Read Mid Grand Valley Dani Matius 16 Bible Online

Matius 16 - Mid Grand Valley Dani bible

Matius 16

¹Dukhi ageikhesik werekma, it ap Farisi meke inom, it ap Saduki meke inom, Yesus obabut paluogoluk oba wagoukhasik, men yogokhukha, “Hat hebe hopase Allah pogot oba meke nen usa'agei agama wagan halok he, nit nen hutdaguok nen ninil oba elalin meke ageikhe hagasin ta,” iluk yogokhukha.

²Itithogon yogokhukhama at Yesus nen, [“O mo korok i lagunem, pogot oba mep thabuk ekhe halok, hit nen, O hibi asigin, egethep iti.

³Nen hubenke hinileken lakhalok nen, pogot oba erlamuk werek halok, hit nen, Miso wisigin, iluk egethep apigi. Pogot elokhoken hinileken penakherethep nen, Itithogon hagatlasigin, iluk hinetaiken ekerlek dogolik, obabut ekagat palu hinilu mekeat he, yi meke ti meke o yogotak hagatlariogo iti, hit hinilu asuagaluk hagatlariogo mekeat he, hutdigidek welagap yoma re!]

⁴Hit akhuni o yogotak welagap meke yoma re, hinobabut motok weak hagarik nekhe dogolik, Allah hinom dopokhogon dogou'buk yoma re! Itithogon dogolik, hit nen, Nit nen hutdaguok nen, hat nen elalin meke ageikhe hagasin he, iluk yoknekhe lagap mekeat he, an nebe hutdanubageik iluk an nen elalin ninat meke ageikhe hagasigin motok dek o. At Yunus nen akhuni hutduagaluk elalinat hagakhikhe iti hak anek an nen yabokane ageikhe hagakhunem hinileken neagun o,” iluk itithogon yogeisasikhesik, it ap emenogo etoma thogotdisalok, o werlekma lageikhe.

⁵At Yesus agarumi ane waganhe lagoukha meke emenogo inom i yekelek etnogo aik ilibaganke arat italhukhasik nen, agarumi inileken 'bikhasukha meke, roti obarlikmatdiluk lagoukhama nen,

⁶at Yesus nen men yogeisasikhe, “It ap Farisi meke inom, ap Saduki meke inom, eken hipiri roti meke hisuagaluk aklake usakharek iti hakene meke hago werek iti baga weagathinabinogo iluk, hinobabut hebelogo dogono,” iluk yogeisasikhe.

⁷Itithogon yogeisasikhemo, it-it wene ekhe dogolik, men isukha, “Roti etnogo ageikhe wolok wageidek iti nen ekhe higi,” iluk isinem

⁸at Yesus nen ekagat hutdisasikhesik men yogeisasikhe, “Hit hinetaiken an noba aban hakotdigidek dogolik, Roti dek, iluk ekhe lagap iti nenaluk.

⁹Hinetaiken hutukhogon hutdigidek yoma re! Roti ebe 5 mekeat he, ap inebe 5.000 meke neka etnogo obarlikma aga? Itithogon nekasik titurogon 'begama, mul yago meke meren akla ukharlogo 'begep nogo.

¹⁰Nen, ageikhe roti ebe 7 mekeat he, ap inebe 4.000 meke supusogo wogeisegep etnogo nen, titurogon mul yago meren akla ukharlogo 'begep nogo? Hinakla hutdigidek welagap?

¹¹An nen roti hasik yokhisigidek mekeat he, iti nenaluk hutdigidek welagap? Eken roti hisuagaluk akla usakharek meke iti hakene, it ap Farisi meke inom, Saduki meke inom, hago werek iti nen hinobabut hebelogo dogobageik iluk yokhisigi o,” iluk yogeisasikhe.

¹²Itithogon yogeisasikhemo, it emenogo hutdisukhasik nen, men isukha, “I. Wene ekhe iti, eken roti hikherek meke hasik yoknisekhe dek o. Iti re, it ap Farisi meke men, ap Saduki meke men, inawene yakulisegarek meke etnogo ninetaikenma ukisinogo iluk ninobabut hebelogo dogoagaluk yoknisekhe higi,” iluk hutdisukha.

¹³O etoma nen, at Yesus o ukul kok Kaisarea ap Filipi nen kogotdisikhe baga etoma dagei ageikhesik nen, at agarumi ane waganhe lagoukha meke emenogo hinok waganhe dogolik, men yogeisasikhe, “It akhuni nen, an abat itaklasi agagi etnogo an nebe hasik ekhe dogolik, tha iluk iliogei nogo,” iluk yogeisasikhemo,

¹⁴it nen he, men isukha, “It aperek nen, At ebe re, Yohanes ima usa'isekhe lageikhe meke etnogo igik, it aperek nen, At ebe Elia igik, it aperek nen he, At ebe Yeremia igik, it aperek nen he, at ap Allah ane yogeisekhe lagoukha meke emenogo ageikhe igik, iliogei,” iluk yogokhukha.

