Read Mewari इब्रानियों 6 Bible Online

इब्रानियों 6 - Mewari bible

इब्रानियों 6

¹ईं वाते आवो, मसी की हिक की सरुआत की बाताँ ने छोड़न आपाँ पाका वेबा का वाते आगे बड़ता जावा। अन आपाँ सरुआत की हिक की नीम पाच्छी ने नाका, जस्यान के, मोत का आड़ी लेजाबावाळा कामाँऊँ मन फेरणो, अन परमेसर पे विस्वास करणो,

²अन बतिस्मा की हिक, माता पे हात मेलणो, मरिया तका को पाछो जी उटणो अन अंत को न्याव।

³यद्याँ परमेसर छाई, तो आपीं योईस कराँ।

⁴काँके जणा लोगाँ एक दाण उजितो पा लिदो हे, अन जणा हरग का वरदान को हवाद चाकी लिदो हे अन जीं पुवितर आत्मा का भागीदार वेग्या हे।

⁵अन परमेसर का हव बचन अन आबावाळा जुग की तागत को हवाद चाक लिदो हे।

⁶यद्याँ ईं मनक भटक जावे, तो अणाको मन फेरान पाच्छा परमेसर का गेला पे लाणा घणा अबका हे। काँके ईं परमेसर का बेटा ने आपणाँ वाते पाछो हूळी पे चड़ावे हे अन वींने परगट करन वींको अपमान करे हे।

⁷काँके वाँ जगाँ काँटा अन चारो पेदा करे हे तो बेकार हे अन वींने हराप दिदो जाबावाळो हे। आकरी में वींने बाळ दिदी जावे हे। पण परमेसर वीं जगाँ ने आसीस देवे हे ज्या बरका का पाणी ने सोक लेवे हे अन हाकबावाळा करसाण का नफा का वाते हव हाक पेदा करे हे।

⁹पण हो मारा भायाँ, माँ ईं बाताँ केवा हाँ, तद्याँ भी थाँका बारा में माँ अणीऊँ बड़िया बाताँ को भरोसो करा हाँ, जीं मुगती का बारा में हे।

¹⁰काँके परमेसर अन्यायी ने हे, के थाँका काम अन वीं परेम ने भुल जावे, ज्यो थाँ वींका नाम का वाते बतायो हे के, थाँ पुवितर लोगाँ की सेवा-चाकरी किदी अन कररिया हो।

¹¹पण माँ घणो छावाँ हाँ के, थाँकामूँ हरेक जणो अंत तईं पूरो मन लगान अस्यान करतो रेवे, ताँके थाँकी आस पुरी वे जावे।

¹²माँ यो ने छावाँ हाँ के, थाँ आळसी बण जावो, पण वाँके जस्यान चालो, जीं विस्वास अन धिज्या का हाते वणा चिजाँ ने पारिया हे, ज्याँको परमेसर वादो किदो हो।

¹³जद्याँ परमेसर अबरामऊँ वादो किदो हो, तद्याँ वणा खुदऊँ मोटो ओरी कुई ने हो, जिंका होगन खई सके। ईं वाते वणा आपणाँ खुद का होगन खान क्यो,

¹⁴“मूँ हाँची में थने घणी आसीस देऊँ अन थाँरा वंस ने बड़ातो जाऊँ।”

¹⁵अणी तरियाँ धीरज का हाते वाट नाळन अबराम वो पायो, जिंको परमेसर वादो किदो हो।

¹⁶मनक तो आपणाँऊँ कणी मोटा का होगन खावे हे अन वणीऊँ वाँके किदी तकी बात पाकी वेवे हे अन वणाके हाराई विवाद को फेसलो वेवे हे।

¹⁷परमेसर खुद का होगनऊँ वादा का वारिस ने या बात ओरी साप साप करणी छाया हा के, वीं आपणो बचन कदी ने टाळी। अस्यान वणा होगनऊँ वादा ने पको किदो।

¹⁸वाँको वादो अन होगन जीं कदी भी बदल ने सके हे अन ज्याँका बारा में परमेसर कदी जूट ने के सके हे। ईं वाते आपाँ ज्यो परमेसर का नके रकवाळी पाबा का वाते आया हे अन आपीं घणी हिम्मत राकन ज्यो आस आपणाँ हामें हे, वींने ठामी राका हाँ।

¹⁹वाँ आस आपणाँ जीवन का वाते अस्यो लंगर हे ज्यो एक जगाँ पाको हे ज्यो हाली ने सके हे। अन आपणी आस का वजेऊँ आपाँ अस्यान का हा, मानो आपाँ परमेसर की वीं जगाँ में पराग्या, जटे मायाजकइस जा सके हे, ज्या परदाऊँ ढाकी तकी हे।

²⁰जटे ईसू आपणाँ आड़ीऊँ आपाऊँ पेली पोछ्याँ हे। वीं मलिकिसिदक की रिती के जस्यान हमेस्यान का वाते मायाजक बणग्या।