Read Mezquital_Otomi Ra Apocalipsi 10 Bible Online

Ra Apocalipsi 10 - Mezquital_Otomi bible

Ra Apocalipsi 10

¹Nepʉ dá handa maꞌna ra ɛnxɛ mi pɛꞌtsa ndunthi rá tsꞌɛdi bi ga̱i de mahetsꞌi, ne mi pa madetho ja ꞌnara guui, ne mi ja ꞌnara ꞌbɛjri ja rá ña̱xu. Rá hmi xi mri yotꞌi ntsꞌɛdi ngu ra hyadi, y nuyá ua mi zø ngu ra faspi.

²Ne mi ha̱ ꞌnara zi tꞌʉca libro y bi xoꞌtsi. De guehni bi ꞌbaꞌma rá ua ra ꞌñɛi ja ra ndehe, ha nurá ua ra nga̱ha̱ bi ꞌbaꞌma ja ra hai.

³Nepʉ bi dø ꞌnara hmafi xi ntsꞌɛdi ngu rá hmafi ꞌnara zate ora mafi, y nu mi mafiꞌa̱ bi ntꞌøde yoto ya ngani.

⁴Y nu ndá øde nuya nganiꞌʉ, ndí ma ga ofo núꞌa̱ te mi ma̱ñꞌʉ. Pe dá øde ꞌnara noya de mahetsꞌi, bi ꞌñengagui: ―Dá gohitho njabʉ núꞌa̱ bi ma̱nga núꞌʉ yoto ya ngani, oguí ofo pa hinda fa̱di.

⁵Nepʉ ꞌmɛfa, núꞌa̱ ra ɛnxɛ dá handi xqui ꞌbaꞌma rá ua ja ra ndehe ne ja ra hai, bi gʉxa rá ꞌyɛ ra ꞌñɛi pa mahetsꞌi,

⁶ne bi jura de rá thuhu núꞌa̱ toꞌo ꞌbʉi pa nza̱ntho, núꞌa̱ bi hyoca mahetsꞌi ne ra ximhai ne gatho ra ndehe ne gatho núꞌa̱ te ja, ne bi ꞌñena: ―Ya tsꞌʉtho ya pa di ꞌbɛdi pa da uadi gatho.

⁷Pe nu stí mʉdi da mistꞌa rá trompeta rá yoto ra ɛnxɛ, nuya paꞌʉ ma da uadi núꞌa̱ bi beni da ꞌyøtꞌa Ajua̱ ne himi fa̱di, núꞌa̱ bi xipabi yá ꞌmɛhniꞌa̱ núꞌʉ toꞌo bi mɛpabi.

⁸Y núꞌa̱ ra noya dá øde de mahetsꞌi bi zocagui maꞌnaꞌqui ne bi ꞌñengagui: ―Grí ma ne gui jʉ núꞌa̱ ra tꞌʉca libro xa xoꞌtsa ja rá ꞌyɛ ra ɛnxɛ núꞌa̱ ꞌbai ja ra ndehe ne ja ra hai.

⁹Nepʉ dá ma habʉ mi ꞌba ra ɛnxɛ ne dá embabi: ―ꞌRacagui ra tꞌʉca libro. Ne nuꞌá̱ bi ꞌñengagui: ―Na̱, ne tsi. Ja ri ne ma gui tsa strá ꞌñu ngu ra tꞌafi, pe nu ja ri mʉi ma gui tsa strá nju.

¹⁰Nuꞌbʉ́ dá ha̱nga ra tꞌʉca libro de rá ꞌyɛ ra ɛnxɛ, ne dá tsi. Ne dá tsa ja ma ne xi xmá ꞌñu ngu ra tꞌafi, pe nu ndá tsi xi xmá nju de mbo ma mʉi.

¹¹Y nuꞌá̱ bi ꞌñengagui: ―Mahyoni gui yopa ma̱nga maꞌnaꞌqui núꞌa̱ te ma da tꞌøꞌtuabi ya ja̱ꞌi de gatho ya hña̱qui ja gatho ya hai, ne ja gatho ya hnini, ne yá nda̱.