Read Mid Grand Valley Dani Matius 22 Bible Online

Matius 22 - Mid Grand Valley Dani bible

Matius 22

¹Yesus ebe hakhigidek thogotdisukhama, yabokane at nen wene ageikhe oba lisogon akhuni emenogo men yogeisasikhe,

²“Nopase kok pogot oba meke apma 'bisekherekma etoma ipisak higit, ap kok etagapogot ageikhe a'but age waganhe dogolik pesta isakhukha hagat o.

³Isakhe dogolik akhuni inayoko 'bisikhe meke nasuagaluk, at atuaneke meke aperek men yogeisasikhe, Akhuni inayoko 'bigi emenogo wisuak nen woginabi lani o, iluk, la'isasikhe meke re, it inayoko 'bisikhe meke iti ina'it nen wageidek huk agoukha.

⁴Wageidek huk agoukhama, yabokane atuaneke ninat meke men yogeisasikhe, Akhuni inayoko 'bigi meke emenogo wisuak nen he, woginabi lani o. Lalok nen, Ninoe nen men ekhe ino, Sapi kulok kok meke men, sapi eagei aperek koktek meke men, motok tha'bokhogon warogo arat isago 'biluk, yi meke ti meke arat tha'bokhogon karelogo 'bigirik arat nausak hagatlaga o. Halok he, wisuak nen yogeisa lani o, ekhemo wago, iluk la'isasikhemo lagoukha.

⁵Yoko yogeisa lagoukha mekeat he, it inayoko 'bisikhe meke iti inakla puk-pakhogon hagakhe dogolik, it aperek inayabulake lageik, it aperek yi meke ti meke oko paluogoluk lageik,

⁶it aperek nen, at kok atuaneke la'isasikhe meke emenogo inebe ha'isalok tugi inakhik, inebe motok ka'bukhogon inakhik, hagakhukha.

⁷Itithogon hagakhukhama, at ap kok etagapogot etnogo asuk holhikhesik, akla aga dageiluk agarumi tentara meke la'isasikhemo lagoukhasik, at ap kok atuaneke inakhukha meke emenogo inebe motok warogo, podisalok, inai halek kota etoma motok hali 'bisukha.

⁸Itithogon arat hagakhukhama, at ap kok etagapogot etnogo nen atuaneke meke emenogo men yogeisasikhe, Pesta arat isakhi mekeat he, it akhuni inayoko 'bigi meke iti nako isago nasusak dek aga. Na'it.

⁹Halok he, hit holak kok atoalma eloma lalok werekma, akhuni aperek lago halok, Pesta isagoma na luok o, iluk, inayoko 'bino, iluk yogeisasikhemo,

¹⁰it atuaneke meke emenogo yabokane holak kok atoalma etoma lagoukhasik werekma, akhuni inobabut weak meke, hano meke, lagunem inom abuk agoukha meke tha'bokhogonat inayoko 'bisukhama wagoukhama, o etnogola inebe motok kerlek ageikhe.

¹¹Arat kerlekhogon ukisukhama, at ap kok etagapogot etnogo ileken hisagaluk uma ukisikhe meke, ap opakiat ageikhe su humi iginakhe dogolik pesta isago nuogoluk ikharek meke ugu dek werekma ileken lakhasikhesik men yogokhikhe,

¹²Yak yi. Hat he, su humi iginakhe dogolik pesta isago nuogoluk ikharek meke iti ikhidek uki agan yi, nikithogon uki agan, iluk yogokhikhe mekeat he, ap etnogo ane motok igidek huk ageikhe.

¹³Ane motok igidek huk ageikhemo, at ap kok etagapogot etnogo atuaneke meke emenogo men yogeisasikhe, Ap iti iki isok motok herle warogo, itikmanke inaik kirlidik mak-mak hagakhe dogolik di ago de ago hagakharekma o motok mummo etoma ula'isani o, iluk yogeisasikhe.

¹⁴Iti hakene, Allah nen akhuni inebe motok doalegat inayoko 'bekherek mekeat he, inebe pererlagat anek witaberogo 'bisagein o,” iluk yogeisasikhe.

