Read Mid Grand Valley Dani Matius 25 Bible Online

Matius 25 - Mid Grand Valley Dani bible

Matius 25

¹At Yesus nen itithogon yogeisasikhesik, wene ageikhe men yogeisasikhe, “Nopase kok pogot oba meke apma 'bisekherekma etoma ipisak tak-tak he, homagarlugi inebe 10 meke nen lampu yibarlogo wolok ap age ikhekhe meke etnogo wagunem elokhoma lagoukha iti hakeneat o.

²Elokhoma lagoukha meke re, inebe 5 ebetlake nen, inetaiken werek. Nen, inebe 5 ebetlake nen, inetaiken dek meke welagoukha.

³It inetaiken dek meke emenogo lampu wolok lagoukha mekeat he, minyak dek agunem hasik aperek henago wolok lageidek.

⁴Nen, it inetaiken werek meke eranogo anek nen, lampu inom, isoak ageikhe minyak henago inom, wolok lagoukha.

⁵Meke re, ap age ikhekhe meke iti ebe wageidek motok erapigat werek nen, it emenogo inebe tha'bokhogonat arat noge inil ageikhemo etoma noge motok isukha.

⁶Itithogon noge isi korlek, hibako eketurlemat, it akhuni nen, Ap age ikhekhe meke etnogo ebe waga ili. Elokhoma witni o, iluk, inane amitmit kokhogon isukhama,

⁷it homagarlugi emenogo iniluk agoukhasik nen, lampu herle hagarogo yibarlik lagoukha.

⁸It inetaiken dek meke emenogo nen, it inetaiken werek meke emenogo yogeisekhe dogolik, Lampu nit meke nagulariogo. Halok he, minyak hit meke ageikhe woknisani o, iluk, kino yogeisasukhama,

⁹it homagarlugi inetaiken werek meke emenogo nen he, Dek o. Ato kelelogo hit wokhisigik, aperek nit horligik, hagasumo, dek asigin o. Halok he, oko paliogeima etoma hit nen aperek oko pala lani o, iluk yogeisasukhama,

¹⁰oko pala lagoukhama, at ap age ikhekhe meke etnogo arat wageikhesik, it inetaiken werek meke karelogo 'bakhalok welagoukha meke emenogo inom pesta isago nuogoluk wogosik uma ukisikhesik thu lakhikhe.

¹¹Thu larogo ukiluk werekma, it homagarlugi ebetlake emenogo wagoukhasik nen, Nopase, thu hualnisan o, iluk yogokhukhama,

¹²at nen, Hit iti thani. Hinebe an nokodek o, iluk, eberogonat yokhisigi,” iluk yogeisasikhe.

¹³Yesus nen itithogon yogeisasikhesik nen, “Iti hak, an wisigin iti, hit nen, O itinem jam iti baga wisigin iluk, hinokodek iti nen thetnarik dogolik hinobabut hebelogo dogono o,” iluk yogeisasikhe.

¹⁴At Yesus nen itithogon yogeisasikhesik nen, ageikhe men yogeisasikhe, “Nopase kok pogot oba meke apma 'bisekherekma etoma, ipisak tak-tak, ap ageikhe o walegat nekalokma lagaluk hagakhe dogolik, at atuaneke meke waisasikhemo wagoukhama, at ameke yi meke ti meke it therogo dogoagaluk inikimo 'biluk lageikhe iti hakeneat o.

¹⁵It inobabut palogo inebe dopok wogeisausak tak-tagat wogeisilik lageikhe. Uang kok emas meke ap ageikhe 5.000 wogokhik, nen, ap ageikhe 2.000 wogokhik, nen, ap ageikhe 1.000 wogokhik, hagakhikhe. Itithogon wogeisalok nen, o walegat nekalokma lageikhe.

¹⁶Lageikhemo ap 5.000 waganhikhe meke etnogo uang iti baga yi meke ti meke oko palogo waganhe dogolik, yabokane 5.000 ageikhe inom lapelogo 'bisikhe.

¹⁷Nen, at ageikhe 2.000 waganhikhe meke etnogo itithogonat yabokane 2.000 ageikhe inom lapelago 'bisikhe.

