Read Mewari परकासितवाक्य 19 Bible Online

परकासितवाक्य 19 - Mewari bible

परकासितवाक्य 19

¹ईंका केड़े मने हरग में घणा मनकाँ को एक हाते अवाज हुणई दिदी वीं जोरऊँ केरिया हा, “हलेलुय्या! परमेसर की मेमा वेवे! काँके छुटकारो, तागत अन मेमा वींइस देवे हे।

²वाँका हाराई फेसला हाँचा अन न्याव करबावाळा हे, काँके वणी वीं वेस्याँ को ज्या धरती का मनकाँ ने कुकरम करवाती अन वाँने वगाड़ती ही वींको न्याव करियो ग्यो हे, अन हातेई हाते आपणाँ दासा का लुई को बदलो लिदो ग्यो हे।”

³वीं पाच्छा जोरऊँ बोल्या, “हलेलुय्या! जुग-जुग तईं वीं मोटा नगरऊँ धूवो उटतो रेई।”

⁴वीं चोवीस पुरवज अन च्यारई जीवता जीव गादी पे बेट्या तका परमेसर के धोक लागन गीत गाबा लागा। “हलेलुय्या! वींकी जेजेकार हो। आमीन।”

⁵तद्याँ पाच्छी वीं गादीऊँ अवाज अई, “हो मनकाँ थाँ ज्यो परमेसरऊँ दरपो हो थाँ पलई फोरा वो पलई मोटा वींकी जे-जेकार करो।”

⁶ईंका केड़े में पाछो घणा हाराई मनकाँ की भीड़ की अवाज हूणी ओ अस्यान लागरिया हो जस्यान के पाणी की जरणा वे कन जस्यान वादळा की गाजबा की अवाज वेवे। वीं मनक गारिया हा, “हलेलुय्या! आपणाँ परबू परमेसर की जे हो! काँके सर्वसक्‍तिमान परमेसर राज करे हे।

⁷ईं वाते आवो आपाँ राजी वेन खुसी मनावा, अन वाँकी जे-जेकार करा, काँके उन्याँ की ब्याव की त्यारी पुरी वेगी हे अन वींकी बिदणी वीं सज-धज ने त्यार बेटी हे।

⁸वींने ऊजळा अन चमकण्यो मखमल पेरबा ने दिदो ग्यो हे। ओ मखमल परमेसर का पुवितर मनकाँ की धरम का काम ने दिकावे हे।”

⁹तद्याँ वणी हरग-दुत माराऊँ क्यो, “अस्यान लिक वीं मनक धन्न हे ज्यो उन्याँ का ब्याव का जीमणा में नुत्या ग्या हे।” वणी पाछो क्यो, “ईं बचन परमेसर का हाँचो बचन हे।”

¹⁰तद्याँ मूँ वींकी जे-जेकार करतो तको वीं हरग-दुत का आगे धोक लाग्यो। पण वणी माराऊँ क्यो, “अस्यान मती करे! काँके मूँ तो थाँरो अन थाँरी हण्डाळ्याँ का हाते परमेसर को दास हूँ। जणापे ईसू मसी की गवई देबा की जिमेदारी हे। थूँ परमेसर के धोक लाग, काँके ईसू मसी की गवई आगेवाणी की आत्मा हे।”

¹¹तद्याँ में हरग ने खुल्यो देक्यो अन वटे कई देकूँ हूँ के, एक धोळो घोड़ा हे। अन वींके ऊपरे ज्या सवार हे वो विस्वास जोगो अन हाँचो हे, काँके वो हाँच का हाते न्याव को फेसलो अन लड़ई करतो हो।

¹²वींकी आक्याँ वादी की भट्टी के जस्यान ही अन वींके माता पे घणा हारा राजमुकट हा अन वींपे एक नाम लिक्यो तको हो, जिंने वींने छोड़न कुई भी ने जाणतो हो।

¹³वणी लुई में भिज्या तका गाबा पेर मेल्या हा। अन वींको नाम “परमेसर का वसन” हो।

¹⁴धोळा घोड़ा पे सवार परमेसर की फोज वींके पाछे-पाछे वेरी ही। वणा पुवितर अन धोळा मखमल का गाबा पेर मल्या हा।

¹⁵पापी ने मारबा का वाते वींके मुण्डाऊँ एक तीकी तरवारऊँ बारणे निकळरी ही। वो लोड़ा की लाटी की जोर पे वाँका पे राज करी अन सर्वसक्‍तिमान परमेसर की गुस्सा की सुल में वाँने अस्यान गूंदी जस्यान अंगूर ने कुण्ड में गुँदे।

¹⁶वींकी जाँग अन वींका गाबा पे अस्यान लिक्यो तको हो, ओ राजावो को राजा अन परबू को परबू।

¹⁷ईंका केड़े मूँ कई देकूँ हूँ के, एक हरग-दुत सुरज का ऊपरे ऊबो हे। वो आकास में उड़बावाळा हाराई जनावर ने जोरऊँ अवाज देन क्यो, आवो अन परमेसर की जीमणा का वाते भेळा वे जावो,

¹⁸जणीऊँ थाँ राजावो को, सपायाँ को, तागतवर मनकाँ को, घोड़ा को अन वणापे सवार मनकाँ को, फोरा को मोटा को, दासा को छुटकारो पाया तका मनकाँ को माँस खा सको।

¹⁹तद्याँ में वणी डरावणा जनावर ने अन धरती पे राज करबावाळा राजा ने देक्या। वाँके हाते वाँकी फोज भी ही। वीं वणी धोळा घोड़ा पे सवार अन वींकी फोजऊँ लड़बा का वाते भेळा वेग्या हा।

²⁰वीं डरावणा जनावर ने अन वींके हाते जूटी आगेवाणी करबावाळा जी हेन्याण चमत्कार बतान वणा मनकाँ ने ज्यापे वीं जनावर की मोर लगई ही अन वींकी मूरत ने पुजा करता हा, वाँने पकड़ लिदा। वणा दुया ने वीं वादी की बळता तका नरक का कुण्ड में जीवताई नाक दिदा ग्या।

²¹धोळा घोड़ा पे सवार का मुण्डाऊँ ज्या तरवारऊँ निकळरी हे वणीऊँ वाँकी फोज मार दिदी गी। वाँकी लास का माँस ने जीव-जनावर पेट भरन खादो।