Read Mid Grand Valley Dani Matius 13 Bible Online

Matius 13 - Mid Grand Valley Dani bible

Matius 13

¹O itinem he, at Yesus aila nen dukhi ageikhesik, i Galilea yekelek etnogo aik oba hurek werekma,

²akhuni motok doalegat Yesus oba wagoukhama, it inebe i aik oba meket werek korlek 'bisalok, at ebe ku baga hureklasi ukisikhe.

³Hureklasi ukisikhesik, yi meke ti meke baga likhigik wene doalegat yogeisekhe lageikhe. Ageikhe men yogeisasikhe, “Ap ageikhe ai hilogo la'ekherek meke ai hilogo la'igiluk dukhisikhe.

⁴Dukhisikhesik ai hilogo la'ilik lagunem, ai aperek holagarlem usa'iluk lageikhe. Usa'isinem thue wageikhesik tha'bokhogonat haumhogo nasikhe.

⁵Nen, ai aperek helekit oba usa'isikhe meke, agat apum dekma nogo nen, aku ibat hurlelhikhe.

⁶Mekeat he, o mo wageikhemo, omaken yakhidek nen, tha'bet ageikhesik puk ageikhe.

⁷Nen ai aperek, oka arlok weakma usa'isikhe meke re, oka arlok iti meke kok aga dogolik, ai hano meke yago etnogo akurladap ageikhesik nen, keken ageikhe.

⁸Nen, ai aperek he, agat mirlimo usa'isikhe meke, hanoat aku hurlelhikhesik nen, erlo kok ageikhesik eken doalegat ikhikhe. Erlo ageikhe eken 100 oba ikhikhe. Erlo ageikhe eken 60 baga ikhikhe. Nen, erlo ageikhe eken 30 baga ikhikhe.

⁹Hit hinasuk holusak halok he, hanorogon holini o,” iluk yogeisasikhe.

¹⁰At Yesus nen itithogon yogeisasikhemo at agarumi at ane waganhe lagoukha meke emenogo oba wagoukhasik nen, men yogokhukha, “Hat nen akhuni yoma wene yi baga likhik, ti baga likhik, yogeisegen iti nenaluk,” iluk yogokhukhama,

¹¹at Yesus nen, “Nopase pogot oba apma 'bisekherek wene iti, at akla limago welageikhe meke, hit anek hinilu asubageik nen iluk, akla pakhogon yokhisausak apasikhe mekeat he, it akhuni aperek iti anek pakhogon yogeisausak dek akla nen apasikhe.

¹²Tha nen ikimo hago werek meke iti, Allah nen yabokane lapelogo wogosumo, at ikimo doalegat hago dogogin o. Nen, tha nen ikimo hago dek halok he, pererlagat anek dogogin meke iti, Allah nen apuke tilogo horlaumo, motok dek asigin o.

¹³Itithogon hagasigin iti nen, an wene oba lisogon it iti yogeisigi o. It akhuni iti, inileken hiliogei mekeat he, hutukhogon higidek o. Nen, inasuk holiogei mekeat he, hutukhogon hutdiliogei degat.

¹⁴It akhuni inobabut itigirlik meke iti inobasik he, at Yesaya nen men isikhe, Inasuk holek dogogun meke re, hutukhogon hutdekhe dogogun degat o. Nen, inileken 'birogo dogogun mekeat he, hutukhogon hekhe dogogun degat o.

¹⁵ It akhuni yi inileken hidik, inasuk holhik, inakla ebekhik, hagatluk nen, inobabut hebelasumo yabokane an nen hanorinabunogo iluk, it nen inakla puk ageik, inasuk dogou-dogou hagakhik, inileken puk uagaluk, ineram nenat puk-puk hagakhik, hagakhukha o, iluk Allah nen isikhemo Yesaya nen holal waganogo 'bisikhe iti tak-tagat asuagaluk yogeisekhe lagei o.

¹⁶Mekeat he, hit anek he, hinileken higik, hinasuk holhik, hagakherethepma iti nen, hinakla arleken akhekhe dogoni o.

¹⁷Hit hinileken hekhe lagap meke iti, it ap Allah ane yogeisekhe lagoukha meke inom, inobabut mot meke inom, inebe doalegat nen, Eiye! Ninileken helo e, ekhe lagoukha mekeat he, inileken higidegat welagoukha. Nen, hinasuk holhe lagap meke iti, it iti nen, Ninasuk holilo e, ekhe lagoukha mekeat he, inasuk holhidegat welagoukha, iluk eberogonat yokhisigi o,” iluk yogeisasikhe.

