Read Mid Grand Valley Dani Matius 3 Bible Online

Matius 3 - Mid Grand Valley Dani bible

Matius 3

¹Itithogon hagakhukhasik oba nen, at Yohanes ima usa'isekhe lageikhe meke etnogo, o Yudea limo akhuni dekma etoma wageikhesik wene yakulisekhe dogolik, yigithogon ekhe lageikhe,

²“At kok pogot oba meke apma 'bisagein etnogo yogotak arat 'binanigin. Halok he, yi weak ti weak hagakhe lagap meke here'isalok hinobabut hebelatni o,” iluk yogeisekhe lageikhe.

³ Iti ekhe lageikhe iti, at Yesaya Allah ane yogeisekhe lageikhe meke etnogo nen yogeisekhe dogolik, “Ap ageikhe o limo akhuni dekma etoma ane wai ekhe dogolik, Eiya! Ninoe Etagapogot wisiginke, holak hanorogo yakhik, korlo meke mothogon yakhik, yakhe dogoni o, iluk waisiliogo,” iluk Yesaya nen ekhe lageikhe etnogo, at Yohanes ebeat wageikhe iti.

⁴Wageikhesik, limo akhuni dekma etoma dogolik wam unta isi meke karogo, asu ikhigik, oado meke karogo, therlok hagarogo ikhigik, ikhe dogolik hipiri nau hak, yibirla nikik, themuk apusu okama meke nikik, hagakhe lageikhe.

⁵Itithogon werekma, it akhuni o kota Yerusalem nen, o propinsi Yudea nen, i Yordan aik obake etoma tha'bokhogonat nen, at oba natogosi agoukha.

⁶Wagoukhasik nen, yi weak ti weak hagakhe lagoukha meke 'bualogo thogotdisugunem, i Yordan ima usa'isekhe lageikhe.

⁷Itithogon, hagakho werekma, it ap Farisi meke aperek inom, ap Saduki meke aperek inom, inebe doalegat nen, “Nit ninomat ima usa'inanuak,” iluk oba wagunem yigithogon yogeisekhe lageikhe, “Hit warlo pelal nen itago meke yomarani! Hit nen Allah akla aga apik dageigin etnogo hinoba 'bisinem lo erlok lugun iluk tha nen husupi yokhisekhemo? Erlok dek o.

⁸Halok he, hinakla ebetdiluk, weak hagakhe lagap meke here'isalok, hinobabut eberogonat hebelaga iluk ekagat asuak nen mothogon hagakhe dogono o.

⁹Nen, hinakla nen, Abraham iti nit ninopase iluk, apugup o. At Allah nen Abraham a'buri negen helekit yi meke erlok hagasusak o.

¹⁰O erlo dopok eken hano meke ikhidek halok, mukhogo hetumo la'isagaluk pisue o omaken oba pakpakthek motok werek o,” iluk yogeisasikhe.

¹¹Itithogon yogeisasikhesik ageikhe men yogeisasikhe, “Hit weak hagakhe lagap meke here'isalok hinobabut eberogonat hebelaga iluk, an nebe yekerek nobatne dek meke nen ima usa'inagakhe lagei. Meke re, at kok obatneak meke yabokane wisigin o. At ebe kok obatneak iti nen, an nebe yekerek meke nen isok agot ugu meke wolok lausak erlok dek o. At nen ima usa'inagu hak, Allah Agoreke inom, hetu inom, hinoba usa'isigin o.

¹²Gandum eken abubuleke hulusak hasik than oba huphogon la'igin meke, at iteerek meke ikimo werek iti. Karelusak oba tak-tak asi aga halok, hano meke halok, karelogo 'bekherekma hanoma 'bigik, abubuleke halok hetu nagulusak dekma etnogo baga la'isigik, hagasigin o,” iluk yogeisasikhe.

¹³Yohanes nen wene etnogo yogeisekho werekma, at Yesus ima usa'uagaluk o Galilea nen Yohanes i Yordan aik oba werekma oba waga lageikhemo,

¹⁴at Yohanes nen, “An nen ima usa'agousak erlok dek o. Hat nen an ima usa'anusak meke re, an noba wagan yoma re!” iluk yogokhikhe.

¹⁵Yogokhikhemo, at Yesus nen, “An usa'anusagat o. At Allah nenat yi hasik ti hasik itithogon hagasuagaluk apekherek tak-tagat hagatnabusak o,” iluk isikhemo, “I o,” iluk

¹⁶ima usa'isikhemo 'buakhogon dageisigin hak, pogot kagoukhogon Allah Agoreke thue merpati yogeik negen, at oba labi usa'agunem ileken hasikhe.

¹⁷Oba duk i ageikhemo, Allah ane pogot oba nen, “An na'but netaiken hunik dogolik noba hotok egerek ebe ithiat o,” iluk ane usa'i ageikhe.