Read Mid Grand Valley Dani Matius 26 Bible Online

Matius 26 - Mid Grand Valley Dani bible

Matius 26

¹At Yesus nen wene iti tha'bokhogonat arat yogeisasikhesik nen, yabokane agarumi ane waganhe lagoukha meke emenogo men yogeisasikhe,

²“Niniki pere dogoluk nen pesta Paskah hagasugun iti hit hiniluat o. Itithogon hagakhe korlek, an abat itaklasi agagi etnogo, ap nen yoko lalok it aperek nen o baga meldaniluk nasuagaluk inikimo 'banugun o,” iluk yogeisasikhe.

³Itinem, it ap Allah iteerek meke inougi koktek meke inom, it ap inarluetek emenogo inom, at ap Allah iteerek meke inoe kok etaga Kayafas etnogo aila natogotdiluk nen,

⁴Yesus inileken wolok limago ha'iluk wasuogoluk abok palhe lagoukha.

⁵Abok palhe dogolik, men isukha, “Pesta kok isago nukunem iti, inaneak kogat walunogo nen, ilugun oba weak asinogo hakhigidek dogoluk, o werlekma halok hakhauwok o,” iluk abok isukha.

⁶Itithogon isukhasik werek korlek, at Yesus o Betania ap Simon u henako hakene inayuk meke haganeat ebemake welageikhe meke iti aila etoma ukisikhesik werekma,

⁷he ageikhe apusu obasi hano oko kogat meke oko palogo isoak helekit meke etaga pualam meke hagarek oba akla ukharlogo wolok Yesus hipiri nasinem oba ukisikhesik nen, ukuloak oba tialogo usakhikhe.

⁸Itithogon usakhikhemo, at Yesus agarumi ane waganhe lagoukha meke emenogo inileken hasukhasik nen, “Apusu we yugunat alomarogo tialhe yi, nenaluk,” iluk, inakla aga dageiluk, he etnogo wenagakhe dogolik,

⁹“Apusu iti oko motok kogat meke palogo nen, it inameke dek meke supurisauem,” iluk isukha.

¹⁰Itithogon isukhama, at Yesus nen inobabut ekagat hutdisasikhesik nen, men yogeisasikhe, “He yi nen hano hagatnakhe mekeat he, nenaluk wenagakhe lagap.

¹¹It akhuni inameke dek meke iti hit hinom motok dogogun mekeat he, an anek he, hit ninom motok dogogun dek o.

¹²At he yi nen apusu tialdanhe iti, an yabokane nakhunem nebe watlasumo, warek thalnabuogoluk watdanu hagat arat watdani aga o.

¹³Nane eberogonat yokhisak. He yi eberek dogoagaluk, akhuni wene hano wene etnogo, o yi ai ti ai yogeisilik nekhe dogolik, He iti itithogon hagakhikhe, iluk abok hano ekhe dogogun o,” iluk yogeisasikhe.

¹⁴At Yesus nen wene itithogon yogeisasikhemo, at agarumi ane waganhe lagoukha meke inebe 12 emenogo meke, ageikhe etaga Yudas Iskariot etnogo, it ap Allah iteerek meke inougi koktek emenogo inoba lageikhesik nen,

¹⁵“An nen Yesus iti wokhisigi halok he, hit nen oko nena meke woknesugun apegep,” iluk yogeisasikhemo, it ap emenogo nen he, “Oko uang perak meke 30 wokhesugun o,” iluk yogokhukhasik nen, wogokhukha.

¹⁶Oko arat wogokhukhama, at Yudas Iskariot etnogo nen, meranem Yesus iti wogeisausak hano iluk akla munini ebekhe lageikhe.

