Read Mid Grand Valley Dani Matius 18 Bible Online

Matius 18 - Mid Grand Valley Dani bible

Matius 18

¹Itinem at Yesus agarumi ane waganhe lagoukha meke emenogo at oba wagoukhasik nen, men yogokhukha, “Nopase kok pogot oba meke apma 'bisekherekma etoma, kok etagapogot he, tha dogogin,” iluk yogokhukha.

²Itithogon yogokhukhama at nen yakerek 'bugurlagat meke ageikhe waikhikhemo oba wageikhemo nen, it emenogo inelokhoma meldekhe dogolik,

³men yogeisasikhe, “Hit akhuni yi, hinobabut hebelatluk hinobabut yekerugi yi inobabut hakene hagatlasugun dek halok he, nopase kok pogot oba meke apma 'bisekherekma etoma ukugun motok dek o, iluk eberogonat yokhisigi.

⁴At tha nen, An erlok dek meke, iluk obabut yekerek yi obabut hakene etaiken ekaerek nen thebetdakhalok thebekhogon dogogin halok he, at iti nopase pogot oba meke apma 'bisekherekma etoma kok etaga werek dogogin o.

⁵Nen, tha nen yekerek yi hakene an nobasik waganhe halok he, an nebeat woknabigin o,” iluk yogeisasikhe.

⁶Itithogon yogeisasikhesik ageikhe men yogeisasikhe, “Tha nen yekerugi 'bugurlaktek yi hakene ageikhe etaiken an noba hakotdiluk werekma kolelogo here'anuagaluk akla kagaligin oba an kolelogo here'anhe halok, at akla kagalhe werek iti helekit kok meke arlokopma herle kilogo, i laut yekelekma turlem etoma po la'isaumo i lelepma re, hano o.

⁷It akhuni agat oba meke yoma, it ageikhe nen an kolelogo here'anuagaluk inakla kagalumo motok weak asugun iti nen, eiye, nakmu lak o. An kolelogo here'anuagaluk inakla kagalhe dogogun mekeat he, it inakla kagalugun werek iti Allah nen motok weagarinabigin werek o.

⁸Hiniki nen a? Hinisok nen a, weagathinabusak hagatlaga halok he, ebelake palogo la'isalok, ebelake anek dogolik, iniluk motok dogogunmo etoma ukumo hano o. Meke re, hiniki hinisok iti pereat werekma hetu nagulasusak dekma etoma la'inagoumo weak o. Halok he, ebelake palogo la'isano.

⁹Nen, hinileken nen weagathinabusak hagatlaga halok he, ebelake hemelogo la'isalok, hinileken ebelake anek dogolik iniluk motok dogogunmo etoma ukumo hano. Hinileken pere werekma hetumo la'isaumo weak o. Halok he, ebelake hemelogo la'isano,” iluk yogeisasikhe.

¹⁰Itithogon yogeisasikhesik ageikhe men yogeisasikhe, “It malaikat Allah nen pogot oba nen yoko usa'isa agarek meke nen yekerugi yi hakene therisik dogolik nopase il oba motok welageikharek iti nen, yekerugi iti hinakla meanetdisugup o. [

¹¹An abat itaklasi agagi etnogo akhuni nuk ariogei meke iti herago tilinabigiluk wagagi o.]

¹²Hinakla nikithogon apegep. Ap ageikhe ako domba ebe 100 oba werekma, 99 anek tom oba dageiluk hano werek korlek, opakiat ageikhe nuk atluk nalasi laga halok yabokane herasi lausak dek nogo? Herasi lausagat o.

¹³Ap iti ako arat hera'iluk nen, 99 welageikha meke iti inobasik akla arleken erlok dek negen akhausak mekeat he, opakiat nalasi laga meke iti ebe heratluk anek he, akla arleken motok kogat akhausak o, iluk eberogonat yokhisigi.

¹⁴Iti hakene hinopase pogot oba meke etnogo nen, Yekerugi 'bugurlaktek iti hakene opakiat ageikhe nalasi lausak motok a'it o, iluk akla apekherek,” iluk yogeisasikhe.

¹⁵At Yesus nen itithogon yogeisasikhesik nen, ageikhe men yogeisasikhe, “Hat ageikhe hagarlak haru ageikhe nen weak hagathakhe halok he, hat at oba lalok hipisak hinarligat dogolik, Itithogon hagasusak dek o, iluk pakhogonat asuk watno. Itithogon asuk wakhunem, asuk holhe he, thagalogo hipisak hano asusak.

¹⁶ Mekeat, asuk holhidek halok he, men hagasusak. Allah ane baga holal waganogo 'bekhe dogolik, Akhuni nen it aperek wene inoba 'buogoluk halok, akhuni aperek inebe pere a? Henagan a, weak hagakhunem ineleken hega meke nen, Eberogonat ninileken hogo, iluk isi halok eberogonat apausak, iluk isikhemo holal waganogo 'bisukha iti nen, akhuni inebe pere a? Henagan a, inayoko 'biluk hinom oba lano.

¹⁷Laumo nen, it iti inane asuk holhidegat halok he, Allah a'buri inebe natogorlek werekma yogeisa lano. Yogeisa laumo it Allah a'buri inebe tha'bokhogonat emenogo inane asuk holhidegat halok he, at iti hinagarlak hineru mekeat he, it uang pemerintah hasik kino iluk waganharek meke ina'it meke hakene itikmanke meke arat hagatlaga o, iluk apano,” iluk yogeisasikhe.

