Read Mid Grand Valley Dani Matius 10 Bible Online

Matius 10 - Mid Grand Valley Dani bible

Matius 10

¹Iniki ageikhe baga, at Yesus nen at agarumi ane waganhe lagoukha meke inebe 12 oba emenogo natogosi isuagaluk waisasikhesikmo wagoukhama, it nen akhuni aperek mokat inobabut weak meke inakla ukisukhasik werekma mukhogo ula'isigik, yi u ti u inoba werek meke hano hagarinakhik, inobatne dek erlok dek meke inobatnerinakhik, hagarik loagaluk, inobatne wogeisasikhe.

²Ap inebe 12 oba iti, inetaga yi: ebekeram, Simon etaga ageikhe Petrus ekhe lagoukha etnogo agot Andreas ipisak inom, Zebedeus a'but Yakobus etnogo agot Yohanes ipisak inom,

³Filipus Bartolomeus ipisak inom, Tomas Matius pemerintah hasik uang kino ilik waganhe lageikhe meke etnogo ipisak inom, Alfeus a'but Yakub Tadeus ipisak inom,

⁴Simon, “O Kanaan yoma ninaierek meke anek dogouok,” iluk ekhe lageikhe etnogo inom, Yudas Iskariot Yesus wasuagaluk yabokane yoko lageikhe meke etnogo inom, inetaga eta.

⁵At Yesus nen it ap inebe 12 oba iti supusogo la'isagaluk, inasuk wakhe dogolik men yogeisasikhe, “It akhuni itikmanke meke inailake lagup o. Nen, it akhuni o Samaria meke inaila lalok ukugubat o.

⁶Hit nen, akhuni Israel meke domba nalagarek hal nalageikhasik werek iti inobake 'birisilik lano o.

⁷'Birisa laga dogolik, men yogeisilik lano o, Ninopase Allah pogot oba meke apma 'binanigin etnogo yogotak arat 'binanigin o, iluk, yogeisilik lano o.

⁸It akhuni u warek halok hanorinakhik, watlageikha halok inilugurinakhik, u henako hakene inayuk meke inoba werek halok hanorinakhik, mokat inobabut weak meke inakla ukiluk werek meke mukhogo ula'isigik, hano hagarinabik nekhe dogono. An nen oko dek wokhisigi iti hagat, hit nen itithogonat oko dek wogeisilik lano.

⁹Akhuni aperek wen waganhunem, inapiri wogeisegarek iti hak, hit nen hagarinabik lagunem, it nen wokhisekhe dogogun hakma, uang emas men, perak men, tembaga men, hinuakma ukharlogo waganhidegat, nen, su holak oba wokhisagun meke ukharlogo wolok lausak meke men, hinasu ugu meke peretek men, hinisok agot isugun meke men, thegerluk men, wolok lageidek hinebe anek lani o.

¹⁰

¹¹Nen, hit o ukul kokma, 'bugurlagatma, uki lagep halok he, tha nen heagei warogo hinebe wokhinakhe halok, at obabut paldiluk, at itiat hinom dogoluk o ninmo luogoluk halok he, dukhitluk lano.

¹²Nen, it aperek inaila ukugun halok he, it inaierek meke iti heagei warinabino.

¹³Nen, it akhuni etoma inobabut hano nen wokhinakho halok, heagei hinane hanorogo warinabugun iti baga, Allah nen hanorinabiginat o. Itithogon mekeat he, inobabut weak halok he, heagei warinabugun meke iti hinane ukut apuke waganhe dogono.

¹⁴Nen, it etoma nen hinebe wokhinakhidek dogolik hinane waganhidek thogotdisega halok he, o etoma here'isalok hinapuke dukhi aga dogolik, hinisok hola negen horogo 'biluk dukhitno.

¹⁵Yogotak an nane eberogonat yokhisak. Yabokane ninopase Allah pogot oba meke nen ukum inoba 'bigik, kokhik, hagasigin itinem, it akhuni o Sodom Gomora meke etoma, ukum inoma 'biluk weagarinabigin mekeat he, alhe negenat o. Meke re, it akhuni o ukul hit wokhinakhidek thogotdinagagun meke iti anek he, ukum akin meke inoba 'biluk motok weagarinabigin o,” iluk yogeisasikhe.

