Read Mezquital_Otomi Nsan Luca 20 Bible Online

Nsan Luca 20 - Mezquital_Otomi bible

Nsan Luca 20

¹ꞌNara pa ra Jesu mi ꞌbʉi ja ra nda̱nija̱ mi zofo ya ja̱ꞌi de ra hoga ntꞌøde. Nepʉ bi zøhø ya nda̱ gá macja̱ ne ya xahnate de ra ley ne ya nda̱xjua nda̱.

²Nepʉ nuꞌʉ́ bi ꞌñembabi: ―Dí ne gui xicje toꞌo xuá mɛhnꞌaꞌi pa gui ꞌyøtꞌa nuya ya tꞌøtꞌeya, ne con te ma nsɛqui guí øtꞌa njabʉ.

³Nepʉ nura Jesu bi ꞌñembabi: ―Nequi ma ga anꞌahʉ ꞌnara ntꞌani:

⁴¿Toꞌo xqui umba ra tsꞌɛdi ra Xuua pa bi ꞌyøtꞌa ra sistehe? ¿Ha gue Ajua̱, o ya ja̱ꞌi?

⁵Nuꞌbʉ́ nuꞌʉ́ bi mʉdi bri ꞌñámbabi ꞌna ngu maꞌna ne bi ꞌñémbi: ―¿Te ga ma̱ñhʉbya? Nuꞌbʉ ga emfʉ gue Ajua̱ bi umba ra tsꞌɛdi, ma da ꞌñengaguihʉ: “Nuꞌbʉ́ ¿hanja hingá camfrihʉ?”

⁶Ha nuꞌbʉ ga emfʉ gue ya ja̱ꞌi, nuꞌbʉ́ nuꞌʉ́ da bø yá cuɛ ne da hyojʉ dega ncꞌahni, ngueꞌa̱ nuꞌʉ́ beni gue ra Xuua xqui mɛhna Ajua̱.

⁷Nuꞌbʉ́ nuꞌʉ́ bi ꞌñembabi gue himi pa̱di toꞌo xqui umba ra tsꞌɛdi ra Xuua pa mi øtꞌa ra sistehe.

⁹Nepʉ nura Jesu bi mʉdi bi xipa ya ja̱ꞌi ꞌnara ꞌbede ne bi ꞌñembabi: ―Mi ꞌbʉi ꞌnara ꞌñøhø xqui ga̱xa ndunthi ya ꞌbai gá obxi ja yá hua̱hi. Y de gueꞌa̱ bi umba nhyandi rá ua̱ꞌobxi ꞌraya hyanthua̱hi. Ha nuꞌá̱ bi ma de guehni gá ma ja maꞌna ra hai ndunthi ya pa.

¹⁰Nu mi zøhø ra pa pa da nja ra sofo de ya obxi, bi mɛhna ꞌnará ꞌbɛgo núꞌa̱ toꞌo mrá me ua̱ꞌobxi pa da ꞌyapabi núꞌa̱ mri ꞌñepabiꞌa̱. Pe ya hyanthua̱hi bi guui dega mfɛi núꞌa̱ ra ꞌbɛgo ne hinte bi umbabi.

¹¹Pe nura me ua̱ꞌobxi bi mɛhna maꞌna rá ꞌbɛgo, neheꞌa̱ bi tꞌøꞌtua ya ntsꞌoꞌmʉi ne bi juui dega mfɛi ne hinte bi tꞌumbabi nehe.

¹²Nepʉ bi mɛhna maꞌna, pe núꞌʉ ya hyanthua̱hi bi gʉ bi naꞌmbi asta bi zɛni ne bi guuiꞌʉ.

¹³Nepʉ nura me ua̱ꞌobxi bi bensɛ ja rá mfeni ne bi ꞌñena: “Xibya, ¿te ga øtꞌe? Ma ga pɛhna ma hma̱ca tꞌʉ, xa̱ma̱ nu stí hyandiꞌʉ gue go di gueꞌa̱ ma tꞌʉ, xa̱ma̱ da ꞌyøte.”

¹⁴Pe núꞌʉ ya tsꞌo hyanthua̱hi mi hyandua rá tꞌʉ ra me ua̱ꞌobxi bi zøhø, bi ꞌñémbabiꞌʉ: “Nuni go guehni ma da gohui yá hai rá dada, pe ma ga jʉhʉ ga hohʉ pa go ga cohʉ gatho ya hai.”

