तो वाँको मन वाँने पाच्छा पापी ने ठेरातो।

³पण ईं चड़ावा हर साल वाँने वाँका पाप आद करातो हो।

⁴काँके ओ कदी ने वे सके के, बकरा को अन पाडो को लुई पापाँ ने माप कर सके।

⁵ईं वाते जद्याँ मसी ईं दनियाँ में आया हा तद्याँ वणा क्यो हो के, “थें बली अन चडावो कोयने छायो। पण थें तो मारा वाते एक देह ने त्यार किदी हे।

⁶थाँ ने तो होम बलीऊँ अन ने पाप बलीऊँ राजी वेवो हो

⁷तद्याँ में क्यो के, ‘किताब में मारा वाते जस्यान लिक्यो हे वस्यान, मूँ अटे हूँ। अन हो परमेसर, थाँकी मरजी ने पुरी करबा ने आया हूँ।’”

⁸काँके पेल्याँई के दिदो हे के, वो भेंट अन चडावो होम बली अन पापबली ने छायो अन ने वो अणाऊँ राजी वेवे हे। जद्याँ के सास्तर का नेम का हस्याबूँ तो ईं हाराई चडाया जावे हे।

⁹अन वो ओ भी केवे हे के, “मूँ अटे हूँ। अन हो परमेसर, थाँकी मरजी ने पुरी करबा ने आया हूँ।” अस्यान तो वो मसी का दूजाँ बलीदान ने लागू करे हे अन पेला पुराणा बलीदानाँ ने रद करे हे।

¹⁰ईं वाते परमेसर की वीं मरजीऊँ ईसू मसी की देह के एकीस दाण बलीऊँ आपाँ पुवितर किदा ग्या हाँ।

¹¹जद्याँ के याजक तो ऊबो वेन धारमिक सेवा करे हे अन एक अस्या बलीदान ने ज्यो पाप कदी ने माप कर सके, वींनेईस आकोदाण चड़ावे हे।

¹²पण ईसू मसी तो एक याजक का रूप में पाप का वाते एकीस दाण हमेस्यान का वाते बली वेन परमेसर का जीमणे हात आड़ी जान बेटग्यो।

¹³अन वो वणी टेमऊँ ईं बात की वाट नाळरिया हे के, वींका दसमण वींके पगा का बाजोट बणा दिदा जावे।

¹⁴काँके वणा एकीस दाण बली वेबाऊँ वाँने जी पुवितर किदा जारिया हे, वाँने हमेस्यान का वाते सिद कर दिदा।

¹⁵पुवितर आत्मा भी आपाँने याईस गवई देवे अन यो वणी पेल्याँई क्यो हे,

¹⁶“परबू केवे हे के, वणा दनाँ का केड़े मूँ ज्यो करार वाँकाऊँ करबावाळो हूँ वो ओ हे के, मूँ मारा नेम वाँका काळजा पे लिकूँ अन मूँ वाँके मन में ईं बाताँ नाकूँ।”

¹⁷ईंका केड़े वो अस्यान भी केवे हे के, “मूँ वाँका पाप ने अन वाँका बुरा करमा ने अबाणूऊँ लेन कदी आद ने करूँ।”

¹⁸अन अबे जद्याँ ईं बाताँ माप वेगी हे तो अबे पापाँ का वाते बली चड़ाबा की कई जरूत ने हे।

¹⁹हो भायाँ-बेना, अबे तो ईसू मसी का लुई वेवाड़ा की वजेऊँ आपाँने खास पुवितर जगाँ में जाबा का पूरो भरोसो वेग्यो हे।

²⁰वणी वीं परदाऊँ मतलब वींकी देहऊँ आपणाँ वाते एक नुवो जीवतो गेलो खोल दिदो हे।

²¹अन आपणाँ नके एक अस्यो मायाजक हे ज्यो हरग में परमेसर का घराणा को अदिकारी हे।

²²ईं वाते आवो, आपाँ हाँचा हिया, पूरा विस्वास, अन मन का बुरा दोस पे छीड़कावऊँ सुद करवान देह ने सुद पाणीऊँ धोवान परमेसर का नके जावा।