¹⁷Yudas itithogon akla ebekhe korlek, it akhuni Yahudi meke eken roti hikherek meke akla usakhidek werago nekarek etnogo meke nuogoluk dirlu alebageik nekarek meke nuogoluk hagakhe dogolik, it Yesus agarumi ane waganhe lagoukha meke emenogo oba wagoukhasik, men yogokhukha, “Noe, Hat domba pesta Paskah hasik nanok nen, nit nen yi meke ti meke o koma karelogo 'bi lausak warlok apegen,” iluk oba hinok waganhukhama,

¹⁸at Yesus nen, “O kota etnogo lalok nen, ap ageikhe etnaga wene men yogotno. At ninoe wene yakulnisiliogo meke nen he, An hagasigin meke arat horok asi agama nen, an nagarumi nane waganiogei meke ninom, at aila etoma pesta Paskah werago nuok nen yogosi lani o, iluk yoknisekhemo yokhesi ago, iluk yogotno,” iluk yogeisasikhemo

¹⁹it emenogo, at nen isikhe hagat, lagoukhasik nen, yi meke ti meke pesta Paskah etnogo hasik motok nimik-nomokhogon 'bisukha.

²⁰O arat hi ageikhemo, at Yesus agarumi ane waganhe lagoukha meke aperek inom lagoukhasik nen, inebe 12 emenogo inom hurek latluk

²¹pesta neke dogolik men yogeisasikhe, “Hit ap ya meke ageikhe nen, an nebe nasuagaluk yoko ligin o, iluk, eberogonat yokhisigi,” iluk yogeisasikhe.

²²Itithogon yogeisasikhemo, it emenogo inakla motok weak ageikhesik men yogokhukha, “Noe! An a? An dek apigi,” iluk, inebe dopok nen ilik lagoukha.

²³Itithogon ilik lagoukhama, at Yesus nen he, “Hat ageikhe an nipisak niniki opakimo piring akla usageik apusu mago noko mene iti nenat nasuagaluk yoko ligin o.

²⁴An abat itaklasi agagi etnogo, hagasigin meke holal waganek werek tak-tagat hagasigin mekeat he, at ap nebe nasuagaluk yoko ligin meke iti anek he, eiye. Motok weagat asigin o. At ap iti itaklatlep dekma, hanoat dogolep meke,” iluk yogeisasikhemo,

²⁵at Yudas, Yesus wasuagaluk yoko lageikhe etnogo nen he, “Halok he, noe. An a? An dek apigi,” isikhemo at Yesus nen, “Hat mekeat ekhe lagan,” iluk yogokhikhe.

²⁶At Yesus nen wene itithogon yogokhikhesik, hipiri neke dogolik, roti ikimo waganhikhesik nen, Allah heagei warogo, ebe kusogo it agarumi emenogo supurisekhe dogolik, men yogeisasikhe, “Yi an nebeat o. Waganiluk nen nani o,” iluk yogeisasikhe.

²⁷Yogeisasikhesik yabokane isoak anggur eken apusu henago meke ikimo waganhikhesik nen, Allah heagei warogo it emenogo wogeisekhe dogolik, men yogeisasikhe, “Yi an namebat o. Allah nen wene warogo wokhinabigin isikhe etnogo, an namep ulabogo nasugun iti baga akhuni doalegat yi weak ti weak hagariogei meke thagalogo degetdisagein iti baga ebeat asigin o. Halok he, hinebe tha'bokhogonat nani o.

²⁸

²⁹Wene ageikhe yi yokhisak. Anggur eken apusu yi nalok, an yabokane ageikhe nikidek dogoluk nen, hurli nopase nen at apma 'bisagein iti hurli hit ninom apusu ket meke nugun o, iluk, eberogonat yokhisigi,” iluk yogeisasikhe.

³⁰Wene itithogon yogeisasikhesik nen, etai Allah etai ageikhe watluk dukhisukhasik nen, tom Zaitun oba dageisukha.

³¹ Tom Zaitun oba dageisukhasik, at Yesus nen, “At Allah nen, At ap domba therisik welagarek meke iti ebe an nen wakhunem, domba opakimo natogorlek welagarek meke iti, lo lugun o, iluk isikhemo, holal waganogo 'bisukhama werek iti nen, yogotak hibako yi, hit tha'bokhogonat an thogotdaniluk lo lugun o.

