Read Mewari परकासितवाक्य 4 Bible Online

परकासितवाक्य 4 - Mewari bible

परकासितवाक्य 4

¹ईंका केड़े में देक्यो के हरग को बारणो खुल्यो हे अन वाँ अवाज जो मने पेल्याँ हुणई दिदी ही, रणभेरी की अवाज में बोलरी ही के, “ऊपरे अई जा, मूँ थने वीं बाताँ बताऊँ जीं आबावाळा टेम में पकी वेबावाळी हे।”

²अतराक में पुवितर आत्मा मारा पे कबजो कर लिदो। अन में देक्यो हरग में एक गाद्दी ही अन वींका ऊपरे कुई बेट्यो तको हो।

³ज्यो वटे बेटो तको हो, वींको मुण्डो लाल मणी अन लाल हीरा का जस्यान चमकरियो हो, अन वींके च्यारूँमेर बादळा को धनुस हो, ज्यो हरा रंग का हीरा पन्ना का जस्यान लागरियो हो।

⁴वीं गादी का च्यारूँमेर चोवीस गाद्‍याँ ओरी ही, वाँके ऊपरे चोवीस पुरवज बेट्या तका हा। वणा धोळा गाबा पेरन मेल्या हा अन वाँके माता पे होना का मुकट हा।

⁵अन वीं गादी मेंऊँ विजळी अन वादळा के गाजबा की अवाज आरी ही। गाद्दी का हामे हात मसाळ चालरी ही, ईं मसाळ परमेसर की हात आत्मा हे।

⁶अन वीं गादी का हामें बिल्‍लोर का काँस का जस्यान दिकबावाळो समन्द हो। वीं समन्द का बचमें में अन गाद्‍याँ का च्यारूँमेर च्यार जीवता जीव हा, वाँके आगे-पाछे आक्याँ ईं आक्याँ ही।

⁷पेलो जीवतो जीव नार की जस्यान, दूजो बळद की जस्यान, तीजा को मुण्डो मनक की जस्यान हो अन चोतो उडता तका खुरसावणा का जस्यान हो।

⁸वणा च्यारई जीवता जीव के छे छे फाकड़ा हा, वाँके च्यारूँमेर आक्याँ ईं आक्याँ हे अन वीं रात-दन एकीस बात बोलता रेता हा, “सर्वसक्‍तिमान परबू परमेसर पुवितर, पुवितर पुवितर हे, ज्यो अबाणू हे, ज्यो हमेस्यान हो, ज्यो आबावाळो हे।”

⁹जद्याँ जीवता जीव गाद्‍याँ पे बेट्या तका, जीं अमर हे वींकी मेमा अन धन्नेवाद करता हा,

¹⁰तो वीं चोवीस पुरवज ज्यो गादी पे बेट्यो तको अमर हे, वींका पगा में धोक खान भगती कररिया हा, वीं आपणाँ मुकट उतारन बोलता हा के,

¹¹“हो माकाँ परबू अन माकाँ परमेसर! थाँईस मेमा, अन मान अन सामरत जोगा हो, काँके थाँईस हारी चिजाँ ने बणई हे। थाँकी मरजीऊँईस हारी चिजाँ बणईगी हे अन जीवे हे।”