Read Mid Grand Valley Dani Matius 24 Bible Online

Matius 24 - Mid Grand Valley Dani bible

Matius 24

¹At Yesus Allah ai helekma nen dukhisikhesik lagunem, at agarumi ane waganhe lagoukha meke emenogo oba wagoukhasik, men yogokhukha, “Allah ai halek iti hileken lakhan,” iluk yogokhukha.

²Itithogon yogokhukhama, at nen he, “Hit o halek ethoma tha'bokhogonat hegep a? Helekit oba thapapal halek ethoma ageikhe thogotdigidek, motok tha'bokhogon misak dapukhogon la'isagun o, iluk, eberogonat yokhisigi,” iluk yogeisasikhe.

³Itithogon yogeisalok, tom Zaitun ukul oba dageisikhesik hurek werekma, at ane waganhe lagoukha meke emenogo oba wagoukhasik inarligat dogolik, men yogokhukha, “Hat nen yoknisegen etnogo, mera nen hagatlasigin? Hat hebe wageik, o ilugun oba hagatlageik, arat hagatlasigiluk hagakhe korlek, nena meke tak hagatlagunem nit ninetaiken eketlasugun. Wene hutukhogon yoknisan,” iluk yogokhukhama,

⁴at Yesus nen he, “Akhuni nen nukhetdinageinogo iluk, hinobabut hebelogo dogono o.

⁵Akhuni inebe doalegat nen inetaga an netaga meke thalogo nen men ilik wisugun, Kristus etnogo nebe wagei yiat o, iluk, inane eberogonat thalek akhuni doalegat nukherinabisugun o.

⁶Itithogon hagatlaga korlek, wim kagaldiluk horogat yakhunem inane hinasuk holhik, walegat yakhunem inabok holhik, hagakhe dogolik, hinetaiken aborlok ugup o. Itithogon hagatlasigin mekeat he, o ilugun hurli baga hagatlasigin meke iti abanat o.

⁷Yi akhuni ti akhuni inukuloak etaga tomok wim kagalhik, ap inetagapogot inagarumi inapma meke tomok wim kagalhik, o yi ai ti ai hipiri no ageik, dugul aborlok luk-lagathigik, hagasigin o.

⁸Meke re, iti humi elege itaginabuogoluk hinet wakharek iti hak, alebageik hugun itiat o.

⁹Itinem he, it akhuni inukuloak etaga tomok nen, an netaga ilik, Hit he, at agarumi, iluk hinebe ina'it motok hagathinakhik hinebe hakhinabiluk, it aperek nen tugi hinakhik, hinebe motok hinakhik, hagasuagaluk inoba wokhisik laga dogogun o.

¹⁰Itithogon hagakhe korlek, it akhuni aperek inetaiken Allah oba hakotdisukha mekeat he, inebe doalegat inakla puk atluk, thogotdisalok dukhiluk, at ageikhe nen at ageikhe wasuagaluk wolok lageik, ageikhe nen ageikhe a'it nen anini oba 'bigik, hagasugun o.

¹¹Nen, it aperek inekalat Allah ane yogeisiliogei meke thalek hagatlatluk hinoba witluk nen, akhuni motok doalegat nukherinabugun o.

¹²Itithogon motok hagatlarik waga dogoumo, it akhuni inobabut motok korlo hagatlatluk, it-it inakmurogo dogogun meke iti yabokane inetaiken ko'bot arik wisugun o.

¹³Mekeat he, tha nen etaiken thebekhogon obakhanini hapugutdiluk motok dogogin halok he, o ilugun hurli baga Allah nen tiligin o.

¹⁴Nen, Allah nen apma 'bisagein meke hano wene yi, yi akhuni ti akhuni motok inilu asuagaluk o yi ai ti ai yogeisilik lagap halok he, o ilugun hurli baga arat hagatlasigin o,” iluk yogeisasikhe.

¹⁵ Itithogon yogeisasikhesik, yabokane ageikhe men yogeisasikhe, “Hit nen holal waganek yi etaga thalhe dogolik, hanorogon hutdekhe dogono o. Ap Daniel Allah ane yogeisekhe lageikhe meke etnogo nen ekhe dogolik, Akhuni nen inalilo meke hagakhunem agorlerogon lo lugun meke o Allah ekaerek ai melaga halok,

¹⁶akhuni o Yudea eloke meke etoma lo tom obake dagouak o.

¹⁷Lo dagouogoluk halok, akhuni aperek o warleke baga dageiluk werekma, inapuke usatluk nen inameke yi meke ti meke uma wagani ukusak dek o. Lo piokthegat dagouak o.