²³ईं वाते आवो, आपाँ जीं आस ने मान लिदी हे, वींने मजबुती का हाते ठामी राका, काँके जणी आपाऊँ वादो किदो हे वो विस्वास जोगो हे।

²⁴आपाँने ओ भी ध्यान राकणो हे के, एक दूजाँ ने परेम अन हव कामाँ में कस्यान धिज्यो बन्दा सका हाँ।

²⁵अन थाँ भेळा वेणो मती छोड़ज्यो। जस्यान के नरई मनकाँने तो भेळो ने वेबा की आदत पड़गी हे। पण आपाँने तो एक दूजाँ ने हमजाणा हे। जस्यान के, थाँ जाणो हो अन देको भी हो के, वो परबू को दन नके आरियो, जणीऊँ थाँने तो ओरुँ भी ईंने करणो छावे।

²⁶जद्याँ आपाँ हाँचो ग्यान लेबा का केड़े भी जाणता तका पाप करता रेवा हाँ, तो पाप ने धोवा का वाते कस्योई बलीदान ने बच्यो हे।

²⁷पण ईंका केड़े तो जोरदार न्याव वेणो अन धधकती तकी वादीईस वाट नाळरी हे, आ वादी परमेसर का दसमणा ने बाळ नाकी।

²⁸जद्याँ कुई मूसा का नेमाने मानबाऊँ नटे हे, तो वींके ऊपरे दया कोनी करी जावे अन दो कन तीन गवा की गवई देबा की वजेऊँ मार दिदो जावे हे।

²⁹थाँ होचो के, वो मनक कतरो दण्ड भोगी, जणी आपणाँ पगा का रेटे परमेसर का बेटा ने गूँन्दयो हे, अन वो वणी करार का पुवितर लुई जणीऊँ वो पुवितर किदो हो वो वींने एक अपुवितर मान्यो हे अन वणी दया करबावाळी आत्मा को भी अपमान किदो हे।

³⁰आपाँ वींने जाणा हाँ, जणी अस्यान क्यो हे के, “बदलो लेणो मारो काम हे अन मूँईस बदलो लेऊँ।” अन ईंका केड़े यो भी क्यो, “परबू आपणाँ लोगाँ को न्याव करी।”

³¹मनक को जीवता परमेसर का हात में पड़णो भयंकर बात हे।

³²थाँ वणा दनाँ ने आद करो, जद्याँ थाँने दकऊँ छुटकारो मल्यो हो, वीं टेम थाँ दुक जेलता तका अन घणा हताव में विस्वास में मजबूत बण्या रिया हो।

³³अन नरी दाण तो मनकाँ का मुण्डा आगे थाँकी बेजती कदी गी। थाँने हताया हा अन नरी दाण थाँ वणा मनकाँ की मदत किदी ज्याँका हाते अस्यान किदो ग्यो हा

³⁴थाँ केदी मनकाँ का दुक में भी दकी व्या हा। थाँ ओ जाणता हा के, थाँका नके अस्यान की दोलत हे ज्यो हव अन कदी नास ने वेई। ईं वाते थाँ थाँकी दोलत ने भी राजी वेन जब्त वेबा दिदी।

³⁵ईं वाते थाँ हिम्मत मती हारज्यो, काँके थाँने ईं बात की वजेऊँस मोटो फळ मली।

³⁶अन थाँने बरदास करणो छावे, ताँके थाँ परमेसर की मरजी ने पुरी करन मोटो फळ पा सको, जिंको परमेसर वादो किदो हो।

³⁷काँके पुवितर सास्तर में लिक्यो तको हे के, “अबे घणो कम टेम रेग्यो हे, जद्याँ वो आबावाळो परमेसर आई अन वो मोड़ो ने करे।

³⁸पण मारा धरमी मनक विस्वासऊँ जीवता रेई, अन यद्याँ वीं वणी गेलाऊँ पाच्छा फरी जाई तो मारो मन वाँकाऊँ राजी ने वेई।”

³⁹पण आपाँ वाकामूँ ने हा, ज्यो पाच्छा फर जावे हे अन नास वे जावा, पण आपाँ तो विस्वास राकबावाळा हा, ताँके आपणाँ जीव ने बंचाबा।