¹⁵Hangue nuꞌʉ́ bi gʉ núꞌa̱ ra tꞌʉ ne bi pøni de ja ra hua̱hi ne bi hyoꞌʉ. Nuꞌbʉ́ ra Jesu bi ꞌyambabi ya ja̱ꞌi ne bi ꞌñembi: ―¿Te guí beñhʉ ma da ꞌyøtꞌa núꞌa̱ ra me ua̱ꞌobxi co núꞌʉ ya tsꞌo hyanthua̱hi?

¹⁶Nuꞌá̱ ma da ꞌñehe ne da hyo gathoꞌʉ, ne da umbabi ya hai maꞌra ya hyanthua̱hi. Nu mi ꞌyøde njabʉ gatho ya ja̱ꞌi bi ꞌñena: ―¡Xa̱ma̱ Ajua̱ hinda hopi da njabʉ!

¹⁷Nepʉ ra Jesu bi hyandiꞌʉ ne bi ꞌñembabi: ―Nuꞌbʉ́, ¿te ne da ma̱ núꞌa̱ huxa ja ra Ma̱ca Tꞌofo habʉ ena njaua?:Núꞌa̱ ra do bi føtbʉ hma̱ha̱ ꞌna lado nuya hyøngu,nubya gueꞌa̱ ra mʉdi do de rá nija̱ Ajua̱.

¹⁹Ya nda̱ gá macja̱ ne ya xahnate de ra ley xi mi nehma̱ xa gʉ ra Jesu nura oraꞌa̱, ngueꞌa̱ bi zo yá mfeniꞌʉ gue núꞌa̱ ra ꞌbede xqui ma̱ñꞌa̱, nuꞌá̱ xqui ma̱ pa gueꞌʉ, pe nuꞌʉ́ mi tsu ya ja̱ꞌi da bø yá cuɛ.

²⁰Hangue bi mɛhna ꞌraya ꞌyacate núꞌʉ mri ꞌñetꞌa hoja̱ꞌi, pa xa̱ma̱ xa ꞌyøde xa ña̱maꞌñʉ ra Jesu, pa njabʉ xa za xa ña̱pabi co ra gobierhnu.

²¹Hangue nuꞌʉ́ bi ꞌyøꞌtua ꞌnara ntꞌani ne bi ꞌñembabi: ―Ma zi Xahnateꞌihe, dí pa̱he gue nuꞌi guí ma̱ ne guí udi núꞌa̱ xá hño, ne hinguí huahna núꞌa̱ toꞌo guí øꞌtua ra hño, ngueꞌa̱ nuꞌi guí udi rá ꞌñu Ajua̱ núꞌa̱ majua̱ni.

²²Dí ne gui xicaguihe, ¿ha gue rí ꞌñepi ga juthe núꞌa̱ ra boja̱ adi ra nda̱ Cesa, o hina?

²³Pe ra Jesu mi pa̱tuatho yá tsꞌomfeniꞌʉ, bi ꞌñembabi: ―¿Hanja guí ne gui hyacaguihʉ?

²⁴ꞌÑutcahʉ ꞌnara boja̱ xa̱. ¿Toꞌo rá cꞌoi núna tøcua, ne toꞌo rá thuhuna̱? Nuꞌbʉ́ nuꞌʉ́ bi da̱di ne bi ꞌñembabi: ―Rá cꞌoi ne rá thuhu ra nda̱ Cesa.

²⁵Nuꞌbʉ́ nuꞌá̱ bi ꞌñembabi: ―Umfʉ ra nda̱ Cesa núꞌa̱ rí ꞌñepabi, ne umfʉ Ajua̱ núꞌa̱ rí ꞌñepabiꞌa̱.

²⁷ꞌMɛfa ꞌraya ja̱ꞌi núꞌʉ tꞌembi ya saduceo bi ma bá cꞌa̱ꞌtsa ra Jesu. Núꞌʉ́ ena gue hinda ma da yopa nte núꞌʉ xa du. Ne nuꞌʉ́ bi ꞌñembabi ra Jesu:

²⁸―Ma Xahnateꞌihe, ra Moise bi zogui ntꞌofo gue ꞌbʉ ꞌnara ꞌñøhø da du ne da zogui rá ꞌbɛhña̱ ne himbi mɛꞌtsua ni ꞌnara ba̱tsi, nuꞌbʉ́ nurá cu núꞌa̱ ra ꞌñøhø bi du, mahyoni da ntha̱tui núꞌa̱ ra ꞌbɛhña̱ bi gohisɛ, pa ꞌbʉ da mɛꞌtsa ya ba̱tsi da thuꞌmba rá thuhu ngu rá thuhu ndu rá ꞌbɛtꞌo da̱me.