¹⁸At Yesus nen itithogon yogeisasikhesik nen, ageikhe men yogeisasikhe, “Wene ageikhe yi yokhisak. Hit nen, agat oba yoma meke hasik, Itithogon hagasusak dek, iluk wene palhep halok he, Allah pogot oba meke nen wene palhe hagat, ugun o. Nen, hit nen agat oba yoma meke hasik, Itithogon hagasusak hano, iluk egep halok he, iti Allah pogot oba meke nen hano ekhe hagat, ugun o.”

¹⁹“Nen, wene ageikhe yi yokhisak. Hit hinebe pere a? Henagan a, an netaga baga natogosugun halok he, an nebe hinakerlekla etoma dogogin iti nen he, hit hinebe pere nen agat oba yoma dogolik, hinetaiken opakiat atluk, hit nen, Ageikhe hagatnisan, iluk, nena meke, Allah ayoko 'bugun meke iti an nopase pogot oba meke nen hinane asuk holiluk hagasiginat o,” iluk yogeisasikhe.

²¹At Yesus nen itithogon yogeisasikhemo, at Petrus oba wageikhesik, men yogokhikhe, “Noe. An nagarlak ageikhe nen weagatnakhe halok he, wene iti niki meren oba thagalogo degetdisausak nogo. Hurli niki 7 baga nen thagalogo degetdisausagat a? Erlok dek a,” iluk yogokhikhemo,

²²at Yesus nen, “Hiki 7 baga anek thagalogo degetdisaumo motok erlok dek o. Akhuni inebe 70 meke iniki 7 baga dopok asi aga halok he, thagalogo degetdisekhe dogosagat o.

²³Itithogon hakene nopase kok pogot oba meke 'bisekherekma etoma ipisak higit, ap kok etagapogot ageikhe ameke agarumi nen hago welagoukha meke waisasikhe. An anek thaburogo 'banhama a? It ageikhe inoba palegeke werek a, iluk iki wenasigiluk waisasikhemo wagoukhama

²⁴ameke emenogo iki wenakhunem, agarumi emenogo ageikhe uang juta motok doalegat oba palegeke welageikhe meke oba wolok wagoukha.

²⁵Wolok wagunem, 'bikhasikhe meke, at nen oko wogosusak he, erlok dek ageikhemo, at ap kok etnogo nen agarumi aperek men yogeisasikhe, Ap yi ebe men, age men, a'buri men, ameke yi meke ti meke men, motok tha'bokhogonat oko paliluk nen, oko waganugun meke iti an woknesitno, iluk yogeisasikhe.

²⁶Itithogon yogeisugunem, at atuaneke etnogo nen itibagal yukukhogon heagei wakhe dogolik, men yogokhikhe, Nopase. Hetaiken hakmu nen, il opakiat huk dogono. Yabokane wokhesiginat o, iluk yogokhikhemo

²⁷at kok etnogo nen, at atuaneke etnogo akmu ageikhesik, Halok he, an nameke hat hoba palegeke meke iti werlegat atno. Thogotdisigi, iluk wene thagalogo degetdisalok la'isikhe.

²⁸Itithogon la'isikhemo, at atuaneke etnogo olilu dukhisikhe hak, at agarlak ap kok etnogo atuaneke ageikhe, at ap dukhisikhe etnogo auang 1.000 meke herlekha'bugat wogokhikhe meke oba palegeke werekma ipisak abuk agoukha. Abuk agoukhasik ebe hakhasikhesik arlokop ade pethelogo hago dogolik, Nameke hoba palegeke werek etnogo oko woknom, iluk yogokhikhemo

²⁹at agarlak etnogo apma thebe iluk heagei wakhe dogolik, Nagarlak e. Hakmutnealok il opakiat huk dogono. Wokhesiginat o, iluk yogokhikhe mekeat he,

³⁰agarlak etnogo nen, Na'it o, iluk ap iti oba palegeke meke oko aban wogokhidek werek korlek, ap iniki herle warogo 'bisegarekma kola'iluk dogoagaluk wogeisasikhe.

³¹Itithogon hagakhunem, ap kola'isikhe meke iti agarlak lak aperek nen inileken hasukhasik inakla motok weak ageikhesik, it nen yabokane yoko ap kok etnogo wene tha'bokhogonat yogosi agoukha.

³²Yogosi agoukhama ap kok etnogo nen ap iti wisuagaluk isikhemo, wageikhemo men yogokhikhe, Yak yi! Hat hobabut motok weak yi re! An nameke hat hoba palegeke welaga meke re, hat hane ha'buarek negen yoknekhe laganma, Werlegat atno, iluk yokhikhi apigi.

³³Mekeat, an hat nakmuthakhi iti hak, hat itithogonat hagarlak iti hakmuratlen he! iluk yogokhikhesik,

³⁴akla aga nen, ap etnogo oba palegeke meke tha'bokhogonat wogokhidek werek korlek, it ap iniki herle warek hagasik welageikharek meke emenogo nen tugi wakhe dogolik, hago dogoagaluk wogeisasikhe.

³⁵Iti hagat, hit hinagarlak lak hinerugi nen weagathinabiogei meke iti hinetaiken nenat thagalogo degetdisigidek halok he, an nopase pogot oba meke nen itithogon hagathinabiginat o,” iluk yogeisasikhe.