Read Mid Grand Valley Dani Matius 14 Bible Online

Matius 14 - Mid Grand Valley Dani bible

Matius 14

¹O eta baga, at Herodes o Galilea eloke kok etagapogot welageikhe meke iti, Yesus nen hagakhe lageikhe meke asuk holhikhesik nen,

²at agarumi men yogeisasikhe, “Yohanes ima usa'isekhe lageikhe meke ebe wakhima watlaga etnogo yabokane iluk agasik iti nen, hagasusak dek meke elalinat hagarik liliogo iti higi,” iluk ebe Yesus hagakhe lageikhe mekeat isikhe iti.

³At kok Herodes nen agot Filipus age he Herodias iti tilogo waganhikhe iti baga Yohanes iki herle warogo iniki herle warogo 'bisegarekma kola'isikhe.

⁴Kola'isikhe iti, alebageik at Yohanes nen Herodes etnogo yogokhe dogolik, “He waganusak dekmaat waganhetikmo iti, hipisak dogosak erlok dek o,”

⁵iluk yogokhikhemo, at Herodes nen Yohanes iti wasigin iluk akla apasikhemo it akhuni aperek nen, “Yohanes iti Allah ane yogeisekherek meke,” iluk ekhe lagoukhama, wasusak ayuk ageikhe.

⁶Mekeat he, o at kok Herodes iti ebe itaklageikhe baga tak-tak asi ageikhemo nen, pesta hagakhe dogolik, at he Herodias eak tharlisik meke iti, akhuni doalegat inelokhoma nen etai uak sa'bik sa'bok wakhunem, at kok Herodes iti akla arleken akhasikhe.

⁷Akla arleken akhasikhesik Allah etaga hupuk palogo, horlak etnogo yogokhe dogolik, “Hat nen nena meke kino yoknekhen halok he, wokhesiginat o. Halok he, ageikhe kino yoknom o,” iluk yogokhikhe.

⁸Itithogon yogokhikhemo horlak iti agosa nen asuk arat wakhikhesikmo nogo nen he, men yogokhikhe, “Nopase, at Yohanes ima usa'inekherek meke etnogo ukuloak palogo, piring thabia oba temerogo woknetnok o,” iluk yogokhikhe.

⁹Itithogon yogokhikhemo, at kok Herodes etnogo akla weak ageikhe meke re, Allah etaga hupuk palhunem akhuni doalegat pesta isago nuogoluk natogorli agoukha meke emenogo arat inasuk holhukhasikmo iluk, agarumi nen horlak etnogo nen isikhe tak-tagat hagarogo wogosi loagaluk yogeisasikhe.

¹⁰Itithogon yogeisaiskhemo lagoukhasik nen, Yohanes etnogo akhuni iniki herle warogo 'bisegarekma werekma ukisikhesik nen, arlokop ade 'bogokhogon wakhukha.

¹¹Arlokop ade 'bogokhogon warogo, ukuloak palek piring thabia baga temerogo wolok wageikhemo horlak tharlisik etnogo wogokhikhe. Wogokhikhemo, horlak etnogo nen, agosa wogosi lageikhe.

¹²Itithogon hagakhukhama, at Yohanes agarumi wagoukhasik nen, ebe warek etnogo agatma thaldiluk nen, Yesus yogosi lagoukha. Itithogon hagakhukhasik dogolik, at Herodes nen Yesus abok holhikhesik, “Yohanes iluk agasik hagariogo higi,” iluk isikhe iti.

¹³Akhuni aperek nen, “Herodes nen Yohanes wakhe,” iluk isukhama, Yesus asuk holhikhesik nen, o etoma thogotdiluk, imake ku warogo arligat tekhogon o akhuni inaren dekma etoma lageikhemo, akhuni inebe motok doalegat inasuk holiluk, inaila ukul dopok nen i aik obake nen oporlik lagoukha.

¹⁴It alebageik lagoukhasik werekma, at Yesus imake ku warogo laga lageikhesik, ku akla nen inoba dukhisikhesik, akhuni doalegat emenogo ileken lageisalok akmurinabiluk nen, it u warek meke emenogo hano hagarinakhikhe.

¹⁵Itithogon u hano hagarinakhe korlek, o arat liok isikhemo nen, at ane waganhe lagoukha meke emenogo Yesus oba wagoukhasik, men yogokhukha, “Nit o yoma akhuni inaren dekma werekma, o arat liok ekhe yoma, akhuni doalegat yoma inapiri inekaerek oko paloak nen he, o yoma aliluke o ukul 'bugurlagatmake la'isan o,” iluk yogokhukhama,

¹⁶at Yesus nen, “It yoma nen lausak dek o. Inapiri nausak meke hit nenat melageisani o,” iluk yogeisasikhe.

