Read Mezquital_Otomi Ra Ebreo 8 Bible Online

Ra Ebreo 8 - Mezquital_Otomi bible

Ra Ebreo 8

¹Núꞌa̱ xi dí ne ga xiꞌahʉ go guehna núna ma ga ma̱, gue dí pɛꞌtshʉ ꞌnama nda̱ gá macja̱hʉ núꞌa̱ bí hudi nuni mahetsꞌi ja rá ꞌñɛi de habʉ bí hudi Ajua̱ ra Dada toꞌo pɛꞌtsa gatho ra tsꞌɛdi.

²Go gueꞌa̱ pɛ ra ꞌbɛfi dega macja̱ nuni mahetsꞌi habʉ bí ja núꞌa̱ ra Ma̱ca Luga bi hyocsɛ Ajua̱, hingo bi hyoca ya ja̱ꞌi.

³Gatho ya nda̱ gá macja̱ xa thutsꞌi pa da umba Ajua̱ ya ꞌbaha ne da hyo ya mboꞌoni pa da umbabiꞌa̱, hangue ne ma Zidadahʉ ra Jesucristo mi pɛꞌtsi da uni te da uni nehe.

⁴Nuꞌbʉ núꞌa̱ di ꞌbʉcua thoho hma̱ha̱ ja ra ximhai, hindi tsa da macja̱ꞌa̱ de guecua, ngueꞌa̱ ya ꞌbʉiua ya macja̱ núꞌʉ ri unga ya ꞌbaha ngu ma̱nga ja rá ley ra Moise.

⁵Nuya macja̱ ꞌbʉiua pɛ ra ꞌbɛfi dega macja̱ pe núꞌa̱ pɛfiꞌʉ gueꞌa̱ ꞌnara ntꞌuditho de núꞌa̱ bí tꞌøtꞌa nuni mahetsꞌi. Hangue Ajua̱ xqui xipabi ra Moise ante da mʉdi da hyoca ra nija̱ dega carpa, ne xqui ꞌñembabi: “Beni gui ꞌyøtꞌa gatho ya tꞌøtꞌe ngu núꞌa̱ dá uꞌtꞌaꞌi nuni ja ra tꞌøhø Sinaí.”

⁶Pe numa nda̱ gá macja̱hʉ bí øtꞌa ꞌnara ꞌbɛfi núꞌa̱ maꞌna xá nsunda, ngueꞌa̱ po núꞌa̱ bi ꞌyøtꞌeꞌa̱, Ajua̱ bi ꞌyøtꞌa ꞌnara cohi con guecjʉ núꞌa̱ maꞌna xá hño que núꞌa̱ mi ja ja ra nda̱xjua ley, y nuna ꞌraꞌyo cohina̱ bi mʉdi co maꞌra ya hña̱ꞌti maꞌna xá hño.

⁷Nuꞌbʉ núꞌa̱ ra mʉdi cohi xa bøni xá hño hma̱ha̱, nuꞌbʉ́ ya himi mahyoni xa njahma̱ nuna maꞌna ra cohi.

⁸Pe Ajua̱ bi hyandi gue hinxmá hño núꞌa̱ mi øtꞌa ya ja̱ꞌi co nura mʉdi cohi, hangue Ajua̱ bi ma̱ de gueꞌʉ ja ra Ma̱ca Tꞌofo, ne bi ꞌñena njaua:Núga drá Ajua̱ dí ena: Ma da zø ra pa ra oraga pɛꞌtsa ꞌnara ꞌraꞌyo cohi co ya me Israel ne ya me Judá.

⁹Hingá ngu núꞌa̱ ra cohi dá pɛꞌtsua ndu yá xitaꞌʉnu ndá pɛꞌtsua ra nthecate de duá tsi de Egipto;nuꞌʉ́ himbi ꞌyøtꞌa núꞌa̱ ra cohi dá pɛꞌtsi con gueꞌʉ,hangue nugá dá hɛpʉꞌʉ, njabʉ ena Ajua̱.

¹⁰Nuna guehna ra cohi ma ga pɛꞌtsi co ya me Israel nu sta thogui ya pa de ra mʉdi cohi, njabʉ ena Ajua̱:Ma ga huxa ꞌnara ꞌraꞌyo mfeni ja yá mfeniꞌʉ pa da ꞌyøtca ma hmanda.Y numa ley ma da ꞌmʉi ja yá corasoꞌʉ pa njabʉ nura leyꞌa̱ ma da ꞌyøtꞌeꞌʉ con gatho yá paha.Nepʉ ma da ba̱diꞌʉ gue go drá Ajua̱ de gueꞌʉ,y nuꞌʉ́ go ma hniniꞌʉ.

¹¹Nuya paꞌʉ ni ꞌna hinda ꞌñutuabi rá miquꞌeiuiy nixi ꞌnará cu, pa da ꞌmʉi con gueque,ngueꞌa̱ gathoꞌʉ mahyɛgui ma da ꞌmʉi con gueque,ngu ya da̱ngui ngu ya notsi.

¹²Ngueꞌa̱ ma ga pumbabiꞌʉ yá tsꞌotꞌøtꞌe,ne hinhyaꞌmʉ ma ga yopa benbabi yá tsꞌoqui.

¹³Nu mi ma̱ Ajua̱ de nura ꞌraꞌyo cohi, nuꞌbʉ́ nuꞌá̱ ya bi zogui dega nda̱xjua nura mʉdi cohi. Hangue núꞌa̱ ya bi tsꞌogui dega nda̱xjua, ne ꞌyo rí nda̱xjua, núꞌá̱ ꞌbestho ma da ꞌmɛdi.