³²Mekeat he, an nakhunem Allah nen yabokane nilugutnakhunem, an tak o Galilea dageiluk hinolokhoma dogogin o,” iluk yogeisasikhemo,

³³at Petrus nen he, “It tha'bokhogonat thogotdageiluk lo lugun halok he, an anek thogotdageiluk lo dukhigin motok dek o,” iluk yogokhikhemo,

³⁴at Yesus nen he, “Yogotak hibako thue ayam motok ane igidek werek korlek, hat nen he, Yesus iti nokodek o, iluk, hiki henagan oba la'beligin etnaga o, iluk eberogonat yokhikhi,” iluk yogokhikhemo,

³⁵at Petrus nen he, “Dek o. An nipisagat ninasumo ninasusagat o. Meke re, an nen, Hat nokodek o, iluk, la'beligin dek o,” iluk isinem, it Yesus agarumi ane waganhe lagoukha meke emenogo ebetlake tha'bokhogonat nen, itithogonat ilik lagoukha.

³⁶Itithogon isukhasik nen, at Yesus ebe men, agarumi ane waganhe lagoukha meke emenogo men, inom Getsemani yabumo lagoukhasik agarumi men yogeisasikhe, “An horok ya lalok sembayan ekhe korlek, hit yoma hurek dogoni o,” iluk yogeisasikhe.

³⁷Itithogon yogeisasikhesik nen, Petrus men, Zebedeus a'buri inebe pere eranogo men, wogosik lageikhesik nen, akla weak atluk etaiken thebelu'buk ageikhemo men yogeisasikhe,

³⁸“An netaiken motok weak agasik watlagsusagat hakene hagatnabiogo. Halok he, hit ya dogolik, ninomat ninobabut hebelogo therogo dogouok,” iluk yogeisasikhesik nen,

³⁹at asokneat negen horogat lageikhesik elokhe thogoumhogon wi lageikhesik nen, Allah ayoko 'bekhe dogolik, men yogokhikhe, “Nopase o. An weagatnabugun iti tilnabusak halok he, tilnabin o,” iluk u hak, “Apusu henago noagaluk woknesugun iti, wokhausak halok he, wokhano. Nen, dek halok he, an nakla apigi meke iti dek o. Hat hakla apegen meke itiat hagatnabino o,” iluk sembayan isikhe.

⁴⁰Sembayan itithogon arat iluk nen agarumi henagan emenogo inoba wageikhe meke, it noge motok isinem, at Petrus men yogokhikhe, “Hit he, hibako yi satu jam opaki hasigat an ninom thuam wasusak erlok dek a?

⁴¹Weak hagasuagaluk hinakla kagalisinogo iluk, hinobabut hebelogo dogolik, sembayanat ekhe dogoni o. Hinakla nen erlok hagasusak iluk apekhe lagap mekeat, hinebe nen itithogon hagasusak erlok dek o,” iluk yogeisasikhesik nen,

⁴²sembayan alebat isikhe hagat, yabokane dagakhogon lageikhesik nen, men isikhe, “Nopase. An weagatnabugun yi re, tilnabusak erlok dek halok he, hat hakla apegen iti tak-tagat hagatlasuak o,” iluk sembayan isikhe.

⁴³Sembayan iluk yabokane wageikhe meke re, it agarumi emenogo noge inil ageikhemo nen he, noge isinem 'birisa wageikhesik nen

⁴⁴sembayan alep iki pere baga isikhesik, yabokane ageikhe inom igiluk lageikhesik nen, alebageik isikhe hagat, isikhe.

⁴⁵Arat iluk nen agarumi inoba wageikhesik men yogeisasikhe, “Hit thet walogo noge isi motok dogogun a? Lakhani! Ap ageikhe nen ap weak hagakharek meke nen an abat itaklasi agagi etnogo nasuagaluk inikimo 'banigin iti o arat asi aga.

⁴⁶Halok he, nit luok nen he, hit melatni o. Lakhani! Ap an nasuagaluk yoko laga meke etnogo arat horogat waga ithi o,” iluk yogeisasikhe.

⁴⁷Yesus nen, “Horogat waga ithi,” iluk ekhe korlek, eranogoat, at Yudas, ebe Yesus agarumi inebe 12 emenogo meke yoko lageikhemo, it ap Allah iteerek meke inougi koktek emenogo inom, it ap inarluetek emenogo inom nen, it ap inebe doalegat inayoko 'biluk la'isa agoukhama, karok men, payuk men, wolok inebe motok doaldiluk inom wagoukha.