¹⁷Itithogon yogeisasikhemo, it nen, “Nit he, hipiri roti meke 5. Nen, ikan he, pere. Eta anek hago welago o,” iluk yogokhukha.

¹⁸Itithogon yogokhukhama, at Yesus nen he, “Etaat woknisitni o,” iluk yogeisasikhe.

¹⁹Yogeisasikhemo, wogosi agoukhama, at Yesus nen akhuni doalegat emenogo men yogeisasikhe, “Pipuk ekamake ethoma hureklarik lani o,” iluk yogeisasikhemo hureklarik lagoukhama nen, roti 5 eranogo inom, ikan pere eranogo inom, ikimo waganhikhesik nen, ileken pogot oba liakhasikhesik, Allah heagei warogo nen, roti kusogo agarumi ane waganhe lagoukha meke emenogo nen supurisoagaluk wogeisasikhemo it nen supurisasukha.

²⁰Supurisasukhama, it inebe tha'bokhogonat hipira ina'ithogon nasukhasik titurogon, mul yago 12 oba apem hethokhogon ukharlogo 'bisukha.

²¹Akhuni inebe tha'bokhogonat nasukha meke iti, yekerugi inom, humi inom, iniki wenageinakhidek. Ap inarluetek anek he, inebe 5.000 meke wenageinakhukha.

²²Itithogon arat nasukhama nen, at Yesus nen at agarumi ane waganhe lagoukha meke emenogo men yogeisasikhe, “An akhuni doalegat yoma la'isak nen, hit tak ku akla ukiluk i aik ilibaganke italhe dogoni o,” iluk ane obatnerogon yogeisasikhe.

²³Itithogon yogeisasikhemo nen, itali aga korlek, at Yesus nen akhuni emenogo inailake tomok la'isasikhesik nen, at arligat anek tom oba sembayan igiluk dageisikhesik werekma o hi ageikhemo, arligat etoma welageikhe.

²⁴Werek korlek, agarumi emenogo imake ku warogo walegat i tumo heisogon asi wagoukhasikmo, hisakne obatnerogon inelokhomake nen hubetha ageikhemo, i hoklabu apigat hulalogo-dekalogo waga dogolik, ku etnogo abel dekak-hekakhogon hagakhe lageikhe.

²⁵Itithogon hagakhe korlek, o wik-wik jam 3 hakene a, jam 6 hakene a, at Yesus inoba wisigiluk, i agoum obake isok 'bilik wageikhe.

²⁶Itithogon isok i agoum obake 'bilik wagunem, it agarumi ane waganhe lagoukha meke emenogo inileken lakhasukhasik nen, inakmaken lagoukhasik, inayuk nen, “Eiye! Mokat waga ithi,” iluk, inane naik-waik isukha.

²⁷Itithogon isukhama, at Yesus nen he, “Hinagot akma. Nagarumi. An nebeat waga lagei. Halok he, hinayuk agup o,” iluk yogeisasikhemo,

²⁸At Petrus nen he, “Noe. Hat hebeat halok he, an hoba i agoum obake wisik nen he, Eme o, iluk yoknom,” iluk yogokhikhemo

²⁹at Yesus nen, “Eme o,” iluk yogokhikhemo, at Petrus etnogo ku akla nen dukhisikhesik nen, i agoum obake Yesus oba lageikhe.

³⁰Lagunem nen, hisakne obatnerogon hubetha ageikhemo, ileken halok ayuk ageikhesik, ima na'bukhogon usagein thalekma, ane naik ekhe dogolik, “Eiye! Noe! Tilnabi me o,” isinem eranogoat,

³¹Yesus nen iki hago meldekhe dogolik, “Hat hetaiken noba hakotdigidek, hetaiken pere welaganma iti nenaluk,” iluk yogokhikhesik,

³²it ipisak ku akla ukisukha hak, hisakne etnogo dek ageikhe.

³³Dek ageikhemo, it ku akla welagoukha meke emenogo nen Yesus hogorakhe dogolik, “Hat eberogonat Allah a'but heogo o,” iluk yogokhukha.

³⁴Itithogon hagatluk, etoma nen ku warogo itali aga lagoukhasik nen, o Genesaret eta mot-mot asi agoukha.

³⁵Wagunem nen, it akhuni etoma meke nen Yesus ebe arat hutdisukhasik nen, at abok o ukul dopok yogeisilik lagoukha. Yogeisilik lagoukhama, akhuni u warek meke tha'bokhogonat wogosik Yesus oba wagoukhma,

³⁶it nen Yesus asu ilugun anek iniki hakhauwogoluk kino iluk asu etnogo iniki hakhasukha meke inoba hano agoukha.