¹⁸Nen, it akhuni aperek wen atomke nen, hipirikamake nen, inapuke uma inasu wagani ukigidek etoma nenat lo piokthegat dagouak o.

¹⁹Itithogon dageikhe dogolik, it humi ineak akla meke iti men, ineagei ket itago irlak aban niliogei meke iti men, weak hugun iti, eiye! Nakmu lak e!

²⁰Hit lo lugun iti, o weak oba a? Hiniki 7 baga Allah hasik werlegat werek korlek a, launogo iluk, sembayan isi dogono o.

²¹O itinem weagat asigin iti, ebekeram Allah nen yi meke ti meke walhasikhe iti hurli nen logat, o yogotak ya hurli, iti hakene itithogon ageikhe hagatlageidek. Nen, yabokane ageikhe motok hagatlasigin dek mekeat he, opaki hasik itiat weak kok hagatlagunem hugun o.

²²Weak hagatlagunem hugun iti, at Allah nen, Hurli yi hurli arat o, iluk igidek kamotdilepma, akhuni tha'bokhogonat tilinakhidek weagat atlep o. Meke re, at a'buri wenageinakhikhe meke inobasik anek, Yogo. Weak arat hegep o, iluk, hurli wasigin werek o.

²³Itinem, it akhuni aperek inekalat ekhe dogolik, Kristus etnogo nebe anat o, igik, nen it aperek nen, Allah ane yokhisegerek meke etnogo nebe anat o, igik, i wisugun o. Witluk nen, Akhuni Allah nen wenageinakhikhe meke emenogo nukhetdisausak a? iluk nukhetdisauwogoluk inane eberogonat thalek apoagaluk hagasusak dek meke elalin meke hagarik wisugun o. It aperek nen, Kristus etnogo yi waga yi 'bikhani, igik, it aperek nen, Kristus etnogo ili waga ili lakhani, igik, ugunem hit hinakla nen eberogonat iluk apugup o.

²⁴

²⁵Wene iti aban hagatlageidek werek korlek husupi tak yokhhisigi iti hanorogon hutdekhe dogono o.

²⁶It akhuni aperek nen yokhisekhe dogolik, Lakhani! At etnogo o limo eloma werek o, isi halok he, hinileken lakha lagup. Nen, it aperek nen, Lakhani! At etnogo uma aburarekma limago werek o, isi halok he, hinakla nen eberogonat iluk apugup o.

²⁷Iti re, an abat itaklasi agagi etnogo wisigin he, o yabok o mo dagei agarekma eloma nen opaki hasigat yegethasinem, o mo ukekherekma yibakha lagarek iti hak wisigin o,” iluk itithogon yogeisasikhesik,

²⁸“Warek meke werekma, thue warek nekarek meke iti etoma natogosi lagarek o,” iluk yogeisasikhe.

²⁹ At Yesus nen itithogon yogeisasikhesik, yabokane ageikhe men yogeisasikhe, “Weak kok itithogon halok oba nen iniki doalegat welageidek nen, O mulikin mum ageik, thut yakhidek huk ageik, husagal pogot oba nen kilelogo usa'ageik, pogot oba inobatneak welageikharek meke iti Allah nen inaborlogotdigik, hagasigin o.

³⁰Itithogon hagakhe korlek, an abat itaklasi agagi etnogo arat wisigin iluk, akhuni inetaiken ekerlogo hutduagaluk pogot oba ageikhe hagatlatluk oba nen, akhuni inukuloak etaga dopok deku makhe korlek nobatnerogonat oisa akla usa'agunem, inileken nealok kokhogonat hogotnabugun o.

³¹Itithogon waga dogolik, an nen it malaikat Allah nen pogot oba nen yoko usa'isa agarek meke emenogo yoko la'isa aga dogolik, napikon ane kogat pakhogon isinem, it nen akhuni an nen wenageinakhigi meke emenogo, o wema elomake, upu elomake, ilike, yike, o pogot erlomake erlomake eloma nen motok natogorinabugun o,” iluk yogeisasikhe.

³²At Yesus nen itithogon yogeisasikhesik, yabokane ageikhe men yogeisasikhe, “Wene yi o ara oba lisogon yokhisagein yi hutdisano o. O eka dabeligiluk hagakherek etnogo meke oba lisogon yokhisak. O ara iti eka lologo usekherethek yabokane asi'bat dageigik, eka dabelhik, hagakhunem, hinileken halok hinakla nen, Yogo. O arat hibi asigin higi, iluk hinakla hutdegethep iti hak, an nen,

³³Itithogon hagatlasigin, iluk yokhisigi etnogo, ebe tha'bokhogonat hagatlagunem hinileken halok nen, Yogo. O ilugun oba hagatlasigin etnogo horok asi aga higi, iluk, hinakla apano o.

