Read Mezquital_Otomi Nsan Luca 22 Bible Online

Nsan Luca 22 - Mezquital_Otomi bible

Nsan Luca 22

¹Ya mi ma da zøhø ra pa de ra ngo dega pascua núꞌbʉ mi tsꞌi ra thuhme nsi rá nzoi.

²Ya nda̱ gá macja̱ ne ya xahnate de ra ley mri ꞌñʉꞌti pa hanja da za da hyo ra Jesu, pe himi tsa da gʉ ngueꞌa̱ mi tsuꞌʉ ya ja̱ꞌi.

³Nepʉ de gueꞌa̱ ra Satá bi yʉtꞌa ja rá mfeni ra Juda núꞌa̱ xqui thuꞌmbabi nehe ra Iscariote, ꞌna de núꞌʉ ꞌrɛtꞌamayoho yá apostol ra Jesu.

⁴Y nuꞌá̱ bi ma bá cꞌa̱ꞌtsa ya nda̱ gá macja̱ ne ya nda̱ de ra nija̱ pa bá ña̱uiꞌʉ hanja da za da ꞌyɛntꞌua ra Jesu ja yá ꞌyɛꞌʉ.

⁵Ha nuꞌʉ́ xi bi johya ne bi hña̱ꞌtuabi ra boja̱ꞌa̱.

⁷Ne bi zø ra pa de ra ngo pa da tsꞌi ra thuhme nsi rá nzoi, gueꞌbʉ mi pɛꞌtsi da tho ꞌnara tꞌʉdɛti dega hña̱ꞌti.

⁸Nuꞌbʉ́ ra Jesu bi mɛhna ra Pedro ne ra Xuua ne bi ꞌñembabi: ―Rí maha ꞌbɛtꞌohʉ pa grí hocjʉ ra hñuni de ra pascua ga tsihʉ.

⁹Nepʉ nuꞌʉ́ bi ꞌyambabi ne bi ꞌñembabi: ―¿Habʉ guí ne ma grá hocjeꞌa̱?

¹⁰Nuꞌbʉ́ ra Jesu bi ꞌñembabiꞌʉ: ―Nu xcrí cʉthʉ ja ra hnini gui nthɛhʉni ꞌnara ꞌñøhø di ha̱ ꞌna ꞌbada ra dehe. Ne gui tɛnhʉ asta ja núꞌa̱ ra ngu habʉ da yʉtꞌiꞌa̱.

¹¹Ne ꞌñembabihʉ núꞌa̱ toꞌo ra me ngu: “Ra Xahnate bá pɛhnꞌa ra noya ga eñꞌahe njaua: ¿Habʉ ja ra ngu xcá ꞌuegagui pa ga tsihe ra ntꞌoxi dega pascua co ma nxadi?”

¹²Nepʉ nuꞌá̱ ma da ꞌñuꞌtꞌahʉ ꞌnara da̱nga ngu maña̱ ja ra tøngu, ya xa thoqui xá hño, ne ja gui hocjʉni ra ntꞌoxi.

¹³Nepʉ nuꞌʉ́ bi ma bá nthɛui gatho ngu núꞌa̱ xqui xipa ra Jesu. Ne ja bi hyocniꞌʉ ra ntꞌoxi.

¹⁴Y nu mi zø ra ora da ñuniꞌʉ, ra Jesu co yá apostol bi hñudi mahyɛgui ja ra mexa.

¹⁵Nepʉ nura Jesu bi ꞌñembabiꞌʉ: ―¡Xi stá ne ga tsihʉ mahyɛgui ra ntꞌoxi de ra pascua ngu dí ꞌbʉihʉbya, ante da zø ra ora ga tu!

¹⁶Ngueꞌa̱ nugui dí xiꞌahʉ gue ya hinga ma ga yopa tsi ra ntꞌoxi de ra pascua maꞌnaꞌqui asta hinda zøhø núꞌa̱ ra pa grá tsihʉ nuni mahetsꞌi habʉ brí manda Ajua̱ ma Dada.

¹⁷Nepʉ nuꞌá̱ bi gʉ ra vaso ne bi umba njama̱di Ajua̱ ne bi ꞌñembabiꞌʉ: ―Na̱, tsihʉ ꞌra ꞌna tsiqui grí gathohʉ.

¹⁸Nugui dí xiꞌahʉ gue ya hinga ma ga yopa tsi ra vinu dega obxi asta núꞌa̱ ra pa grá ꞌbʉhʉ nuni mahetsꞌi habʉ brí manda Ajua̱ ma Dada.

¹⁹Nepʉ nuꞌá̱ bi gʉ ra thuhme ne bi umbabi njama̱di Ajua̱ ne bi hecuabiꞌʉ bi umbi, ne bi ꞌñembabi: ―Guehna ma ndoꞌyo ma ga uni po rá ngueꞌahʉ. Ora gui tsihʉ, gueꞌa̱ ꞌnara feni de ma du.