²⁹ꞌNaꞌqui mi ꞌbʉi yoto ya ꞌñøhø mri ncu. Nuꞌa̱ rá mʉdi bi ntha̱ti pe ꞌmɛfa bi du, ne ni ꞌnara ba̱tsi himbi mɛꞌtsua rá ꞌbɛhña̱.

³⁰Y nura ꞌbɛhña̱ꞌa̱ bi ntha̱tui maꞌna rá cu ndu rá da̱me, neꞌa̱ bi du, ne ni ꞌnara ba̱tsi himbi zocuabi.

³¹Nepʉ nurá hñu rá cu ndu rá da̱me bi ntha̱tui nehe núꞌa̱ ra ꞌbɛhña̱. Y bi njabʉ ꞌramaꞌna asta bi du gatho núꞌʉ yoto, ha nu gathoꞌʉ ni ꞌnara ba̱tsi himbi zocuabi núꞌa̱ ra ꞌbɛhña̱.

³²Ne ꞌmɛfa bi du nehe núꞌa̱ ra ꞌbɛhña̱.

³³Hangue xi de stí yopa nte de ra duꞌʉ, ¿toꞌo ꞌna de gue núꞌʉ yoto bi ntha̱tui dí ꞌmʉhui mahetsꞌi?

³⁴Nepʉ ra Jesu bi ꞌñembabi: ―Nuua ja ra ximhai ya ꞌñøhø ne ya ꞌbɛhña̱ ri ntha̱ti.

³⁵Pe nu sta yopa nte de ra du ne stí ꞌmʉhni mahetsꞌi núꞌʉ rí ꞌñepi da ꞌmʉhni, ya hinda ma da ntha̱tiꞌʉ,

³⁶ngueꞌa̱ ya hinda ma da du maꞌnaꞌqui. Ne ma da ꞌmʉ ngu ya ɛnxɛ, ne dyá tꞌʉ Ajua̱ ngueꞌa̱ ya da yopa nteꞌʉ de ra du.

³⁷Nusɛ ra Moise xicaguihʉ ja ra Ma̱ca Tꞌofo gue ma da yopa nte núꞌʉ xa du, ne ja guehnitho ma̱ de núꞌa̱ ra nda̱po mi zø, gue ja bi ꞌñembabini Ajua̱ gue go gueꞌa̱ rá Ajua̱ ra Abrá, ne de ra Isaac, ne de ra Cobo núꞌʉ ya xqui du.

³⁸Pe Ajua̱ hingrá Ajua̱ de núꞌʉ xa du, go rá Ajua̱ de núꞌʉ te. Hangue ra Abrá ne ra Isaac ne ra Cobo bí te ja rá thandi Ajua̱, ne gatho ya ja̱ꞌi te ja rá thandiꞌa̱.

³⁹Nepʉ ꞌraya xahnate de ra ley bi ꞌñembabi: ―Majua̱ni núꞌa̱ gá ma̱, ma Xahnateꞌihe.

⁴¹Ra Jesu bi ꞌñembabiꞌʉ: ―¿Hanja guí ma̱ñhʉ gue núꞌa̱ ra Cristo bá pɛhna Ajua̱ pa da nda̱ gue rá tꞌʉ ra Davi?

⁴²Gue nura Davi bi ꞌñena njaua ja ra Ma̱ca Tꞌofo de ya Salmo:Ajua̱ ra Dada bi ꞌñembabi ma zi Hmu:“Bá e gui hñudiua ja ma ꞌñɛi,

⁴³asta hinga tsihnꞌaꞌi gatho ri ncontra pa da gohiꞌʉ de rí gaꞌti ri ua.”

⁴⁵Nepʉ ra Jesu bi zofo yá nxadi, y gatho ya ja̱ꞌi bi ꞌyøde. Ne bi ꞌñembabi:

⁴⁶―Nsuhʉ, oxqui øthʉ ngu núꞌa̱ øtꞌa ya xahnate de ra ley, ri ho da ꞌño co ꞌraya he xá ma pa da numansu ya ja̱ꞌiꞌʉ. Ne ri ho dra zɛnjua co ndunthi ra tꞌequꞌei ja ya tai, ne ri ho da gʉ ya mʉdi hudi ja ya nija̱, ne go gueꞌʉ huahna ya mʉdi hudi habʉ ja ra hñuni.

⁴⁷Ne ha̱nbabi núꞌa̱ pɛꞌtsa ya viuda asta yá ngu nehe, ne pa hinda fa̱tua yá tsꞌotꞌøtꞌeꞌʉ, øtꞌa yá sadi xi xá ma, pe núꞌʉ́ go gueꞌʉ ma da hña̱nga ꞌnara castigo maꞌna ra da̱ngui.