³⁴Yigithogon hagatlasigin, itithogon hagatlasigin, iluk yokhisigi iti, akhuni o yogotak werek meke inebe aperek dek ageidek aban werek korlegat ebe tha'bokhogonat hagatlasigin o, iluk, eberogonat yokhisigi.

³⁵Pogot inom, agat inom, iti dek asigin mekeat he, an nane iti dek asigin motok dek o,” iluk yogeisasikhe.

³⁶At Yesus nen itithogon yogeisasikhesik, wene ageikhe men yogeisasikhe, “An wisigin he, o itinem, jam iti baga wisigin iluk, akhuni motok inokodek. Nen, malaikat Allah nen pogot oba nen yoko usa'isa agarek meke emenogo inokodegat. Nen, an nebe Allah a'burat meke re, nokodegat. An nopase Allah arligat ilu o.

³⁷It akhuni ap Nuh werek oba eta hagakhe lagoukha tak-tagat, an abat itaklasi agagi etnogo yabokane itithogonat hagakhunem wisigin o.

³⁸I thaluk-paluk isikhe iti, aban ikhidek werek korlek, it akhuni etoma nen hipiri nikik, eken apusu nikik, ap nen humi woginakhik, it aperek nen igisigik, hagakhe korlek, at Nuh etnogo ku akla ukisikhe.

³⁹Ku akla ukiluk werek korlek, it akhuni emenogo inokodegat werekma, i arat thaluk-paluk dageikhe dogolik motok hotnokhogon inakhikhe. Iti hak he, an abat itaklasi agagi etnogo yabokane wisigin tak-tagat he, itithogonat hagatlasigin o.

⁴⁰Itinem ap inebe pere wen waganhunem ageikhe waganhe dogolik, ageikhe thogotdigin o.

⁴¹Nen, humi inebe pere inapiri gandum meke werasuogoluk thagalhunem, ageikhe waganhe dogolik, ageikhe thogotdigin o.

⁴²Itithogon hagatlasigin iti nen hit nen, Ninoe Etagapogot mera wisigin, hinokodek iti nen, hinobabut hebelogo dogono o.

⁴³Nen, ap aila iteerek meke ageikhe akla nen, O yogotak hibako, jam iti baga naila yoma ap ageikhe iki abusak waganigiluk ukisigin, iluk, ilu dogolepma re, at ebe aila iti thuam motok werekma, aila o pin talogo iki abusak wagani ukilep dek, iluk, hiniluat apigi.

⁴⁴Iti hak he, hit hinakla nen, At itinem wisigin, iluk apigidek akhirak werek korlek, an abat itaklasi agagi etnogo, arat wisigin iti, hit hinebe karelogo dogono,” iluk yogeisasikhe.

⁴⁵At Yesus nen itithogon yogeisasikhesik, yabokane ageikhe men yogeisasikhe, “Ap kok meke ageikhe atuaneke therisik dogolik inapiri wogeisausak tak-tagat wogeisekhe dogoagaluk, at atuaneke meke ageikhe ayoko 'bisinem, at akla kagalek dogolik obabut oe ane igin meke tak-tagat hagakherek iti tha apegep. At iti oe iti nen meldiluk lagarek o.

⁴⁶Meldiluk lagunem, atuaneke etnogo itithogon mothogon hagakhunem ileken 'bikha aga halok, atuaneke meke etnogo akla arleken motok akhagein o.

⁴⁷Itithogon hano hagakhunem, 'bikhatluk, oe etnogo nen, An nameke yoma tha'bokhogonat hat hiki baga dogoak o, iluk meldigin o, iluk, eberogonat yokhisigi.

⁴⁸Mekeat he, at atuaneke meke iti, obabut weak halok he, akla nen, Noe etnogo ibat wiriogo dek. Dogoluk nen wisigin higi, iluk,

⁴⁹agarlak lak inoe kok etnogo atuaneke meke aperek tugi inakhik, it ap anggur apusu hunu-hunu paluogoluk nekarek meke inom dapukhogon dogolik, hipiri men, anggur apusu iti meke men, nikik,

⁵⁰hagakhe dogolik, at nen, Noe etnogo itinem, jam iti baga wisigin, iluk, okodek motok akhiragat werekma oe kok etnogo wisigin o.

⁵¹Itithogon werekma oe etnogo witluk nen, at atuaneke etnogo karok oba ebe motok obakha 'bogokhogon warogo, it akhuni inoado baga anek hano thalek inetaiken pere dogolik hagakharek meke la'isekherekma etoma la'isaumo, etoma dogolik, aik kirlidik mak-mak hagakhe dogolik, di ago de ago hagakhe dogogin o,” iluk yogeisasikhe.