Read Mewari याकूब 1 Bible Online

याकूब 1 - Mewari bible

याकूब 1

¹मूँ परमेसर अन परबू ईसू मसी को दास याकूब, इजराएल का बाराई गोताँ का विस्वास्याँ ने नमस्कार केवूँ हूँ, जीं पुरी दनियाँ वकरिया तका हे।

²हो मारा भायाँ-बेना, जद्याँ थाँ तरे-तरे की बाताँऊँ परक्या जावो, तो राजी रेज्यो,

³काँके थाँ अस्यान जाणो हो के, जद्याँ परक्यो जावे हे, तो थाँको विस्वास पाको वेवे हे अन थाँने सेण करबा की तागत मले हे।

⁴पण थाँ थाँका मयने धीरज ने आपणो काम पूरो करबा दो, जणीऊँ थाँ पूरा अन पाका वे जावो, अन थाँकामें कणी बात की कमी ने रेवे।

⁵पण जद्याँ थाँकामें किंने भी अकल की कमी वेवे तो, वो परमेसरऊँ मांगे, ज्यो बना तापड़्या खुला मनऊँ देवे हे, अन थाँने अकल दिदी जाई।

⁶पण जद्याँ थाँ विस्वासऊँ मांगो, तो सक मती करज्यो, काँके सक करबावाळो समन्द की लेराँ के जस्यान वेवे हे, वीं बेवे अन उछळे हे।

⁷अस्यान का मनक ने ओ ने हमजणो छावे के, वींने परबूऊँ कई मल जाई।

⁸वो मनक दो मन वाळो हे अन आपणाँ हाराई काम में अस्थिर हे।

⁹जी गरीब भई हे वीं मेपणा करे, काँके परमेसर वाँने ऊसे उटाया हे।

¹⁰अन अमीर भई भी मेपणा करे, काँके परमेसर वाँने नरम बणाया हे। काँके वाँने चारा का जस्यान एक दन बळन नास वेणो हे।

¹¹काँके सुरज को तावड़ा चारा ने बाल देवे हे। जणीऊँ वाँका फुल पता जड़ जावे हे अन वो बड़या ने दिके। अस्यान ईं अमीर मनक भी आपणाँ दोड़भाग का जीवन में एक दन नास वे जावे हे।

¹²वो मनक धन्न हे, ज्यो परक्यो जाबा की टेम में अटल रेवे हे, काँके वो परकबा का केड़े वो खरो मनक बणन, वो जीवन को मुकट पाई, जिंने परमेसर आपणाँ परेम करबावाळा ने देबा का वाते राक वादो कर मेल्यो हे।

¹³जिंने परक्यो जावे हे वींने अस्यान ने केणो छावे के, “परमेसर वींने परक्यो हे।” काँके ने तो बुरी बाताँऊँ परमेसर खुद परक्या जावे हे अन ने वो किंने परके हे।

¹⁴अन ज्यो भी परक्यो जावे हे वो खेचान बुरी मरजी में पड़ जाँने अन वींमें फसन परक्यो जावे हे।

¹⁵अन वाँ बुरी मरजी वींके मयने बड़न पाप करावे हे, जणीऊँ वो पाप मोत ने जनम देवे हे।

¹⁶ईं वाते हो मारा लाड़ला भायाँ-बेना, थाँ धोको मती खावो।

¹⁷काँके हाराई दान वरदान अन हव ईनाम उपरेऊँईस मले हे अन ईं उजिता का परमेसरइस देवे हे जणी हरग ने बणाया हे, ज्यो कदी बदल कोयने, अन वींमें बदलती दसा का वजेऊँ आबावाळी काळी छाया भी कोयने हे।

¹⁸वणी आपणी मरजीऊँ हाँच का बचनऊँ पेदा किदा हे जणीऊँ आपाँ वींकी बणई तकी दनियाँ में पेला फळ वेवा।

¹⁹हो मारा लाड़ला भायाँ, अणा बाताँ पे ध्यान लगावो के, थाँ हाराई हुणबा का वाते त्यार रेवो। बोलबा का वाते आगत मती करज्यो अन गुस्सो करबा का वाते आगता मती वेज्यो।

²⁰काँके मनकाँ को गुस्सो करणो परमेसर की धारमिकता कोयने लावे हे।

²¹ईं वाते हाराई असुद कामाँऊँ अन च्यारूँमेर की बुरईऊँ छेटी रेज्यो। पण धिज्यो राकबावाळा वेन परमेसर का बचन जीं थाँका मन में हे वाँने मानज्यो, ताँके वीं थाँकी आत्मा ने छुटकारो दे सके।

²²बचन ने खाली हूणबावाळा ईंस ने पण वींपे चालबावाळा भी बणो। जद्याँ थाँ खाली हुणबा वाळाईस हो, तो थाँ खुद ने धोको देरिया हो।

²³काँके जद्याँ कुई बचन हुणे हे, पण वींपे चाले कोयने, तो वो मनक वस्यान को हे, ज्यो आपणाँ मुण्डा ने हव तरियाऊँ काँस में देक हे।

²⁴अन वो हव तरियाऊँ देक्याँ केड़े वटेऊँ परो जावे हे अन वो वेगोई भुल जावे हे के, वो कस्यान को दिके हे।

²⁵पण ज्यो आजादी देबावाळी परमेसर की हिक पे ध्यान लगावे अन चाले हे, वो आपणाँ काम में आसीस पाई, काँके ज्यो वो हुणे हे वींने भूले कोयने अन जस्यान वो हुणे हे वस्यानीस वो करे हे।

²⁶जद्याँ कुई खुद ने भगत हमजे हे अन आपणी जीब ने काबू में ने राके हे तो वो खुद ने धोको देवे हे अन वींकी भगती कई काम की ने हे।

²⁷पण परमेसर का हामे खरी अन पुवितर भगती तो आ हे के, अनात अन विदवा के वाँके दुक सक में देक-रेक करे अन खुद पे दनियादारी को कळंक ने लागबा देवे।