²⁰Nepʉ de ya xqui uadi ra ntꞌoxiꞌʉ, nuꞌá̱ bi gʉ ra vaso, ne bi ꞌñembabi: ―Nuna vinu guehna ꞌnara seña de ra ꞌraꞌyo cohi xa tꞌøtꞌe co ma ji núꞌa̱ ma ga fani po rá ngueꞌahʉ.

²¹Y nubyá ꞌna de gue núꞌahʉ guí ꞌbʉhʉua con guequi ja ra mexa, ma gui dagaguihʉ.

²²Núꞌa̱ Toꞌo e bi Nja̱ꞌi, ya ri ne nuna ra ꞌñu xa tꞌutuabi pa rí ma ja ra du, pe ¡huecate núꞌa̱ toꞌo ma da daꞌa̱!

²³Nepʉ nuꞌʉ́ bi mʉdi bi ꞌñámbabi ꞌna ngu ꞌna toꞌo núꞌa̱ mi ma da ꞌyøtꞌa njabʉ. Toꞌo maꞌna ma da nda̱ngui rá nsu

²⁴Nepʉ nuꞌʉ́ bi mʉdi bi ꞌñámbabi toꞌo de gueꞌʉ mi ma da uaꞌa̱ da ma̱.

²⁵Pe ra Jesu bi ꞌñembabiꞌʉ: ―Ya nda̱ ri manda yá hnini ngu ya hmu, ha nuya hnini eꞌtsua yá nsu yá nda̱ gue xi øtꞌe xá hño.

²⁶Pe nuꞌahʉ́ hingue rí ꞌñepi gui njahʉbʉ. Nuꞌa̱ rí ꞌñepi gui ꞌyøthʉ, nuꞌa̱ da nja rá nsu de gueꞌahʉ, mahyoni da notsi, ha nuꞌa̱ tóꞌo da manda, mahyoni da nja ngu ꞌnara ꞌbɛgo.

²⁷¿Toꞌo maꞌna tꞌumba ra nsu, ha gue núꞌa̱ toꞌo da hñudi ja ra mexa, o núꞌa̱ toꞌo pɛpabi? ¿Ha hingue núꞌa̱ hudi ja ra mexa? Masque njabʉ, pe nugui drá ꞌbɛgo de gueꞌahʉ.

²⁸Nuꞌahʉ hinxcá ꞌueguehʉ de guequi masque xcá hyanthʉ ya tsꞌothogui núꞌʉ stá thogui.

²⁹Hangue nugui ma ga ꞌraꞌahʉ ri nsuhʉ dega nda̱, ngu ma Dada xa ꞌracagui ra nsu pa ga nda̱.

³¹Nehe ra Jesu bi ꞌñembabi ra Simu Pedro: ―Nugue Simu, ra Satá xa ꞌyadi pa da hña̱cꞌa ri jamfrihʉ, ne da ꞌyøꞌtꞌahʉ ngu ra trigo ora ꞌbiqui.

³²Pe nugui stá apabi Ajua̱ ma Dada por gueꞌi, gue hinda ꞌmɛdi ri jamfri. Ha nu xcrí yopa jʉ ri jamfri, gui japi da zɛdi yá jamfri nehe nuyʉ maꞌra ri cu.

³³Ha nura Simu bi ꞌñembabi: ―Ma zi Hmuꞌi, nugui dí ꞌbʉcua ꞌbʉ da tsꞌixꞌaꞌi ra fadi, ga ma nehe, ha nuꞌbʉ da thoꞌi, dá thogui nehe.

³⁴Ha nura Jesu bi ꞌñembabiꞌa̱: ―Nugui dí xiꞌaꞌi nuꞌi Pedro, gue núbya dí nxuui ante da mafi ra menja̱ ma gui ma̱ hñuꞌqui gue hinguí pa̱cagui. Ra Jesu bi xipa yá nxadi gue ma dra tꞌøꞌtua ꞌñena ꞌnara ꞌyøtꞌatsꞌoqui

³⁵Ra Jesu bi ꞌyambabi yá nxadi ne bi ꞌñembi: ―Xi núꞌbʉ dá pɛhnꞌahʉ hingá hña̱xa ri buxahʉ nixi ri ncʉboja̱hʉ nixi ri mponga zɛsthihʉ, ¿ha gue bi nja te bi ꞌyøꞌtꞌahʉ ra ꞌbɛdi? Nepʉ nuꞌʉ́ bi da̱di ne bi ꞌñena: ―Hina.

