Read Mewari इब्रानियों 8 Bible Online

इब्रानियों 8 - Mewari bible

इब्रानियों 8

¹ज्यो कई आपाँ केरिया हा, वणा मूँ खास बात तो या हे के, आपणाँ नके एक अस्यो मायाजक[1] हे ज्यो हरग में मेमावान परमेसर का गादी का जीमणा पाल्डे बेट्यो तको हे।

²वो वीं पुवितर जगाँ में सेवा कररियो हे ज्यो हाँचा तम्बू हे, जिंने कणी मनक ने, पण परबू बणायो हे।

³हरेक मायाजक ने ईं वाते चुण्यो जावे हे के, वो भेंट अन बली दुई चड़ावे। अन ईं वाते अणी मायाजक का वाते भी ओ जरूरी हे के, वींका नके भी चड़ाबा का वाते कई वेवे।

⁴यद्याँ वो ईं धरती पे वेतो, तो वो याजक ने वेतो, काँके अटे तो पेल्याई अस्या याजक हे, जीं मूसा का नेमा के जस्यान भेंट चड़ावे हे।

⁵जीं जगाँ पे वीं याजकपणा को काम कररिया हे, वो तो ज्यो हरग में हे वींकी नकल अन छाया हे। ईं वाते जद्याँ मूसो पुवितर तम्बू बणाबावाळो हो, तद्याँई वींने चेतावणी दिदी गी के, “ध्यान राकज्ये के, थूँ हरेक चीज वींके जस्यानीस बणाज्ये, जस्यान थने मंगरा पे बतई ही।”

⁶पण ज्यो सेवा को काम ईसू मसी ने मल्यो हो, वो वाँकी सेवा का कामऊँ भी ओरी बड़िया हे, काँके वो जणी करार को बिचोलियो हो, वो पुराणा करारऊँ बड़िया हे। अन नवो करार ओरी बड़िया वादाऊँ ठम्यो तको हे।

⁷यद्याँ पेला करार में कई खोट ने वेतो, तो दूँजा करार की जरुतई ने पड़ती।

⁸पण परमेसर ने वणा लोगाँ में खोट मल्यो। वणा क्यो, “परबू घोसणा करे हे, वा टेम आरी हे जद्याँ मूँ इजराएल का घराणाऊँ अन यहूदा का घराणाऊँ एक नवो करार करूँ।

⁹यो करार वस्यो ने वेई, जस्यो में वाँका पूरबजाँ का हाते किदो हो। जद्याँ मूँ वाँको हात पकड़न वाँने मिसर देसऊँ बारणे लायो हो। काँके परबू केवे हे, वीं मारी करार का विस्वास जोगा ने रिया। में वाँकाऊँ मुण्डो फेर लिदो हे।

¹⁰अबे परबू केवे हे के, ज्यो करार मूँ इजराएल का घराणाऊँ करूँ। अन ईंका केड़े परबू घोसणा करे हे, वाँके मन में आपणाँ नेम नाकूँ, वाँके काळजा पे मूँ वाँने लिक देऊँ। मूँ वाँको परमेसर वेवूँ अन वीं मारा मनक वेई।

¹¹पछे कुई भी मनक आपणाँ पड़ोसी ने अस्यान ने हिकाई अन कुई भी मनक आपणाँ भई-बन्दऊँ ने केई के, ‘थाँ परबू ने ओळको।’ काँके वीं हाराई फोरा अन मोटा मने जाणी।

¹²काँके मूँ वाँका बुरा कामाँ ने माप करूँ अन कदी वाँका पापाँ ने आद ने राकूँ।”

¹³नवो करार करन वणी पेला करार ने बेकार ठेरायो हे अन ज्याँ चीज पुराणी अन बेकार वे जावे हे, वींको खतम वेणो जरूरी हे।