Read Mid Grand Valley Dani Matius 20 Bible Online

Matius 20 - Mid Grand Valley Dani bible

Matius 20

¹At Yesus nen yabokane men yogeisasikhe, “Nopase kok pogot oba meke nen apma 'bisekherekma etoma ipisak tak-tak men hakene. Ap yabu iteerek meke ageikhe yabu anggur yabumo wagunuagaluk ap herageinabik hubenat yoko dukhisikhe.

²Dukhisikhesik, ap inayoko 'bisikhe meke inom wene men yogeisasikhe, Hiniki opaki hasik hagakhep halok he, oko uang iniki opaki hasik hagakhunem wogeisegarek hagat, hinebe dopok opakitek wokhisagein o, iluk yogeisasikhemo, it nen, Erlok, iluk yogokhukhama at yabumo la'isasikhe.

³La'isalok nen, o mo wageikhemo dukhisikhe jam 9 hak, it ap aperek ninat meke pasar etoma werlegat werekma ileken hisasikhe.

⁴Hisasikhesik, Warligi yi. Hit he, an nayabu anggur yabumo etoma hinomat wagani lani o. Waganumo an nen oko tak-tagat wokhisagein o, iluk yogeisasikhe.

⁵Itithogon yogeisasikhemo it etnogo lagoukhama, ap yabu iteerek etnogo alebageik hagakhikhe hagat, yabokane itithogonat dikene jam 12 hakene it aperek inayoko 'bigik, hiamaganekeke jam 3 hakene it aperek inayoko 'bigik, hagakhe lageikhe.

⁶Yabokane o hi asigiluk hagakhe korlek jam 5 dukhisikhesik, it aperek werlegat metek werekma ileken hisalok nen, Hit huben nenat yogotak werlegat metek welagap yi nenaluk, iluk yogeisasikhemo

⁷it ap emenogo nen, Yabu ageikhe waganuagaluk ninayoko 'bigidek iti nen welago o, iluk yogokhukha. Itithogon yogokhukhama, at ap ayabu iteerek etnogo nen, Halok he, hit hinomat an nayabumo anggur yabumo etoma wagani lani o, iluk inayoko 'bisikhe.

⁸Itithogon inayoko 'bisikhemo lagoukhama, o arat hi ageikhesikmo, ap ayabu iteerek etnogo nen, it ap emenogo yabu waganho korlek therisik welageikhe meke ageikhe men yogokhikhe, Ap yabu waganiogei meke emenogo waisa lan o. Wageikha halok he, it yabokane ukega meke iti tak oko wogeisalok nen, it alebageik ukega meke iti oko yabokane wogeisanok o, iluk yogokhikhe.

⁹Itithogon yogokhikhemo, it yabokane jam 5 baga wagani lagoukha meke emenogo tak wagoukhama, oko uang yabu iniki opakiat hasik hagakhunem wogeisegarek etnogo tak-tagat opakitek opakitek wogeisasikhe.

¹⁰Nen, yabokane, it alebageik wagani lagoukha meke emenogo inakla nen, Nit kok negen oba dukhogon aperek woknisagein o, apalok wagoukhama mekeat he, oko uang etnogo mekeat opakitek opakitek it alebageik wogeisasikhe hagat, wogeisasikhe.

¹¹Itithogon wogeisekhe korlek, it emenogo uang waganhe dogolik inobabut ua palek hagakhe dogolik, ap kok ayabu iteerek meke etnogo men yogokhukha,

¹²It yabokane wageikha meke yi, satu jam hakene herlekha'bugat hagakhe lageikha mekeat he, nit alebageik lagosik, mo aik weakma ninoba u weak higik waganho meke ninom tak-tagat woknisegen iti nenaluk, iluk yogokhukhama,

¹³ap ayabu iteerek meke etnogo nen, ap it meke ageikhe men yogokhikhe, Nagarlak o. An korlo wokhikhi dek o. Oko uang opakitek wokhisagein igima, I o, iluk egep etnogoat wokhikhi.

¹⁴Wokhikhi meke itiat horlalok lan o. An netaiken nenat it yabokane wagani lageikha meke yi, hat wokhikhi hagat, wogeisagein o, iluk

¹⁵an nekaerek nameke mekeat halok he, an netaiken nenat usak. Itithogon erlok dek apegen a? An niki kogat wogeisigi iti nen hat ua palhe lagan a? iluk yogokhikhe.

¹⁶Itithogon yogokhikhe hak he, it yabokane meke iti alebageik asugun o. Nen, alebageik meke iti yabokane asugun o,” iluk yogeisasikhe.

¹⁷At Yesus nen itithogon yogeisasikhesik, at ebe o Yerusalem usagaluk, at ane waganhe lagoukha meke inebe 12 emenogo waisasikhesik wogosik inarligat holagarlem usa'aga dogolik men yogeisasikhe,

¹⁸“Nagarumi. Nit yogotak, o Yerusalem usa lago. Arat usa lago halok he, an abat itaklasi agagi etnogo, ap nen yoko lalok an nebe it ap Allah iteerek inougi koktek men, it ap Allah ane holal waganek iteerek meke men, inikimo 'banumo, it nen ap aperek nen nasuagaluk ukum noba 'bugun o.