¹⁸Itithogon yogeisasikhesik, ageikhe men yogeisasikhe, “Wene ap ageikhe ai hilik lageikhe, iluk oba lisogon yokhisigi etnogo, ebe erlo yokhisagein yi hutdini o.

¹⁹Ai hilik aperek holagarlem usa'isikhe iti ebe it akhuni aperek Allah apma 'bisekherek wene iti inasuk holharethegat, ebe hutukhogo hutdigidek halok, at obabut weak meke etnogo wagarethek nen, wene inetaikenma ai yago meke iti henogo horlalok lagarek itiat o.

²⁰Nen, ai hilik ageikhe helekit oba usa'isikhe iti ebe, it akhuni aperek Allah ane iti inasuk holharethek nen, inakla arleken akhekhe dogolik ibat waganharethek nenat,

²¹wene iti inetaikenma omaken yakhidek nenat, iniki pererlagat welageikharethek nen, akhuni aperek nen Allah ane iti hasik yi aik ti aik inoba 'bigik, weagarinakhik, hagakhunem, inakla ibat puk ageikharethek nen, wene iti here'isalok dukhegarek itiat o.

²²Nen, ai hilik ageikhe okama arlok weakma usa'isikhe meke iti ebe, it akhuni aperek Allah ane iti inasuk holharethek nenat he, inakla nen, Yogotak ya hasik nikithogon hagasigin he, iluk, wene munini ebekhik, Nameke doalegat negen dogolep e, iluk inakla ebekhe dogolik, inekaerek nen nukhetdakhigik, hagakharek iti nen, wene iti erlo keken atluk nen, eken ikherek dek itiat o.

²³Nen, ai agat hanoma hilogo la'isikhe meke iti ebe, it akhuni aperek Allah ane iti inasuk hanorogon holharethek nen, ebe hutukhogon hutdakhugunem, wene iti eken ikheregat o. Erlo ageikhe nen eken 100 ikhik, erlo ageikhe nen eken 60 ikhik, erlo ageikhe nen eken 30 ikhik, ikherek itiat o,” iluk yogeisasikhe.

²⁴At Yesus nen wene itithogon yogeisasikhesik wene ageikhe oba lisogon men yogeisasikhe, “Nopase kok pogot oba meke nen apma 'bisekherekma iti ebe ap ageikhe ayabula ai hano meke yakhikhe iti hakeneat o.

²⁵Ai yakhikhe mekeat, it akhuni noge ekhe korlek, at ap ageikhe ap ai yakhikhe meke iti ipisak weak meke wageikhesik nen, gandum ai hano meke yakhikhe etnogo aklake ai weak meke ya'iluk lageikhe.

²⁶Itithogon ya'iluk lageikhemo, gandum ai yago etnogo aku hurlelogo dukhisikhesik nen, eken ikhe korlek, weak meke ai yago etnogo aku hurlelogo eka winamat ageikhe.

²⁷Winam ageikhemo, at atuaneke meke emenogo nen, at ayabu iteerek meke etnogo oba wagoukhasik nen, men yogokhukha, Nopase! Hat hayabula etoma ai hano meke yakhen apigi. E a? Oka weak meke etoma koma nen wagasik aku dukhekhe? iluk yogokhukhama,

²⁸at nen he, Dek o. Iti, at ap nipisak weak meke etnogo nen yakhemo higi o, iluk yogeisasikhemo, it atuaneke meke emenogo nen, Halok he, henogo opakimo 'biluk ula'isa lausak apegen a? iluk yogokhukhama

²⁹at nen he, Dek o. Oka weak meke iti henukhunem nen, gandum hano meke ai etoma inomat henesunogo nen, henesi lagup o.

³⁰Gandum eken aban palhidekma inom itithogon thabakhogon dageikhe dogoak o. Nen, eken horle aga halok he, an nen it ap eken palharek meke yogeisekhe dogolik, Eka weak meke iti hetu hundisauwok nen he, iti meke tak henogo herle wakhik, nen, gandum eken hano meke iti natogorlogo 'bekherekma etoma 'bigik, 'bini o, iluk yogeisagein, iluk atuaneke meke emenogo yogeisasikhe,” iluk Yesus nen yogeisasikhe.

