Read Mewari 3 यहुन्ना 1 Bible Online

3 यहुन्ना 1 - Mewari bible

3 यहुन्ना 1

¹मूँ मण्डली को मुक्यो यहुन्नो, यो कागद गयुस ने लिकरियो हूँ। जणीऊँ मूँ हाँच पे चालबा की वजेऊँ घणो परेम करूँ हूँ।

²मारा प्यारा भई, मूँ परातना करूँ हूँ के, जस्यान थूँ आत्मिक बाताँ में आगे बड़रियो हे वस्यानीस हारी बाताँ में आगे बड़तो रे अन ताकड़े रे।

³जद्याँ थाँरा बारा में आपणाँ भायाँ मेंऊँ थोड़ाक जणा मने बतायो के, थूँ हाँच पे चाले हे अन हाँच ने माने हे, तद्याँ मूँ ओ हुणन घणो राजी व्यो।

⁴मने अणीऊँ हेली खुसी कणी भी बातऊँ ने वेवे के, मारा बाळक हाँच पे चाले हे।

⁵हे मारा प्यारा भई, थूँ आपणाँ विस्वासी भायाँ का नफा का वाते घणो करो हे। पलई वीं थाँरा वाते अणजाण काँ ने वेवे।

⁶ईं वाते तो वणा मण्डली का हामे थाँरा बारा में आ गवई दिदी हे के, थूँ वाँकाऊँ कस्यान को परेम राके हे। ईं वाते जद्याँ थूँ वाँने हिक देवे, तद्याँ अस्यान मदत करज्ये जस्यान परमेसर का मनक का हाते किदी जावे हे।

⁷काँके वीं मसी की सेवा करबा का वाते जारिया हे अन वणा जो विस्वास ने करे हे, वणा मनकाँऊँ मदत ने लिदी हे।

⁸ईं वाते आपाँ जी विस्वासी हाँ, आपाँने वाँकी मदत करणी छावे। जणीऊँ आपाँ भी वाँका हाते हाँच ने फेलाबा में भेळा वे सका।

⁹में एक कागद मण्डली ने भी लिक्यो भी हो, पण दियुत्रिफेस ज्यो नेतो बणणो छावे हे, वो माँ ज्यो कई केवा हाँ, वींने ने माने।

¹⁰ईं वाते जद्याँ मूँ आऊँ तद्याँ बताऊँ के, वो कई-कई करे हे। वो जूट बोल बोलन आपणाँ पे जूटा दोस लगावे हे अन वो योईस ने करे, पण भायाँ की आवभगत भी ने करे अन ज्यो कुई वाँकी आवभगत करणो भी छावे हे, तो वाँने वो करबा भी ने देवे अन वो वाँने मण्डली का बारणे काड़ देवे हे।

¹¹हे मारा भई, थूँ तो बुरई का ने पण भलई का गेले चालज्ये, काँके ज्यो भी मनक भलई करे हे, वो परमेसर को हे अन ज्यो बुरई करे हे, वो परमेसर ने कोयने जाणे हे।

¹²दिमेत्रियुस का बारा में जाणबावाळा हाराई वींका बारा में हव गवई दिदी हे अन ओ हाँच भी हे। माँ खुद भी वींकी गवई देवाँ हा। थाँ तो जाणोइस हो, मारी गवई हाँची हे।

¹³थने लिकबा का वाते तो मारा नके घणी बाताँ हे पण मूँ सई अन कलमऊँ ईं बाताँ ने लिकणो छावूँ हूँ।

¹⁴पण मने तो आस हे के, मूँ थाँराऊँ वेगोई मलूँ अन आपाँ आमे-हामे बेटन बाताँ करा।

¹⁵थने सक सान्ती मलती रेवे। थाँरा हाराई विस्वासी भई थने नमस्कार केवे हे अन थूँ भी वटा का हाराई विस्वासी भायाँ ने नाम ले लेन नमस्कार केज्ये।