³⁶Nepʉ nuꞌá̱ bi ꞌñembabi: ―Pe nubyá ha̱, dí xiꞌahʉ gue nuꞌʉ tóꞌo pɛꞌtsa rá buxa ne rá ncʉboja̱, dá hña̱tsꞌi. Ha nuꞌa̱ tóꞌo hingui pɛꞌtsa rá huai, dá pa rá patꞌi pa da dai.

³⁷Ngueꞌa̱ nugui dí xiꞌahʉ gue mahyoni da njabʉ ngu ma̱nga ra Ma̱ca Tꞌofo de guequi habʉ ena: “Nuꞌá̱ ja ra uɛnda ꞌnara ꞌyøtꞌatsꞌoqui.” Ngueꞌa̱ gatho núꞌa̱ xa ntꞌofo de guequi pɛꞌtsi da njabʉ.

³⁹Nepʉ nura Jesu bi bøni bi ma ngu mrá nza̱i pa ja ra tꞌøhø ꞌbo Olivo. Ne gatho yá nxadi bi dɛniꞌa̱.

⁴⁰Ha nu mi zøni de guehni, bi ꞌñembabiꞌʉ: ―ꞌYaphʉ ndunthi Ajua̱ pa gui tsɛthʉ ya tsꞌothogui nu stí ꞌñepʉ.

⁴¹Nepʉ ra Jesu bi ꞌuegue de gueꞌʉ tsꞌʉ zi yabʉ pa bá ndandiña̱hmu bá apabi Ajua̱ rá Dada,

⁴²ne bi ꞌñembabi: ―Ma Dadaꞌi, ꞌbʉ gui nehma̱, gui ꞌueca nuna thogui ma ga thogui, pe hindí ne gui ꞌyøtꞌe ngu núꞌa̱ ga nega, go da ꞌyøtꞌa ngu núꞌa̱ ri pahague.

⁴³Nepʉ nuni habʉ mi apabi Ajua̱ꞌa̱, bi zøhni ꞌnara ɛnxɛ xqui ꞌñehe de mahetsꞌi pa bi umbabi ra tsꞌɛdi pa da zɛta ra tsꞌothogui.

⁴⁴Nuꞌá̱ xi mi tu rá mʉi ndunthi de mi apabi Ajua̱, pe maꞌna mi apabi co ndunthi ra tsꞌɛdi asta mri xanthe, ne nuyá xanthe ngu myá da̱nga tagui dega ji, mi tʉi ja ra hai.

⁴⁵Nu mi uadi bi ꞌyapabi Ajua̱ꞌa̱, bi mengui pa habʉ xqui zogui yá nxadi, ne bi zʉdi gatho xqui ꞌña̱ha̱ ngueꞌa̱ ya xqui uentꞌiꞌʉ co ra dumʉi.

⁴⁷Tsꞌa mi ña̱ui yá nxadi ra Jesu, bi zøhø xi ndunthi ya ja̱ꞌi, ne nura Juda ꞌna de núꞌʉ ꞌrɛtꞌamayoho ya nxadi, mbra ꞌbɛtꞌo de ja ya ja̱ꞌi. Ne ꞌbestho bi uatꞌa habʉ mi ꞌba ra Jesu pa bi zʉꞌtsiꞌa̱.

⁴⁸Nepʉ ra Jesu bi ꞌñembabi: ―Juda, ¿ha gue co ꞌnara ntsʉꞌtsi grí da Núꞌa̱ Toꞌo e bi Nja̱ꞌi?

⁴⁹Ha núꞌʉ mri ꞌñoui ra Jesu mi hyandi te ma da nja bi ꞌñembabi: ―Ma zi Hmuꞌihe, ¿ha guí ne ga xithe co ya huai?

⁵⁰Y ꞌna de gueꞌʉ bi mɛnpa ꞌnara ntsɛqui ꞌnará ꞌbɛgo ra da̱nga nda̱ gá macja̱ ne bi dacua rá gu ra ꞌñɛi.

⁵¹Pe ra Jesu bi ꞌñembabiꞌʉ: ―Hyɛhʉbʉ, oguí øthʉ njabʉ. Nepʉ nuꞌá̱ bi hñuxa rá ꞌyɛ ja rá gu núꞌa̱ ra ꞌbɛgo, ne bi ña̱ni ꞌbestho.

⁵²Nepʉ bi zofo nuya nda̱ gá macja̱, ne ya nda̱ de ra nda̱nija̱, ne ya nda̱xjua nda̱, gatho núꞌʉ xqui ꞌñehe pa e da zitsꞌiꞌa̱, ne bi ꞌñembabiꞌʉ: ―¿Ha gue drá be pa e gui jʉgaguihʉ co ya huai ne ya za?

⁵⁴Nepʉ de guehni bi gʉ ntsꞌa̱hniꞌʉ ra Jesu, ne bi zitsꞌi ja rá ngu ra da̱nga nda̱ gá macja̱, ha nura Pedro mi ꞌbɛfa dega zi yabʉtho, mri dɛni.