¹⁶Itithogon yogeisasikhesik ageikhe men yogeisasikhe, “An nen he, hit yi re, hinobabut domba obabut hakene meke, it akhuni inobabut yeke helo yeke obabut weak meke hakene meke inakerlekla hiakhogo la'inagaginmo iti, hit hinobabut warlo obabut hagakharek iti hak hinobabut hinomarlik-hinomarlokhogon hagakhik, thue yogeik hagakherek hakene, hinobabut enago welageik, hagakhe dogono.

¹⁷Akhuni nen it ap wene erlo pilinekharekma inoba wokhisik lageik, akhuni Yahudi meke o sembayan egarekma etoma nen tugi hinakhik, hagasugun etnaga re, hinobabut hebelogo dogono o.

¹⁸Itithogon hagathinabugun iti, erlo an nebe hasigat, ap inetagapogot meke inom, ap koktek meke inom, inoba wokhisik lagunem, hit nen it ap iti inil oba an hagakhunem hinileken neekhe lagap meke etnogo pakhogon it yogeisigik, akhuni itikmanke meke yogeisigik, yogeisoagaluk hano iluk iti bagaat hinitema waganugun etnaga o.

¹⁹Itithogon hinitema waganuagaluk wokhisik lageikha halok he, hit nen oko yogeisagun meke itinem Allah Agoreke nenat hinakla kagalhe dogogin. Halok he, oko nikithogon yogeisagun iluk hinelabut hikhup o.

²⁰Wene oko yogeisagun iti, hit nen hinakla kagalogo ugun dek meke re, hinopase Allah Agoreke nen hinakla dogolik, Yigithogon ini o, iluk yokhisekhe korlek ugun o.

²¹Agarlak ageikhe nen he, at ekaerek agarlak ageikhe wasuagaluk wolok lageik, opase nen he, a'but wasuagaluk wolok lageik, ina'buri nen, inagosa inopase ina'it atluk inasuagaluk inabok palhik, hagasugunat o.

²²Nen, akhuni tha'bokhogonat nen an netaga ilik, Hit at agarumi, iluk ina'it motok hisagun o. Mekeat he, tha nen etaiken thebekhogon obakhanini hapugutdiluk dogogin halok he, o ilugun hurli baga, Allah nen tiligin o.

²³O ukul ageikhe nen weagathinabuogoluk hagakho halok he, lo o ukul ageikhe lano. It akhuni Israel meke inai ukul ebetlake aban wene yogeisigidek werek korlegat, an abat itaklasi agagi etnogo yabokane wisigin o, iluk, nane eberogonat yokhisigi.

²⁴It guru lak wene yakulisegarek meke thebekthek negen werek korlegat, it ina'buri yakulisegarek meke iti siakthek negen upu ya welageikharek motok dek o. Iti hagat, it ap koktek negen thebekthek werek korlek, inatuaneke meke iti re, siakthek negen welageikharek motok degat o.

²⁵Meke re, it yekerugi iti inopase guru iti inom tak-tak hagatlageik, nen, it inatuaneke meke iti inopase lak inom tak-tak hagatlageik, hagatlasumo, erlogat o. It akhuni inoe o iteerek meke iti weak iluk etaga Beelzebul isi halok, it at agarumi inom opakimo meke iti, itithogonat inetaga weak kogat ekhe dogogun o,” iluk yogeisasikhe.

²⁶Itithogon yogeisasikhesik, ageikhe men yogeisasikhe, “Yabokane Allah nen, yi meke ti meke thebelek meke iti winametdigik, limago meke iti inilurogon thelekmatdigik, hagasigin anek iti nen, hit nen, it akhuni meke iti hinayukhogo dogogup o.