¹⁸Mekeat he, ap ageikhe 1.000 waganhikhe meke etnogo wolok lageikhesik nen, uang oe kok wogokhikhe meke iti agat hulelogo thalogo lima'i lageikhe.

¹⁹Itithogon agatma thaldisikhesikmo inoe etnogo welageikhesik nen yabokane wageikhesik, Uang wogeisasigi emenogo it nen yabokane meren thabukha iluk, waisasikhemo wagoukhama,

²⁰ap uang 5.000 waganhikhe meke etnogo yabokane 5.000 lapelogo 'bisikhe meke wolok wageikhesik nen, Noe. Hat nen 5.000 woknikhigin etnogo lakhan. An nen yabokane 5.000 ageikhe inomat oba lapelogo 'bigima yi o, iluk yogokhikhemo,

²¹at oe etnogo nen, Nagot wa! Hat hano motok. Hobabut hupulik hano motok hagakhe laganma higi o. Pererlagat meke re, wokhikhi meke hobabut hupulik hago welagan iti nen, yabokane motok doalegat hago dogonok iluk, meldageiluk wokhesigin o. An hoe nakla arleken akhekhe lagei hak, nipisagat ninakla arleken akhauwok nen, uki me o, iluk yogokhikhe.

²²Itithogon yogokhikhesik werekma, yabokane at uang 2.000 waganhikhe meke etnogo oba wageikhesik nen, Noe. Hat nen 2.000 woknikhigin etnogo lakhan. An nen yabokane 2.000 ageikhe inomat lapelogo 'bigima yi o, iluk yogokhikhemo,

²³at oe etnogo nen he, Nagot wa! Hano motok. Hat hobabut hupulik hano hagakhe laganma higi o. Pererlagat wokhikhi meke, hobabut hupulik hago welagan iti nen he, yabokane motok doalegat hago dogonok nen iluk, meldageiluk wokhesigin o. An hoe nakla arleken akhekhe lagei iti hak, nipisagat ninakla arleken akhauwok nen, uki me o, iluk yogokhikhe.

²⁴Itithogon yogeisasikhesik werekma, at ageikhe uang 1.000 nen waganhikhe meke etnogo oba wageikhesik nen, Noe. Hat he, hobabut motok weak etnogo nen, it aperek nen ai hilogo la'egarek mekeat he, hiki abusagat eken palhigik, it aperek ai yakharek mekeat, hiki abusagat eken palhigik, hagakhetek etnogo re, hobabut an nilu o.

²⁵Itithogon hagakhetek iti nen, an nayuk nen uang hat meke 1.000 etnogo agat hulelogo lima'i lagei o. Woknikhigin meke etnogo ebe yi! Horlan o, iluk yogokhikhemo,

²⁶at oe etnogo nen, Hat hobabut motok weak hiki waganu weak meke yi! An nen it aperek ai hilogo la'egarek meke eken paligik, it aperek yakharek meke eken horligik, hagakherek nobabut iti hat hilu dogoligat ekhe lagan?

²⁷Itithogon hilu halok he, an nauang iti it akhuni aperek uang hago dogolik, ageikhe inom oba lapelogo 'biliogei meke wogeiselenma, an napuke witluk, nauang ebe meke men, oba lapelogo 'biliogei meke men, horla isuagaluk wogeisauem hagakhen, iluk yogokhikhesik,

²⁸at agarumi ageikhe men yogeisasikhe, It akhuni aperek inikimo hago werek meke iti, yabokane aperek inom oba lapelogo wogeisugunem it meke doalegat hagatlasigin o. Nen, it aperek inikimo dek meke pererlagat dogogin meke iti inikimo nen tilogo horlagein iti nen, ap ithi itithogon hagakhesikmo iti, uang 1.000 iti ikimo nen tilogo ap ageikhe 10.000 waganhe meke ithi wogotni o.

²⁹

³⁰Halok he, at ebe an natuaneke dogosak dek meke yi re, itikmanke o motok mummo inaik kirlidik mak-mak hagakhe dogolik di ago de ago hagakharekma etoma ula'isani o, iluk yogeisasikhe,” iluk Yesus nen yogeisasikhe.

