Read Mezquital_Otomi Nsan Marco 2 Bible Online

Nsan Marco 2 - Mezquital_Otomi bible

Nsan Marco 2

¹Ne mi thogui ꞌraya pa ra Jesu bi mengui pa Ncapernau, y ya ja̱ꞌi bi ꞌyøde gue xqui zøniꞌa̱ ja núꞌa̱ ra ngu habʉ xqui mihiꞌa̱.

²Hangue ꞌbestho ndunthi ya ja̱ꞌi bi ma habʉ mi ꞌbʉꞌa̱ y asta himbi ꞌñɛni gatho mbo ja ra ngu. Hangue ꞌra mi ꞌbaitho møte ra gosthi, y ra Jesu mi xipabi ra ma̱ca noya.

³Nepʉ bi zøhø ꞌraya ja̱ꞌi y goho de gueꞌʉ mbra ndude ꞌnara tsꞌonate.

⁴Y himbi za bi yʉtꞌiꞌʉ habʉ mi ꞌbʉ ra Jesu ngueꞌa̱ xqui muntsꞌini ndunthi ya ja̱ꞌi. Hangue bi bøxꞌʉ maña̱, bi xøꞌtsa ꞌnara xɛni de ra xʉngu pa bi ca̱ꞌma ra tsꞌonate co rá ꞌbebo asta habʉ mi ꞌbai ra Jesu.

⁵Nuꞌbʉ́ ra Jesu bi ba̱di gue nuꞌʉ́ xi mi ja yá jamfri hangue bi ꞌñemba ra tsꞌonate: ―Ma tꞌʉꞌi, dí punꞌaꞌi gatho ri tsꞌoqui.

⁶Ha mi huhni ꞌraya xahnate de ra ley, ne mi bensɛ njaua ja yá mfeniꞌʉ:

⁷“¿Hanja ma̱nga njabʉni gue ri ꞌñetꞌa Ajua̱? Ngueꞌa̱ hønsɛ Ajua̱ go gueꞌa̱ tsa da punga ya tsꞌoqui, y hinto maꞌna.”

⁸Pe ra Jesu ꞌbestho bi ba̱tho núꞌa̱ mi beñꞌʉ ne bi ꞌñembiꞌʉ: ―¿Hanja guí beñhʉ njabʉ?

⁹¿Ndaꞌa̱ maꞌna hinxá hñei pa ga xipa ra tsꞌonate: “Dí punꞌaꞌi ri tsꞌoqui”, o ga embabi: “ꞌBai, jʉxa ri mfidi ne ꞌyo”?

¹⁰Nde, pa gui pa̱hʉ gue Núꞌa̱ Toꞌo bi e bi Nja̱ꞌi pɛꞌtsa ra tsꞌɛdi ja ra ximhai pa da pumba yá tsꞌoqui ya ja̱ꞌi, ma ga øtꞌa njaua: Nuꞌbʉ́ bi ꞌñemba ra tsꞌonate:

¹¹―Dí xiꞌaꞌi, ꞌbai, jʉxa ri mfidi ne grí ma ri ngu.

¹³Nepʉ ra Jesu bi yo mengui ja ra ña̱nga ndehe ne ja bá muntsꞌini ndunthi ya ja̱ꞌi ne ja guehni bi xahniꞌʉ.

¹⁴Nepʉ bi ma de guehniꞌa̱, ne ꞌmɛfa bi hyanda ra Leví rá tꞌʉ ra Alfeo mi hudi ja rá mexa mi pɛ rá ꞌbɛfi dega ngʉxboja̱. Ne bi ꞌñembabi: ―Bá ehe tɛngagui. Nuꞌbʉ́ ra Leví bi ꞌmai bi dɛniꞌa̱.

¹⁵Ne ꞌnaꞌqui ra Jesu ne yá nxadi mi huhni ja rá ngu ra Leví mi ñungüi ya ꞌña̱tsa ngʉxboja̱ ne maꞌra ya tsꞌoja̱ꞌi toꞌo himi øtꞌe ngu núꞌa̱ ma̱nga rá ley ra Moise. Gatho mi huhuiniꞌʉ ngueꞌa̱ ndunthi de gueꞌʉ xqui dɛniꞌa̱.