³¹At Yesus nen itithogon yogeisasikhesik yabokane wene ageikhe oba lisogon men yogeisasikhe, “At kok pogot oba meke apma 'bisekherek iti ebe re, ki'bi-ki'bi ai hakene o. Ap ageikhe nen ki'bi-ki'bi ayabumo hilik la'isikhe. Yi meke ti meke ai iti herlekha'bugat mekeat he, ki'bi-ki'bi ai iti anek motok herlekha'bugat o. Meke re, ki'bi witat men, ageikhe meke men, aku dukhekherethek nen, oak herlekha'bugat negen dageikharek. Mekeat he, ki'bi-ki'bi ai iti anek motok kogat dageikherethek, o hakene hagatlagunem, thue hitluk nekherek meke witluk nen, ki'bi-ki'bi iti ikilo'bak obake ai hali agarek iti hakeneat o,” iluk yogeisasikhe.

³²

³³Itithogon yogeisasikhesik nen, wene ageikhe oba lisogon men yogeisasikhe, “Nopase kok pogot oba meke nen apma 'bisekherek ebe re, eken roti akla usa'isinem hikherek iti hakeneat o. He ageikhe nen gandum tamelek tepung wul hakene meke 40 kilo walhalok waganhikhesik, eken roti hisuagaluk akla usa'iluk abel dagalogo hagakhikhemo ebe tha'bokhogonat motok hikhikhe iti hakeneat o,” iluk yogeisasikhe.

³⁴At Yesus nen akhuni doalegat emenogo yogeisekhe dogolik, wene ageikhe pakhogon yogeisekhe lageikhe dek. Oba lisogon anek yogeisekhe lageikhe.

³⁵ Itithogon hagakhe lageikhe iti ap ageikhe Allah ane yogeisekhe lageikhe meke nen ekhe dogolik, “An wene yogeisekhe dogolik, oba lisogon anek yogeisekhe dogogin o. Allah nen agat yi walhasikhe hurli baga nen wene limago motok welageikhe meke pakhogon yogeisagein o,” iluk isikhe iti tak-tak asuagaluk, Yesus nen itithogon yogeisekhe lageikhe iti.

³⁶Itithogon yogeisasikhesik nen, akhuni doalegat emenogo etoma werek korlek, at Yesus ebe uma ukisikhemo, at agarumi ane waganhe lagoukha meke emenogo oba ukisukhasik nen, men yogokhukha, “Wene, oka weak meke wen oba nen dukhisikhe meke oba lisogon yakulnisegen etnogo ebe pilinerogo yoknisan o,” iluk yogokhukha.

³⁷Itithogon yogokhukhama, at Yesus nen, “Ap ageikhe nen ai hano meke yakhikhe igi etnogo ebe re, an abat itaklasi agagi etnogo nebe yiat o.

³⁸Nen, wen iti ebe re, o agat oba yoma yi ai ti ai tha'bokhogonat o. Nen, ai hano meke ebe re, akhuni Allah apma welageikharek inebe itiat o. Nen, ai weak meke iti ebe re, at obabut motok weak meke a'buri itiat o.

³⁹At ap wen iteerek ipisak motok weak dogolik, ai weak meke yakhikhe iti ebe re, at Iblis itiat o. Eken palusak tak-tak iti ebe re, o ilugun oba hasigat o. Nen, it ap eken palharek meke ebe re, it malaikat Allah pogot oba nen yoko usa'isa agarek meke itiat o.

⁴⁰Nen, it akhuni nen oka weak meke natogorlogo 'biluk hetu hunharek iti hak, o ilugun oba itithogonat hagasigin o.

⁴¹An abat itaklasi agagi etnogo nen nagarumi malaikat yoko la'isa agunem, it nen Allah apma 'bisekherekma etoma nen, yi meke ti meke akhuni nen weak hagasuagaluk inakla kagalharek meke inom, yi akhuni ti akhuni weak hagakharek meke inom, natogorlogo 'bisalok

⁴²tha'bokhogonat hetumo la'isaumo inaik kirlidik mak-mak hagakhe dogolik, di ago de ago motok dogogun o.

⁴³Nen, it Allah akla apherek meke mothogon hagakharek meke iti anek he, inebe o mo liarogo yakherek hak, inopase Allah apma dogogun o, iluk hinasuk holusak halok, hanorogo holini o,” iluk yogeisasikhe.

⁴⁴Itithogon yogeisasikhesik, ageikhe men yogeisasikhe, “Nopase kok pogot oba meke apma 'bisekherek iti ebe re, men hakene. Hano meke oko kogat meke wen oba agat akla thalek limago werekma, ap ageikhe nen herakhasikhesik akla arleken akhalok apuke agat thalogo lima'iluk aila lalok, ameke yi meke ti meke tha'bokhogonat it aperek inoba oko waganiluk nen, hano meke iti horlagaluk apuke wageikhesik wen iti oko 'bisikhe iti hakeneat o,” iluk yogeisasikhe.