²⁷Nen, an nen hit o mummo yokhisigi meke, hit nen o lia baga ekhe dogono. Nen, hinasukmo nane la'bi-la'bo yokhisigi meke iti, hit nen o warleke isiken oba dageiluk hinane pakhogon yogeisekhe dogono o.

²⁸Akhuni nen hinagoreke hinasusak erlok dek. Hinoado itikmanke anek hinasugun iti nen, hinayukhogon dogogup o. Meke re, at Allah anek, hinagoreke inom, hinoado itikmanke inom, erlok motok warogo hetu aikmo la'inagusak werek iti nen, at Allah at hinayukhogo dogono.

²⁹Uang opakiat herlekha'bugat meke baga thue wurle pere meke oko palhethep etnogo hinokodek nogo a? Itithogon meke re, hinopase Allah pogot oba meke nen, Thue iti tunhogo usanek o, iluk, aban igidek werek korlek, ageikhe agat oba tunhogo usekherek dek o.

³⁰Hit he, hinisi hinukuloakma tha'bokhogonat Allah nen iki motok wenago 'bekhemo werek o.

³¹Allah nen thue wurle iti ebe doalegat meke re, kok hakene apekherek 'buk. Akhuni hinebeat kok motok apekherek o. Iti nen hinayuk dekhogon dogono o,” iluk yogeisasikhe.

³²Itithogon yogeisasikhesik, ageikhe men yogeisasikhe, “Tha nen, Yesus iti an noe o, akhuni inil oba ane pakhogon isi halok he, an meneke, At iti an nagot o, iluk nopase pogot oba meke il oba, nane pakhogon iginat o.

³³Itithogon mekeat he, tha nen, Yesus iti an nokodek o, iluk akhuni inil oba la'belho halok he, an meneke, At iti an nokodek o, iluk nopase pogot oba meke il oba pakhogonat igin o,” iluk yogeisasikhe.

³⁴Itithogon yogeisasikhesik ageikhe men yogeisasikhe, “Hit hinakla nen, At wageikhe iti, agat oba yoma wim dapuligiluk wageikhe, iluk apugup o. An wagagi iti, opase a'but ipisak weak ageik, agosa eak ipisak weak ageik, akhoan agalho ipisak weak ageik, it-it inom weak atluk dogoagaluk wagagi o.

³⁵

³⁶ Akhuni inathili meke negen he, inekaerek inai opakimo mekeat agotlasugun o.

³⁷Nen, an he, hina'it negen apekhe dogolik, hinagosa hinopase lak hinakmu welagap halok he, an nagarumi asusak motok dek o. Nen, an hina'it negen dogolik hina'buri elege inom, hina'buri homagarlugi inom, hinakmu welagap halok he, an nagarumi asusak motok degat o.

³⁸O baga meldisalok inakharek meke etnogo, hinago tomok hinomorlo baga waganiluk an noporlik wolok wageidek halok, an nagarumi asusak degat o.

³⁹Tha nen ekaerek ebe irlirli horlagein halok he, ebe watlatluk nuk akhagein o. Meke re, tha nen an nobasik watlasigin halok he, ebe irlirli horlagein o,” iluk yogeisasikhe.

⁴⁰Itithogon yogeisasikhesik ageikhe men yogeisasikhe, “At tha nen hinebe wokhinabigin halok he, at nebeat woknabigin o. Nen, an nebe woknabigin iti, an nopase la'ani ageikhe meke etnogo ebeat waganigin o.

⁴¹Nen, tha nen, Ap yi Allah ane yogeisekherek meke, iluk ebe waganigin halok he, it ap Allah ane yogeisegarek meke oko horlegarek tak-tagat horlagein o. Nen, Ap yi mothogonat hagakherek meke, iluk ebe waganigin halok he, it mothogon hagakharek meke oko horlegarek tak-tagat horlageinat o.

⁴²Nen, tha nen, Yekerek 'bugurlagat meke yi Yesus ane waganherek meke, iluk i aigekeak meke anek ageikhe wogokhe halok he, Allah nen oko wogosusak meke horligidek nuk asigin degat, oko horlageinat o, iluk eberogonat yokhisigi o,” iluk yogeisasikhe.