⁵⁵Ha nu mi zønga ra Pedro ja rá ngu ra da̱nga nda̱ gá macja̱, xqui tꞌudi ꞌnara faspi ja ra patio, ne ja mi huhni ꞌraya ja̱ꞌi mri mpaꞌti, nehe ra Pedro ja bi hñuhni con gueꞌʉ.

⁵⁶Y de guehni ꞌnara nxutsi rá ꞌbɛgo ra da̱nga nda̱ gá macja̱ nu mi hyandi gue mi huhni ra Pedro ja ra tsibi xi bi nʉꞌtiꞌa̱ ne bi ꞌñena: ―Pøde ne nuni ra da̱me go mri ꞌñoui ra Jesu nehe.

⁵⁷Pe nura Pedro bi gømbabi núꞌa̱ ra nxutsi ne bi ꞌñembi: ―Hina, hindí pa̱di toꞌoꞌa̱.

⁵⁸Nepʉ hinga yaꞌa̱ bi hyanda maꞌna ne bi ꞌñembabi: ―Pøde neꞌi go ngrí ꞌñoui ra Jesu. Ha nura Pedro bi ꞌñena: ―Hina, hinga majua̱ni ndrí ꞌñoꞌbeꞌa̱.

⁵⁹ꞌMɛfa de xqui thogui ngu ꞌna ora bi ꞌñena maꞌna ra ja̱ꞌi: ―Majua̱ni nuna ꞌñøhøni go mri ꞌñouiꞌa̱, ngueꞌa̱ nehni mfa̱tho gue ra me Galilea.

⁶⁰Nepʉ nura Pedro bi ꞌñena: ―Dí xiꞌaꞌi gue nixi dí pa̱di núꞌa̱ guí ma̱. Y núꞌa̱ ra ora de tsꞌa mi ma̱nga njabʉ, bi mafi ra menja̱.

⁶¹Núꞌa̱ ra oraꞌa̱ bi ñegui ra zi Hmu Jesu pa bi hyanda ra Pedro, ha nura Pedro ꞌbestho bi zo rá mfeni de núꞌa̱ xqui xipabi desde rá mʉdi, xqui ꞌñembabi: “Ante da mafi ra menja̱ ma gui cøngagui hñuꞌqui.”

⁶³Ha nuya ja̱ꞌi núꞌʉ toꞌo mri su ra Jesu xi mi øꞌtua ra ntꞌeni ne mi naꞌmbabiꞌʉ.

⁶⁴Y bi goꞌtua yá da co ꞌnara dutu ne mi umba ya mpɛꞌti, ne mi embabiꞌʉ: ―¡Xicaguihe xa̱ toꞌo núꞌa̱ bi napꞌaꞌi!

⁶⁶Rá hyaxꞌa̱ bi muntsꞌa ya nda̱xjua nda̱ ne ya nda̱ gá macja̱ ne ya xahnate de ra ley. Ne bi tsꞌixa ra Jesu pa habʉ mi muntsꞌa núꞌʉ ya da̱nga nda̱ gá xodyo, y de guehni ja bá tꞌambabini ne bi tꞌembabi:

⁶⁷―Xicje, ¿ha gue xi majua̱ni go gueꞌi grá Cristo xuá mɛhnꞌaꞌi Ajua̱ pa gui nda̱? Nepʉ nuꞌá̱ bi da̱di ne bi ꞌñembabiꞌʉ: ―ꞌBʉ ga eñꞌahʉ gue go guequi, hingui camfriguihʉ.

⁶⁸Ha nuꞌbʉ ga øꞌtꞌahʉ ꞌraya ntꞌani, hingui xicaguihʉ, ha nixi gui hyɛgaguihʉ.

⁶⁹Pe nuya pa xa ꞌñepʉ, Núꞌa̱ Toꞌo e bi Nja̱ꞌi ma da hñudi ja rá ꞌñɛi Ajua̱ núꞌa̱ toꞌo bí pɛꞌtsa gatho ra tsꞌɛdi.

⁷⁰Nepʉ nuꞌʉ́ bi ꞌyambabiꞌa̱ ne bi ꞌñembabi: ―Nuꞌbʉ́, ¿ha gue go gueꞌi rá Tꞌʉꞌi Ajua̱? Ra Jesu bi da̱di ne bi ꞌñembabiꞌʉ: ―Ha̱ha̱, go guecagui, ngu xcá ma̱ñhʉbya.

⁷¹Nepʉ nuꞌʉ́ bi ꞌñena: ―¡Pa te maꞌra ya testigo ga hoñhʉ gue nucsɛhʉ ya dá øhʉ núꞌa̱ bi ma̱!