Read Mewari इब्रानियों 3 Bible Online

इब्रानियों 3 - Mewari bible

इब्रानियों 3

¹हो पुवितर भायाँ, थाँ ज्यो हरग का बलावा में भागीदार हो, वीं थरप्या तका अन मायाजक ईसू पे ध्यान लगावो, जिंने आपीं मानाँ हा।

²जस्यान परमेसर का काम में मूसो विस्वास जोगो हो, वस्यानीस ईसू भी, जिंने परमेसर थरप्यो हे, वो वाँका वाते विस्वास जोगो हे।

³काँके जस्यान घर बणाबावाळा ने घरऊँ हेलो मान दिदो जावे हे, वस्यानीस ईसू ने भी मूसाऊँ हेला मान के जोगो मान्यो ग्यो हो।

⁴हरेक घर ने कुई न कुई बणावे हे, पण परमेसर तो हारी चिजाँने बणाबावाळा हे।

⁵परमेसर का हाराई घराणा में मूसो एक सेवा करबावाळा के जस्यान विस्वास के जोगो मान्यो ग्यो। वो वीं बात का वाते गवा हो, जीं परमेसर का आड़ीऊँ बोली जाबावाळी ही।

⁶पण परमेसर का घराणा में मसी तो एक बेटा का रूप में विस्वास करबा के जोगो हे, अन यद्याँ आपाँ हिम्मत राका अन वीं आस पे विस्वास बण्यो तको राका हा, तो आपींइस वींको घराणो हा।

⁷ईं वाते पुवितर आत्मा केवे हे के, “यद्याँ थाँ आज परमेसर की अवाज हुणो।

⁸थाँ थाँका मन ने थाँका बड़ाबा का जस्यान गाटो मती करो। जस्यान थाँका बड़ाबा बगावत की टेम करता हा। जस्यान वणा परिकसा का दनाँ में जंगल में किदो हो।

⁹जटे थाँका बड़ाबा चालीस वरा तईं मारा काम देक्याँ तद्याँ भी मारा धीरज ने तरगास्यो अन परक्यो।

¹⁰ईं वाते मूँ वीं टेम की पिड़ीऊँ गुस्सा में रियो अन क्यो हो के, ‘अणाको मन हमेस्यान भटक्यो तको रेई, अन ईं मारो गेलो जाणेई कोनी।’

¹¹तद्याँ में गुस्सा में आन ईं होगन खादा हा के, ‘वीं कदी भी मारी रईम्बावाळी जगाँ में ने जा सकी।’”

¹²हो भायाँ, हूँस्यार रो, कटे थाँकामूँ किंके मन में बुरई अन अविस्वास ने आ जावे, ज्यो थाँने जीवता परमेसरऊँ छेटी कर दे।

¹³जद्याँ तईं यो आज को दन केवावे हे, तद्याँ तईं थाँ रोज एक दूजाँ ने धिज्यो बंदाता रेवो, ताँके थाँकामूँ कुई भी पाप का धोका में पड़न आपणो मन गाटो ने करे।

¹⁴यद्याँ आपीं अंत तईं आपणाँ पेला विस्वास में मजबूत रेवा हा, तो आपीं मसी में भागीदार वे जावा हा।

¹⁵जस्यान क्यो भी ग्यो हे के, “यद्याँ आज थाँ परमेसर की अवाज हुणो, तो आपणाँ मन ने गाटो मती करज्यो, जस्यान बगावत की टेम में किदो हो।”

¹⁶वीं कूण हा जणा हुण्यो अन बगावत किदी, कई वी वेईस ने हा, ज्याँने मूसे मिसरऊँ बंचान बारणे काड़्या हा।

¹⁷परमेसर चालीस वरा तईं कणा मनकाँ पे गुस्सा में रिया। कई वणापे ने जणा पाप किदो हो, अन वाँकी लासा काकड़ में पड़ी री ही।

¹⁸परमेसर किंका वाते होगन खादा हा के, वीं रईम्बावाळी जगाँ में ने जा सकी? कई वी वे ने हा, जणा वाँकी आग्या को पाळन ने किदो हो।

¹⁹ईं तरियाँ आपाँ देका हा के, वीं आपणाँ बना विस्वास के मस, रईम्बावाळी जगाँ में ने जा सक्या।