¹⁵Yabokane, it ap Farisi meke nen, “Nit Yesus ileken waganogo oba hinok waganhunem, ane igin oba wene oba 'buok,” iluk abok palhe lagoukha.

¹⁶Abok palhe lagoukhasik nen, ap it inagarumi inane waganhe lagoukha meke inom, it ap Herodes werekmake meke inom, Yesus oba wene hinok waganuagaluk la'isa agoukhama it wagoukhasik nen, men yogokhukha, “Yesus noe. Hat hobabut wene eberogonat anek ekhe dogolik, Allah akla nen, Akhuni yigithogon hagakhe dogoak, iluk apekherek meke eberogonat yakulnisekhe lagan iti nit ninilu o. Akhuni inebe hayuk degat dogolik inelokhoken oba anek hisalok, ageikhe helokhoma 'bisigik, ageikhe hoporlike 'bisigik, hagakhetek dek heekhe lago.

¹⁷Halok he, hat hakla nikithogon apegen? Nit Yahudi meke hagakhorek tak-tagat uang pemerintah hasik kok etagapogot Kaisar wogosusak a? Dek a,” iluk yogokhukhama

¹⁸at Yesus nen it ap inobabut weak ekagat palhikhesik nen, “Hit hinoado baga anek hano thalek dogolik, hinetaiken pere meke yi re! Nenaluk nobabut paluogoluk hagakhe lagap.

¹⁹Uang pemerintah hasik 'busak meke etnogo nileken hak nen inugutneani,” iluk isikhemo uang etnogo ageikhe wogokhukhama,

²⁰at nen he, “Yi tha elokhoken hagarek oba etaga holal waganek werek?” iluk yogeisasikhemo,

²¹it nen he, “Ithi Kaisar at o,” iluk yogokhukhama, at Yesus nen, “Kaisar ameke halok he, Kaisar wogokhik, Allah ameke halok he, Allah at wogokhik, hagasusak o,” iluk yogeisasikhemo,

²²it emenogo inasuk holhukhasik nen, “Eiye! Nayuk e,” iluk hogoratluk Yesus thogotdiluk o werlekma lagoukha.

²³It emenogo arat lagoukhama nen, o iti bagaat, it ap Saduki meke nen, “Akhuni watlatluk iniluk asugun motok dek,” iluk egarek meke aperek Yesus oba wagoukhasik nen, men yogokhukha,

²⁴ “Noe. At Musa nen men iluk yakulnisasikhe, Ap ageikhe a'but aban itakhidek werekma ebe watlaga halok he, obolukmo a'but ageikhe itasuagaluk, he thoge iti ap iti agorat waganusak o, iluk yakulnisasikhe.

²⁵Itithogon isikhe meke werekma nit werekma yoma ap inebe 7 nen inopase opakiat nen itago welagoukha. Dogolik, inoe makusa meke iti age waganhikhesik a'buri itaginakhidekma watlageikhemo agot oporlik meke iti nen, He yi noe age thoge an 'baniluk laga meke, iluk waganhikhe.

²⁶Waganhikhe mekeat he, at iti a'buri itaginakhidekma watlageikheat. Yabokane he thoge meke etnogo inagot inoporlik meke iti nen waganhikhe meke re, itithogonat a'buri itaginakhidekma watlageikhe. Inebe 7 nen emenogo ina'buri itaginakhidekma watlaga lagoukha anek.

²⁷Itithogon watlagoukhasikmo yabokane ebe yabokane, he etnogo ebe watlageikheat.

²⁸Halok he, it ap inebe 7 meke iti, he opakiat meke iti waganhukhasikmo, yabokane Allah nen akhuni warek meke inilugurinabigin itinem, he iti tha hak age asigin apegen,” iluk hinok waganhukhama,

²⁹at Yesus nen men yogeisasikhe, “Hit he, Allah ane holal waganek iti inom, Allah obatne iti inom, hinokodek dogolik, hinane korlo egep higi.