⁴⁸At Yudas nen Yesus wasuagaluk yoko lageikhe meke etnogo nen, wene men warisasikhesik nen wagoukha, “Ebe hutdubageik nen he, an tak lalok heagei nape tharluk wakhi halok he, hit nen, I, ebe itiat higi, iluk, hakha lano,” iluk wene arat warisasikhesikmo nogo nen, iniluat werekma

⁴⁹at tak Yesus oba wageikhesik nen, “Noe o,” iluk, ape tharluk heagei wakhunem,

⁵⁰at Yesus nen, “Nagot yi! Hat nenaluk wagan,” iluk yogokhikhemo, it ap emenogo Yesus oba wagoukhasik nen, ebe motok hakhasukha.

⁵¹Hakhasinem ap ageikhe Yesus inom welagoukha meke etnogo nen karok aika akla uakma nen kigikhogon, ap Allah iteerek inoe kok atuaneke ageikhe asuk motok 'bogokhogon la'isikhe.

⁵²Itithogon la'isikhemo, at Yesus nen, “Hakarok iti huakma obolukmo ukhasin o. It ap karok oba inakharek oko karok obaat inakharek anek iti o.

⁵³Yogotak an nebe nirlirli woknabuagaluk, nopase kino yogosumo, at nen it malaikat Allah nen pogot oba yoko usa'isa agarek meke emenogo inebe agot dopok 12 oba doaldiluk pererlagat mekeat he, agot dopok motok doaldiluk inayoko 'bumo, tilnabi wisusak erlok dek apegen a?

⁵⁴Tilnabi wisusak erlok mekeat he, tilnabilepma Allah nen, Itithogon hagatlasigin, iluk isikhemo holal waganek werek etnogo re, nikithogon tak-tagat atlep apegen. Dek o. Tak-tagat asuagaluk itithogon yogokhidek thogotdigi iti,” iluk yogokhikhesik,

⁵⁵it ap doalegat wagoukha emenogo men yogeisasikhe, “Ap iki abusak waganhunem hageinakharek iti hak, hit nen itithogonat an haknabuogoluk, karok men, payuk men, motok wolok wagap yi re! An hibiku-yogoku Allah ai halekma hurek dogolik wene yakulisugunem, hit nen yigithogon haknakhidek welagasibat he,

⁵⁶it ap Allah ane yogeisekhe lagoukha meke nen holal waganhukha etnogo tak-tagat asuagaluk hagatnakhep o,” iluk yogeisasikhemo, it ap at ane waganhe lagoukha meke emenogo, at ebe thogotdiluk lo motok lagoukha.

⁵⁷Lo itithogon lagoukhama nen, at Yesus ebe hakhasukhasik, ap Allah iteerek meke inoe kok etaga Kayafas oba wolok lagoukha. Lagoukhama, etoma it ap Allah ane holal waganek iteerek meke inom, it ap inarluetek inom, natogorlek werekma lagoukha.

⁵⁸Yesus itithogon wolok laga korlek, at Petrus etnogo yabokane inoporlik huyo'bo laga lageikhesik nen, ap kok Kayafas etnogo agokutlu ukisikhesik, “Yesus nikithogon hagasugun,” iluk ileken hisagaluk, at ap kok etnogo agarumi Allah ai halek therogo welageikharek meke inom thabakhogon hurek lageikhe.

⁵⁹Hurek werek korlek, it ap Allah iteerek inougi koktek men, wene Allah hasik erlo pilinekharek meke tha'bokhogonat men, at Yesus wasuogoluk, men isukha, “Akhuni at weak hagakhunem inileken hega meke uak nen herageinabini,” iluk inekalat wene oba 'buagaluk herageinakhukha meke re,

⁶⁰inebe doalegat inekalat nen wene oba 'buogoluk wagoukha mekeat he, dek ageikhemo, yabokane ap inebe pere meke wagoukhasik nen,