¹⁶Nuꞌbʉ́ ꞌraya xahnate de ra ley ne ꞌraya fariseo núꞌʉ ya ja̱ꞌi toꞌo ntsꞌɛdi jamasu rá ley ra Moise, bi hyanda ra Jesu mi ñungüi ya ngʉxboja̱ ne núꞌʉ maꞌra ya tsꞌoja̱ꞌi. Hangue nuꞌʉ́ bi ꞌyambabi yá nxadi ra Jesu bi ꞌñembi: ―¿Hanja di ñungüi núyʉ ya ꞌña̱tsa ngʉxboja̱ ne núyʉ maꞌra ya tsꞌoja̱ꞌi?

¹⁸ꞌNara ꞌmiꞌqui mri ayuna yá nxadi ra Xuua ne yá nxadi ya fariseo, bi ꞌñehe ꞌraya ja̱ꞌi bi cꞌa̱ꞌtsa ra Jesu ne bi ꞌñembabi: ―¿Hanja nuyá nxadi ra Xuua ne yá nxadi ya fariseo di ayunaꞌʉ, pe nuri nxadigue hingui ayuna?

¹⁹Nuꞌbʉ́ ra Jesu bi ꞌñembabiꞌʉ: ―¿Ha gue dí ꞌñepi da ayuna nuya ja̱ꞌi toꞌo xa tsꞌohna ja ꞌnara ntha̱ti? Hina. Nuꞌʉ́ da ñuni xá hño ngueꞌa̱ ꞌbʉꞌʉ co núꞌa̱ toꞌo ma da ntha̱tui rá ꞌbɛhña̱. Mientra ꞌbʉꞌʉ co ra na̱vio hindí ꞌñepi da ayuna.

²⁰Pe ma da zø ra pa gue sta da̱mfriꞌʉ da tsꞌixa ra na̱vio, nuꞌbʉ́ ha̱, gueꞌbʉ da ayuna núꞌʉ yá amigoꞌa̱.

²¹Hindí ꞌñepi da ꞌbøꞌta ꞌnara zɛdutu co ꞌnara ꞌraꞌyo dutu, ngueꞌa̱ nura ꞌraꞌyo dutuꞌa̱ da gʉtꞌa nura zɛdutu y maꞌna da ntʉni.

²³ꞌNara sabdo ra pa dega tsaya ra Jesu bi thogui co yá nxadi ja ꞌraya hua̱hi, y nuyá nxadi bi mʉdi bi doca ya nga̱ha̱ dega trigo.

²⁴Hangue ya fariseo bi ꞌñemba ra Jesu: ―Ndi, ri nxadi thoca ya nga̱ha̱ gá trigo, y nubyá go ra pa dega tsaya, y ra ley ma̱ gue hinda tꞌøtꞌe njabʉ.

²⁵Nuꞌbʉ́ ra Jesu bi da̱di ne bi ꞌñena: ―¿Ha hinxcá hñeꞌthʉ núꞌa̱ bi ꞌyøtꞌa ra Davi ne núꞌʉ mi ꞌñoui núꞌbʉ mi zʉ ra thuhu y mi otho te da ziꞌʉ?

²⁶Nuꞌá̱ bi yʉtꞌa ja rá nija̱ Ajua̱ ne bi zi nuya thuhme xqui thuxni ja rá thandi Ajua̱, ne bi umba núꞌʉ toꞌo mi ꞌñoui pa da ziui. Y nuya thuhmeꞌʉ himrí ꞌñepi toꞌoraza da zi, hønsɛ ya macja̱. Bi tꞌøtꞌa njabʉ nuya paꞌʉ núꞌbʉ mrá nda̱macja̱ ra Abiatar. Y hingrá tsꞌoqui núꞌa̱ bi ꞌyøtꞌa ra Davi.

²⁷Nehe ra Jesu bi ꞌñembabiꞌʉ: ―Ra pa dega tsaya bi thutsꞌi pa rá hño ya ja̱ꞌi, hingo bi thoca ya ja̱ꞌi pa da ꞌmʉi ja rá hmanda ra pa dega tsaya.

²⁸Hangue Núꞌa̱ Toꞌo bi e bi Nja̱ꞌi ha̱ ra tsꞌɛdi pa da manda masque ra pa dega tsaya.