⁴⁵Itithogon yogeisasikhesik, ageikhe men yogeisasikhe, “Nopase kok pogot oba meke nen apma 'bisekherek iti ebe re, men hakene. Ap ageikhe yi meke ti meke oko palherek meke nen yerageken hakene mutiara hano meke herarik nekhe dogolik

⁴⁶ebe oko kogat meke ageikhe hea'iluk nen, aila lageikhesik ameke yi meke ti meke oko it aperek inoba waganhikhesik, yabokane mutiara hano meke iti waganhikhe iti hakeneat o,” iluk yogeisasikhe.

⁴⁷Itithogon yogeisasikhesik, ageikhe men yogeisasikhe, “Nopase kok pogot oba meke nen apma 'bisekherek iti ebe men hakene. Ikan waganuogoluk su yoge su baga i kok laut iti yekelekma akla usa'isinem yi ikan ti ikan ukuloak etaga tomok akla ukhat laga halok,

⁴⁸su yoge su iti akla apem hethokhogon agunem, i aik oba dukhitluk hurek dogolik, ikan hano meke halok hulogo isoakla ukharlekhe dogolik, weak meke halok po la'isegarek iti hak,

⁴⁹o ilugun hurli baga itithogonat hagatlasigin o. It malaikat Allah nen pogot oba nen yoko usa'isa agarek meke emenogo witluk nen, akhuni inobabut weak meke emenogo it akhuni Allah akla apekherek meke mothogon anek hagakharek meke inom opakimo werekma, inaklake nen lisogo ula'isalok,

⁵⁰hetu aiko la'isaumo inaik kirlidik mak-mak hagakhe dogolik di ago de ago motok dogogun o,” iluk yogeisasikhe.

⁵¹Itithogon yogeisasikhesik, ageikhe men yogeisasikhe, “Wene iti arat hutdegep a? Dek a,” iluk yogeisasikhemo, it nen he, “I o. Hutdogoat o,” iluk yogokhukha.

⁵²Itithogon yogokhukhama, at Yesus nen, “Halok he, it ap Allah ane holal waganek iteerek meke emenogo nen, nopase kok pogot oba meke nen apma 'bisekherek etnogo wene yakulho halok he, iti men hakene usak. Ap kok meke ameke etaiken hunik meke 'bakhekherekma nen, ket meke inom, haganeat meke inom, eran-alep waganiluk ula'i agarek hagat o,” iluk yogeisasikhe.

⁵³At Yesus nen wene oba lisogon arat yogeisalok nen, o etoma here'iluk dukhi ageikhesik

⁵⁴at ekaerek aila erloma lageikhesik, o akhuni Yahudi meke sembayan egarekma ukiluk wene yakulisugunem, it akhuni inasuk holhukha meke nen, men isukha, “Eiye! Nayuk e. Ap yi akla motok kagalek iti, wene ka nen yakulhesik waga. Nen, yi meke ti meke elalinat hagarik liliogo iti, koma nen yakulhesik hagarik liliogo.

⁵⁵Ap yi, ap o halherek meke etnogo a'but dek? Nen, agosa etaga Maria etnogo dek? Nen, agarumi oporlik meke, Yakobus inom, Yusuf inom, Simon inom, Yudas inom, emenogo dek?

⁵⁶Nen, at erugi, nit ninom tha'bokhogonat welago yoma dek? Wene iti ka nen wolok wagasik iliogo,” iluk inakla nen meanetdisukha.

⁵⁷Meanetdiluk kolelogo thogotdisukhama, at Yesus nen, men yogeisasikhe, “It ap Allah ane yogeisegarek meke iti, o yi ai ti ai lagunem, akhuni aperek nen motok inalon halinakharek mekeat he, inekaerek inaila erloma lagunem inougi inagarumi inom opakimo welageikharek meke nen anek inalon halinakharek dek yoma re!” iluk yogeisasikhe.

⁵⁸Itithogon yogeisasikhe iti, it akhuni Nazaret meke etoma nen, inetaiken Yesus oba hakotdigidek, inakla meanetdiluk welagoukha iti nen, at o etoma dogolik hagasusak dek meke elalinat kokhogon hagakhidek herlekha'bugat anek hagakhikhe iti.