³⁰Akhuni warek meke Allah nen inilugurinabigin itinem, humi woginakhik, iginakhik, hagakhe dogogun motok dek o. Mekeat he, it malaikat pogot oba meke welageikharek iti hakeneat dogogun o.

³¹ Nen, akhuni watlasugun meke Allah nen inilugurinabigin iti anek he, at nen, Abraham inom, Ishak inom, Yakub inom, inopase Allah anat o, iluk isikhemo, at ane holal waganek werek etnogo etaga thalhidek welagap nogo? Etaga thalhethebat o. At Allah akhuni warek meke inopase 'buk. At he, akhuni iniluk meke inopase o,” iluk yogeisasikhemo,

³²

³³it akhuni doalegat emenogo inasuk holhukhasik nen, “Eiye! Nayuk e,” iluk hogorakhukha.

³⁴At Yesus nen wene itithogon yogeisasikhemo, akhuni nen he, “Yesus nen it ap Saduki meke wene yogeisekhemo, it nen oko usak erlok dek aga,” iluk isukhama, it ap Farisi meke inasuk holhukhasik inebe natogotdiluk,

³⁵ap ageikhe Allah ane holal waganek yakulisekhe lageikhe meke nen, Yesus obabut paligiluk oba hinok waganhe dogolik, men yogokhikhe,

³⁶“Yesus noe. Wene Allah nen ninasuk wakhikhe wene etnogo, wene ebe kok motok hakene ki isikhe apegen?” iluk yogokhikhemo

³⁷ at Yesus nen he, “Wene kok he, at Musa nen, Hinetaiken men, hinobabut men, hinakla men, opakiat atluk, ninopase Allah Etagapogot ebe itiat hinetaiken hunik dogono o, iluk isikhe iti,

³⁸wene ebe kok hakene itiat o.

³⁹ Nen, wene iti ipisak tak-tak he, ageikhe yi, Hit hinekaerek hinebe hinetaiken hunik welagathep iti hakene, it akhuni aperek hinom welagathep meke iti hinetaiken hunik dogono o, iluk isikhe meke kok ageikhe iti.

⁴⁰Wene at Allah nen, Yigithogon hagatno, itigithogon hagatno, iluk ninasuk wakhikhe wene tha'bokhogonat inom, wene it ap Allah ane yogeisekhe lagoukha meke nen isukha wene tha'bokhogonat inom, wene kok pere eta baga irlelek werek o,” iluk yogokhikhe.

⁴¹At Yesus nen itithogon yogeisasikhesik nen, it ap Farisi meke emenogo natogorlek werekma, at nen hinok inoba waganhe dogolik,

⁴²men yogeisasikhe, “Hit hinakla nen, Kristus Allah nen ayoko 'biluk la'isigin isikhe etnogo, ebe tha apekhe lagap? Nen, opa tha nen itago meke apekhe lagap?” iluk yogeisasikhemo, it nen he, “At iti Daud nen itago mekeat o,” iluk yogokhukha.

⁴³Itithogon yogokhukhama, at Yesus nen he, “Halok he, Allah Agoreke nen Daud akla kagalhikhemo, at nen he,

⁴⁴ Allah Etagapogot nen an noe Etagapogot yogokhe dogolik, Akhuni hat thili meke emenogo hisok nen al debelogo 'bisanok nen, an nen hoba 'bisa'ageidek werek korlek, hat an nalilu niki ebeke hurek dogolik hebe kok dogono, iluk Allah nen Kristus yogokhikhe, iluk Daud nen isikhe iti, nenaluk isikhe apegep.

⁴⁵At Daud ekaerek nen Kristus ebe hasik, An noe Etagapogot, isikhe halok he, hit nen, Kristus iti Daud nen itago meke o, iluk, nikithogon usak apegep. Itithogon usak erlok dek o,” iluk yogeisasikhemo

⁴⁶it nen wene oko nikithogon yogosu heat hagatlageikhemo, hurli iti hurli nen, yabokane akhuni tha'bokhogonat nen wene ageikhe hinok waganu inayuk ageikhe.