¹⁹Ukum noba 'biluk nen, it ap itikmanke meke nen inane aik dagok yoknikhik, tugi la'bisoko tugi nakhik, hagatluk nen nebe o baga meldaniluk nasuagaluk wogeisagun o. Nen, arat nakhunem, niki pere warek dogoluk nen, niki ageikhe baga yi Allah nen nilugutnabigin o,” iluk yogeisasikhe.

²⁰At Yesus nen itithogon yogeisasikhesik werekma, at Zebedeus age nen eagei wogosik Yesus oba wageikhesik itibagal yukukhogon heagei wakhe dogolik, “Nit ageikhe kino yokhisuogoluk hoba wago,” iluk yogokhukhama

²¹at Yesus nen he, “Hat hakla nikithogon apalok nen egen,” iluk yogokhikhemo, at he etnogo nen, “An neagei pere ya, akhuni tha'bokhogonat hat hapma 'bisageinmo etoma halilu, at ageikhe hiki ebeke, nen ageikhe hiki paike, kok dogoagaluk meldisanogoluk yokhikhi o,” iluk yogokhikhe.

²²Itithogon yogokhikhemo, at Yesus nen, “Hit kino yoknekhep iti, wene ebe hinokodegat dogolik yoknekhep o. An yi aik ti aik hagatnabugun iti hit itithogon hagathinabusak erlok apegep?” iluk u hak, “An nagei henago nigin iti, hit erlok nausak apegep?” iluk yogeisasikhemo, it nen, “Erlok nausagat o,” iluk yogokhukha.

²³Itithogon yogokhukhama, at Yesus nen, “An yi aik ti aik hagatnabugun iti hak, hit itithogonat hagathinabugun mekeat he, hat ageikhe an niki ebeke, nen ageikhe niki paike ninom kok dogouogoluk iti anek he, an nen meldinagusak, erlok dek o. An nopase nen haganeat nen dogoagaluk witaberogo 'bisasikhe mekeat 'bisagein o,” iluk yogeisasikhe.

²⁴Itithogon yogeisugunem, it at agarumi aperek inebe 10 nen inasuk holhukhasik nen, inakla aga it ap inebe pere oe agot ipisak eranogo inoba 'bisukha.

²⁵Inakla aga itithogon inoba 'bisukhama, at Yesus nen inebe tha'bokhogonat natogosuagaluk waisasikhemo natogokhukhama men yogeisasikhe, “It akhuni itikmanke meke inougi pemerintah meke nen mep dageik-dagokhogon hagarinakhik, nen it ap koktek iti nen, inagarumi hagakhe dogoagaluk, inane hin motok han motok yogeisigik, hagakharek iti hinilu.

²⁶Meke re, hit nen it hagakharek iti hak, itithogon hagakhe dogosak motok dek o. An abat itaklasi agagi etnogo, hit akhuni an natuaneke dogolik yi meke ti meke hagatnekhe dogobageik iluk wagagi dek o. At he, an nen hit hinatuaneke dogolik, hit hinebe herle warek negen welagap meke iti, hinebe doalegat hisalhinabigiluk, anat nasuagaluk wagagi iti. Iti hakane, hit ageikhe tha nen, An inoe kok asigin, apasi halok he, hinagorat asuak. Nen, hit ageikhe tha nen, An netaga kok asigin, iluk, apasi halok he, hinatuanekeat asuak o,” iluk yogeisasikhe.

²⁹Yesus inom itithogon hagarik lagoukhasik o Yeriko nen dukhisukha hak, akhuni motok doalegat inoporlik lagoukha.

³⁰Lagunem ap inebe pere inileken puk meke holagarlem hurek werekma, akhuni nen, “Yesus wiriogo,” iluk isukhama inasuk holhukhasik, inane kokhogonat, Yesus men yogokhukha, “Daud nen itago meke ninoe a! Hakmutnisan o,” iluk yogokhukhama,

³¹it akhuni inebe doalegat emenogo nen, “Hinane o,” iluk wenageisasukha. Itithogon wenageisasukha mekeat he, it emenogo nen inane yabokane ebenageik kokhogon yogokhe dogolik, “Daud nen itago meke inoe a! Hakmutnisan o,” iluk yogokhukha.

³²Yogokhukhama, at Yesus ebe melatluk waisasikhemo wagoukhama, men yogeisasikhe, “Warligi yi! An nen nikithogon hagathinabuagaluk yoknekhep,” iluk hilok waganhikhemo,

³³it nen, “Ninoe. Nit ninileken puk yi hano hagatninabinogoluk yokhekho o,” yogokhukha.

³⁴Itithogon yogokhukhama at Yesus nen akmurinakhikhesik nen, iki inileken oba thebekhogon hageisasikhemo eranogoat hano agoukhasik nen, Yesus oporlik lagoukha.