Read Mid Grand Valley Dani Matius 28 Bible Online

Matius 28 - Mid Grand Valley Dani bible

Matius 28

¹Itithogon hagakhukhasik iniki 7 baga Allah hasik werlegat welagoukhasik nen, hubuluke hari Minggu baga, mo yegelogo dagei aga korlek, at he Maria ai Magdala meke etnogo inom, he Maria ageikhe etnogo inom, Yesus ebe warek 'bisukhama inileken 'bikhauwogoluk wagoukha.

²Waga korlek eranogoat, dugul kogat luk-lagathasi korlek, malaikat Allah nen pogot oba yoko usa'isa agarek meke ageikhe usa'ageikhesik, thu helekit meke tetnokhogon lakhukha etnogo dipikhogon la'iluk nen, oba hurek lageikhe.

³At malaikat etnogo elokhoken o yabok hakene hagakhe dogolik, asu ugu meke elokhoken kut motok yibarlabethasikhe.

⁴Itithogon hagakhikhemo, it ap thuam welagoukha meke emenogo inayuk nen inoageleke dik-dik hagakhe dogolik, akhuni warek meke hakene motok hagatlagoukha.

⁵Nen, at malaikat etnogo nen it humi emenogo yogeisekhe dogolik, “Hinayuk agup o. Hit nen, Yesus o baga meldiluk wakha etnogo hinileken 'bikhauwogoluk wagap iti an nilu o.

⁶Meke re, ebe yoma dek. At nen yokhisasikhe hagat, Allah nen ilugutdekhemo werek o. At welagama yoma oboluk anek yi hinileken 'bikhatni.

⁷'Bikhalok nen, Yesus etnogo watlagasikmo nen Allah nen ilugutdekhemo o, iluk, at agarumi ane waganhe lageikha meke emenogo ibat yogeisa lano o. Hit o Galilea etoma aban lageidek werek korlek, at tak hinelokhoma lalok werekma hinileken 'bikha lugun o. Nane yokhisigi iti eberek dogono o,” iluk yogeisasikhemo,

⁸it humi emenogo oila etoma nen ibat laga dogolik inayuk agoukha mekeat he, yabokane inakla arleken motok akhilik akhilik, at agarumi ane waganhe lagoukha meke emenogo inoba pirlirliat yogeisa lagoukha.

⁹Yogeisa luogoluk lagunem holagarlem at Yesus inom abuk agoukhasik nen, men yogeisasikhe, “Nerugi o!” iluk yogeisasikhemo it humi emenogo horok-horok lagoukhasik nen, isok iniki hakhekhe dogolik, heagei warogo initibagal yukukhogon hogorakhukha.

¹⁰Hogorakhukhama, at Yesus nen he, “Hinayuk agup o. An nagarumi emenogo o Galilea dagouak nen, yogeisa lani o. Etoma dageiluk inileken 'bitneagun o,” iluk yogeisasikhe.

¹¹Itithogon yogeisasikhemo, it humi eranogo aban laga korlek, it ap thuam welagoukha meke emenogo aperek o kota ukisukhasik nen, wene tha'bokhogonat hagatlageikhe meke emenogo, “Itithogon hagatlaga,” iluk, it ap Allah iteerek meke inougi koktek emenogo motok pilin-palinhogo yogeisasukha.

¹²Itithogon yogeisasukhama, it men, it ap inarluetek emenogo men, inom natogotdiluk wene paldiluk nen, it ap tentara meke emenogo uang perak meke doalegat wogeisekhe dogolik

¹³men isukha, “Hit nen, Hibako nit noge isi korlek, at Yesus ane waganhe lageikha meke emenogo wageikhasik nen Yesus ebe warek lima'iluk dukhegama, iluk yogeisekhe dogono o.

¹⁴Wene hagatlaga meke iti hasik, at Gubernur asuk holigin halok, hit wene ninoba 'bigin iluk, hinelabut hisunogo iluk, nit nen akla kagalugun o,” iluk isukhama,

¹⁵it ap tentara meke uang emenogo horlasukhasik nen, it ap emenogo nen isukha tak-tagat hagakhukha. Wene iti wikhatdisukhama nen, it akhuni Yahudi meke nen, yogotak hurli isi motogat werek o.

¹⁶At Yesus nen at agarumi ane waganhe lagoukha meke inebe 11 emenogo yogeisekhe dogolik, “O Galilea lalok tom iti baga dageiluk dogono,” iluk wene warisasikhe tak-tagat lagoukhasik dageisukha.

¹⁷Dageisukhasik werekma at Yesus ebe inileken hasukhasik nen, heagei warogo initibagal yukukhogon hogorakhe korlek mekeat he, it aperek emenogo anek he, “At ebeat a? Men a,” iluk apasukha.

¹⁸Itithogon apekhe korlek, at Yesus ebe inalilu wageikhesik nen, men yogeisasikhe, “Allah nen he, pogot oba meke inom, agat oba meke inom, tha'bokhogonat an iteerek 'banhemo o.

¹⁹Halok he, yi akhuni ti akhuni inukuloak etaga dopok tha'bokhogonat an nagarumi hagatlasuagaluk, nopase Allah etaga baga, an a'but netaga baga, Agoreke etaga baga, ninetaga palogo ima usa'isigik, an nen wene hinasuk wakhi meke iti tha'bokhogonat it akhuni nen mothogon hagakhe dogoagaluk yakulisigik, hagarik laga dogono. Lakhani! Hit itithogon hagarinabik lagunem, an nebe ninom motok-motogat werekma, hurli o ilugun hurli baga hagatlasigin o,” iluk yogeisasikhe.