³¹At Yesus nen itithogon yogeisasikhesik, wene ageikhe men yogeisasikhe, “An abat itaklasi agagi etnogo, akhuni nen hogotnakhe korlek, it malaikat Allah nen pogot oba nen yoko usa'isa agarek meke emenogo tha'bokhogonat ninom witluk nen, an hogotnakhe korlek kok Netagapogot welagarekma dogolik,

³²ap ageikhe ako iteerek meke nen, domba halok asokneat hulogo 'bisigik, kambing halok asokneat hulogo 'bisigik, hulogo 'bisekherek iti hak, it malaikat iti nen akhuni inukuloak etaga dopok an nil oba natogorlogo 'bisa agunem, an nen itithogonat hulogo 'bisagein.

³³Hulogo 'bisekhe dogolik, it akhuni domba hakene meke halok, niki ebeke 'bisigik, nen, kambing hakene meke halok, niki paike 'bisigik, hagasigin o.

³⁴Itithogon hulogo 'bisalok nen, an nebe Netagapogot etnogo nen, it niki ebeke 'bisagein meke iti, wene men yogeisagein, An nopase nen hanothinakhemo welagap. Halok he, witni o. An hipiri abu werekma hit nen melaknikhik, i abu werekma hit nen woknikhik, an ap husoat werekma hit nen woknakhik, nasu ugu dek werekma hit nen i'banhik, u warek werekma hit nen 'bitnea ageik, niki herle warek werekma 'bitnea ageik, hagakhigip iti nen, an nopase nen pogot agat aban walhigidek dogolik, hit kok hinetagapogot dogobageik iluk, wenago 'binageisikhe meke yi horlatni o, iluk yogokhunem,

³⁵

³⁶

³⁷it Allah ane hologo hagakhe dogogun meke iti nen, Eiye! Noe! Nit nen hat hipiri abu werekma melakhikhik, i abu werekma wokhikhik, hagakhugu iti re, meranem nen hagakhugu nogo?

³⁸Nen, hat ap husoat werekma wokhakhik, hasu ugu dekma i'bagagik, hagakhugu iti, meranem nen hagakhugu nogo?

³⁹Nen, hat u warek werekma, 'bikhea lageik, hiki herle warek werekma, 'bikhea lageik hagakhugu iti meranem nen hagakhugu nogo? iluk yogokhunem,

⁴⁰an ap kok Netagapogot nogo nen, it akhuni emenogo men yogeisagein, Hit nen an nagarumi inetaga dek meke ageikhe werekma itithogon hagarinakhe lagagip iti, anat hagatnakhe lagagip o, iluk, eberogonat yokhisigi, iluk yogeisagein.

⁴¹Nen, it niki paike 'bisagein meke iti men yogeisagein, An nopase nen hit homan 'binagakhe meke yirani! An hipiri abu werekma, hit nen melaknikhidek, i abu werekma, hit nen woknikhidek, ap huso werekma hit nen woknakhidek, su ugu dek werekma hit nen ageikhe i'banhidek, u warek werekma men, niki herle warek werekma men, 'bitnea lageidek hagakhe lagagip o. Halok he, an nopase nen, at Iblis agarumi inebe doalegat inom, hetu nagulasusak dekma dogoagaluk inoboluk 'bisasikhemo etoma horla lani o, iluk yogeisagein.

⁴²

⁴³

⁴⁴Itithogon yogeisugunem, it nen, Eiye! Noe! Hat hipiri abu werekma, i abu werekma, ap huso werekma, hasu ugu dek werekma, u warek werekma, hiki herle warek werekma, o meranem yomakhiigidek kamotdagasugu nogo, iluk yoknisugunem,

⁴⁵an nen, Dek o. Hit nen akhuni ageikhe inetaga dek meke werekma hinobakhanini thogotdisekhe lagagip iti re, anat thogotdanhe lagagip o, iluk yogeisalok nen,

⁴⁶it akhuni iti yi aik ti aik hekhe dogogun oba motok dogoagaluk la'isagein o. Mekeat he, it Allah ane hologo hagakhe dogogun meke iti iniluk motok dogogunmo etoma 'bisagein o,” iluk yogeisasikhe.