⁶¹“At yi nenat, Allah ai iti misalogo la'iluk nen, obolukmo, yabokane niki pere baga halhe dogoluk nen niki ageikhe baga yi arat ilugun haligin o, iluk isikhe meke,” isukhama,

⁶²at ap Allah iteerek meke inoe kok etnogo melageikhesik nen, “It ap yoma wene doalegat hoba 'biliogei yoma, hat nen oko ageikhe yogeisagein dek a? Oko yogeisaumo re,” iluk yogokhikhe mekeat he,

⁶³at Yesus ane igidek thogotdisikhemo, at ap kok Allah iteerek meke etnogo nen he, “Allah a'but Kristus la'isigin isukha etnogo, ebe hat halok he, yoknisanok iluk, at Allah iluk motok welagarek meke etaga hupuk palogo yokhikhi o,” iluk yogokhikhemo,

⁶⁴at Yesus nen, “Hat nen egen itiat o. Meke re, an ageikhe yokhisak. Hurli yogotak nen, an abat itaklasi agagi etnogo, at Allah obatne horleak yi meke ti meke hagasusak anek etnogo nipisak alilu iki ebeke kogat hurek dogoluk nen, yabokane pogot oba etoma nen oisa aklake usa'agunem hinileken neagun o, iluk yokhisigi,” iluk yogokhikhemo,

⁶⁵it ap Allah iteerek inoe kok etnogo asu li'bilogo la'ekhe dogolik, men yogeisasikhe, “Allah akla meanetdiluk etaga weagatdekhe iti hegep a? Akhuni nen at weak hagakhunem inileken hega meke wene pakhogon uagaluk nenaluk therisik dogogun. At nen Allah akla meanetdiluk etaga weagatdekhe iti arat hinasuk holhep.

⁶⁶Halok he, hit nikithogon apekhe lagap,” iluk yogeisasikhemo, it nen he, “Weak ekhesikmo ebe motogat wasusak o,” iluk yogokhukha.

⁶⁷Itithogon yogokhukhasik nen, wosi oba suphogon 'bigik, tugi wakhik, iniki agot tugi tamuk-hamukhogon wakhik, hagakhe dogolik,

⁶⁸“Kristus! Tha nen hakhe nogo. Yoknisan ta,” iluk yogokhe lagoukha.

⁶⁹Itithogon yogokhe korlek, at Petrus etnogo okutlu holkerlekma hurek werekma, horlak inatuaneke meke ageikhe oba wageikhesik, men yogokhikhe, “Hat meneke, Yesus Galilea meke iti hinom nekhe lagap meke apigi,” iluk yogokhikhemo nen,

⁷⁰at Petrus nen akhuni doalegat emenogo inil obaat, men yogokhikhe, “Hat egen iti an nokodek o,” iluk nen,

⁷¹holagape palek dukhegarekma eranogo dukhisigiluk hagakhunem, at horlak atuaneke meke ageikhe ninat meke nen ileken lakhalok, akhuni doalegat emenogo men yogeisasikhe, “Ap yi Yesus Nazaret meke etnogo inom nekhe lageikha mekeat o,” iluk yogeisasikhemo,

⁷²at Petrus nen alep isikhe hagat, yabokane Allah etaga hupuk palhe dogolik, “Ap iti an nokodek o,” iluk yogeisasikhesik,

⁷³eranogoat werekma, it ap doalegat emenogo Petrus oba wagoukhasik nen, men yogokhukha, “Hane ekagat hutdagakhe lago. Hat hebe eberogonat it mekeat o,” iluk yogokhukhama

⁷⁴at Petrus nen he, “Ap iti ebe an nokodek o. Nopase Allah oak! Nekalat igi halok, at nen nasuak o,” iluk, hupuk palhe korlek eranogoat thue ayam ane arat isikhe.

⁷⁵Thue ayam ane arat isikhemo, at Petrus nen, “I. Yesus nen yoknekhe dogolik, Thue ayam ane igidek werek korlek, hat nen, Yesus nokodek o, iluk hiki henagan oba la'beligin, iluk yoknekhe etnogo ebe arat la'belhi yi higi,” iluk, akla ebetdiluk dukhisikhesik nen, etaiken hisogo de ageikhe.