¹⁵Itithogon yogokhukhama, at Yesus nen, “It nen itithogon iliogei mekeat he, hit anek he, an nebe hasik tha apekhe lagap,” iluk yogeisasikhemo

¹⁶at Simon Petrus etnogo nen, “Hat hebe, Kristus Allah iluk motok welagarek meke a'but, nit tilninabuagaluk at nen la'isigin iluk abok yoknisasikhe etnogoat o,” iluk yogokhikhe.

¹⁷Itithogon yogokhikhemo, at Yesus nen he, “Simon Yona a'but nagot o. Akhuni nen yokhekhama egen dek o. An nopase pogot oba meke nen yokhekhemo egen higi o. Halok he, hakla arleken akhekhe dogono o.

¹⁸Nen, ageikhe inom yokhesik. Hat hetaga helekit u hak, Petrus o. Nen, helekit isa yi baga hipikhogon, an nagarumi natogorlogo 'bisalok o negen halogo 'bisigi halok he, at wema baga iteerek etnogo nen obatnerogo erlok degetdisagein dek o.

¹⁹Nopase kok pogot oba meke apma 'bisekherekma ukegarek oba, kunci thu hualharek meke hat wokhesigin o. Hat nen, agat oba yoma meke hasik hagasusak dek iluk wene palhen halok he, pogot oba meke nen wene palhe hagat, igin o. Nen, hat nen agat oba yoma hagasusak hano iluk egen halok he, pogot oba meke nen hano ekhe hagat, igin o,” iluk Petrus yogokhikhe.

²⁰Itithogon yogokhikhesik, at agarumi emenogo tha'bokhogonat men yogeisasikhe, “Hit nen an nebe hasik he, At iti Kristus, Allah nen tilninabuagaluk la'isigin iluk abok yoknisasikhe etnogoat o, iluk akhuni aperek motok yogeisugup o,” iluk inasuk wakhikhe.

²¹Hurli iti hurli nen, at Yesus nen agarumi ane waganhe lagoukha meke emenogo at yabokane hagasigin meke pakhogon men yogeisasikhe, “An o Yerusalem eloma lausak welagei o. Laumo it ap inarluetek emenogo men, Allah iteerek meke inougi koktek men, Allah ane holal waganek iteerek meke men, inom nen, yi aik ti aik doalegat hagatnabiluk nebe nasugun o. Nasumo nen, niki pere nebe warek dogoluk nen, niki ageikhe baga yi nen, Allah nen nilugutnabigin o,” iluk pakhogon yogeisasikhe.

²²Itithogon yogeisasikhemo at Petrus nen, Yesus wolok asokneat lageikhesik men yogokhikhe, “Hat wene egen iti hagathabinogo nen, Allah nen tilhabuak o,” iluk asuk wakhikhe.

²³Asuk wakhikhemo, at Yesus elokhe dagakhogon Petrus men yogokhikhe, “Hat Iblis higi. Allah akla apekherek tak-tak ebekhidek, akhuni nen apegarek tak-tagat ebetdiluk nelokhe palhe lagan yi, nelokhoma yoma dogogun. Horla lan o,” iluk yogokhikhe.

²⁴Itithogon yogokhikhesik, at agarumi ane waganhe lagoukha meke emenogo ageikhe men yogeisasikhe, “At tha nen an noporlik nekhe dogeigiluk halok he, obabut ekaerek hasik etaiken hunik dogolik hagakherek meke iti, Na'it, iluk thogotdiluk, o baga meldisalok inakharek meke iti ago mekeat wolok noporlik nekhe dogeigiluk wisuak o.

²⁵Nen, tha nen ekaerek nen, An nebe niluk dogosak warlok, iluk ebe irlirli horlagein halok he, watlatluk nuk akhagein o. Meke re, tha nen ebe irlirli horligidgek an nobasik watlaga halok he, ebe irlirli horlagein o.

²⁶Tha nen yi meke ti meke agat oba meke tha'bokhogonat iteerek asigin mekeat he, yabokane ebe nuk asigin halok, at nen, An ageikhe erlok thaburogo 'bakhigi, usak nogo? Motok dek o. Ebe nuk asigin iti obolukmo, nena meke ipisak oko 'busak nogo. Erlok dek o.

²⁷An abat itaklasi agagi etnogo re, yabokane nopase hogorakho motok welageikharek iti hagat, hagalatluk, it malaikat Allah nen pogot oba nen yoko usa'isa agarek meke emenogo ninom witluk nen, itinem, akhuni tha'bokhogonat inobabut dopok hagakharek meke tak-tagat oko wogeisasigin o.

²⁸Nen, hit metek welagap yoma meke hinebe aperek watlageidek dogolik, an abat itaklasi agagi etnogo kok Netagapogot dogeigiluk akhuni tha'bokhogonat napma 'bisa agunem hinileken neagunat o, iluk eberogonat yokhisigi,” iluk yogeisasikhe.